Pago Pago - AMERIKA SAMOA

VALAAULIA FAIPULE SWAINS E MOLIMAU I LUMA O LE KONEKERESI

Ua valaauina nei le afioga Alexander Eli Jennings, le Faipule o le motu o Swains, ina ia molimau i luma o le Komiti o Alagamanuia Faalenatura i totonu o le Konekeresi a Amerika, ona o se pili o lo o ta’oto nei i luma o le sui Komiti o Mataupu fai mo Teritori a Amerika faapea ma tagata Initia, lea ua faamoemoe e iloiloina i le aso Tofi, Ianuari 18, 2024 i le laumua i Uasigitone.

O lenei pili (H.R. 6062) sa faaulufaleina e le afioga Uifa’atali Amata, le sui Faipule o Amerika Samoa i totonu o Uasigitone, mo le toe fa’afoi o le malosiaga i tagata po o sui faitulafono, a Amerika Samoa, e pasia ai faaopoopoga i fa’avae o le teritori.  

O lenei valaaulia sa sainia e le Faipule o le setete o Wyoming, o Harriet Hageman, ma o ia foi o le Taitaifono o le Komiti i Uasigitone.

TAUNUU I AMERIKA SAMOA I LE VAIASO FOU LE ULUA’I MELI O LE 2024

E tusa ai ma se kalena mai i le Ofisa o Turisi a Amerika Samoa, ua fa’amaonia ai le taunu’u mai o le uluai va’a turisi, po o meli, i laufanua o Amerika Samoa, i le aso Tofi o le vaiaso fou, Ianuari 18, 2024.

O lenei meli, o le Volendam, ona soso’o mai ai lea ma le MS Seven Seas Navigator ia Ianuari 21, 2024, faapea le Seabourn Sojourn i le aso 30 ma le Island Princess ii le aso 31.

E 4 ni meli ua fuafua e taunu’u mai ia Fepuari (04, 15, 23 & 24) ona soso’o mai lea o le lua ia Mati (12 & 23) ma leisi fa ia Aperila (05, 14, 18 & 19).

AMATA MALAGA FA’ATA’ITA’I A LE PAGO WINGS I LE VA O TUTUILA MA MANU’A

O le vaiaso ua mavae, na amata ai malaga fa’ataitai a le kamupani vaalele, o le Pago Wings, i le va o Tutuila ma Manu’a.

O nei malaga fa’ata’ita, e Iloilo ai le mamafa o uta faapea ma pasese, e mafai ona feavea’i i le va o motu e lua.

O lenei va’alele, sa aofia i le saunoaga a le afioga i le kovana, Lemanu P. S. Mauga, i le aso Gafua, i le tatalaina aloaia o tauaofiaga a le fono faitulafono.  Sa ta’ua e Lemanu, atonu o le vaiaso nei po o le vaiaso foi a sau, o le a amataina ai lenei tautua faaopoopo aua femalagaiga i le va o Tutuila ma Manu’a.

Ae ua fa’amaonia mai e le Minisita o Femalagaiga i luga o le ‘Ea, i Samoa, le afioga Olo Fiti Va’ai, e ala i se fa’atalanoaga ma le Samoa Observer, le le’i faauluina o se talosaga a le Pago Wings, mo se laisene e faimalaga atu ai i Samoa.

O le taimi nei, na’o le Talofa Airways ma le Samoa Airways lea ua mae’a umia laisene e mafai ai ona femalagai i le va o Samoa e lua.

E pei ona sa ta’ua i se lipoti a le Samoa News i se taimi ua fano, sa iai se faamoemoega i le kamupani vaalele a le Pago Wings, e amataina la latou tautua mo faigamalaga togipau ia Novema 1, 2023, a’o fa’atali mo se fa’atagana mai i le malo e amataina ai a latou tautua fa’atulagaina.

O lenei kamupani vaalele, o lo o pulea e le alii faipisinisi, le susuga ia Papali’i Laulii Alofa, i lalo o le faamalumaluga a le Pacific Air Charters Inc., lea o lo o faamautu i Hawaii.

Sa ta’ua i se lipoti a le Observer e faapea, ua fa’alua ona lele le Pago Wings i Manu’a e tau fa’amasani ai, ae e le i tu lau’ele’ele i malaevaalele i Ofu ma Fitiuta.

TU’UAIGA I LE TULAGA FA’ALETONU O LE TAUSIGA O TAGATA FAIGALUEGA FA’AVAITAU

O lo o ua iloiloina nei e le malo o Samoa ia ni tu’uaiga e fa’atatau i le tulaga faaletonu o le tausiga o a latou tagata o lo o malaga atu i atunu’u i fafo, mo galuega fa’avaitaimi.

Ua ta’ua i se lipoti a le Samoa Observer le fa’asea mai i nisi o tagata Samoa o lo o galulue i se kamupani, na o latou ta’ua le faiga o i latou e pei ni ‘pua’a’.

Na saunoa le sui fa’atonusili o le Minisita o Tupe a Samoa, le susuga Tofilau Luamanuve Siliva, o lo o latou iloiloina nei ia fa’asea ua maua mai, ma soalaupuleina nei mataupu ma pule o galuega faapea taitai i Ausetalia.

Sa ta’ua e Tofilau, le fa’atauaina o tagata faigaluega mai Samoa, e le malo.

Ua ta’ua foi le iai o nisi o tagatanu’u Ausetalia ua o latou fa’afeso’ota’i le Samoa Observer, e tusa ai ma nisi o tagata Samoa ma tagata Pasefika o lo o galulue i galuega fa’avaitau, o lo o faapea ona sauaina i totonu o kamupani o lo o galulue ai, i Ausetalia.