Pago Pago - AMERIKA SAMOA

AUSIA E SE ALII JROTC MAI LE AOGA MAUALUGA A TAFUNA IA SE SIKOLASIPII 3 TAUSAGA

Ua fa’amanuiaina nei le alii talavou o Dallin Olefa Fepuleai, i se sikolasipi tolu (3) tausaga mai i le vaega a le ROTC (Reserve Officers’ Training Corps) a le Ami, ma ua avea ai o ia ma uluai alo o Amerika Samoa ua tu’usa’o mai lana sikolasipi e le Taitai’au  o le 8^th Brigade.

O Cadet Colonel Fepuleai, o lo o avea nei me ta’ita’i sinia i totonu o le vaega a le JROTC, a le aoga maualuga a Tafuna.  Ma sa tu’u’a’ao sa’o mai lava lana sikolasipi, e le ali’i ta’ita’I ‘au o Colonel James H. Scott III, mai i le laumua a le Ami i Lewis McChord i le setete o Uasigitone.  Ae o nei sikolasipi, e masani lava ona fa’ato’a maua i le va o le 6 i le 8 masina.  Ma o se molimau lea i le tulaga maualuga o le galue ma le taumafai a lenei atalii.

E tusa ai ma se fa’amatalaga mai i le polokalama a le JROTC i le aoga maualuga a Tafuna, sa auiliiliina ai le galue malosi ma le tautua a lenei alii i totonu o le polokalama a le JROTC  ale a’oga, se’ia o’o mai lava i le taimi na ia ‘ausia ai le pine apamemea i Ta’aloga o le Pasefika i le atu Solomona, ia Novema 2023.  

O le sikolasipi a lenei alii, e aofia ai le totogi atoa o lana aoga mo le tolu tausaga i so’o se iunivesite e fia auai ai, o lo o iai le polokalama a le ROTC.  O nei iunivesite o lo o i Alaska, Uasigitone, Oregon, Idaho, Montana, Kalefonia, Hawaii, Nevada, Guam, Iunivesite a Gonzga ma le Iunivesite a Kalefonia.

O lo o aofia ai foi i lenei sikolasipi ia sana lava tupe e $420 i le masina ma le $1,2000 mo ana tusi aoga, i le tausaga e tasi.

O Commander Dallin Olefa Fepuleai, o le alo o Fa’aso’otauloa Maea ma Tuifaasisina Lyllah Fepuleai, mai i le afioaga o Tafuna.

AMATA FAAMASINOGA MO ALII SAMOA O LO O MOLIA I LE FA’AO’OLIMA I SE SIKULAKI I KONA, HAWAII

Ua amataina nei le faamasinoga fou mo alii Samoa e toalua, lea o lo o molia i le taumafai e fasioti se sikulaki sa galue i le faletalimalo a le Kona Seaside, i Hawaii.

E tusa ai ma lipoti mai i vaega fa’asalalau i Hawaii, ua faatonuina e le Faamasinoga o Apili a Hawaii, ia le faia o se faamasinoga fou mo alii nei e to’alua, e atoa iai le to’atolu o i latou ua fa’asalaina i le fa’ao’olima o John Kanui, i le tausaga e 2018.

O le alii faamasino ia Robert D. S. Kim o lo o fa’afoeina lenei fa’amasinoga fou.

O le masina o Setema, 2022 na tu’uina mai ai se fa’aiuga a ni faamasino se toatolu, e faapea sa le tatau i le faamasinoga na faafoeina lenei mataupu, ona fa’aali se ata (video) o Kanui a’o feagai ma togafitiga o ona manu’a, i Colorado, i le tolu masina talu ona tupu le fa’alavelave ia te ia, ia Setema 17, 2018.

Ia Iuni 2019 sa fa’amaonia ai moliaga a Wesley Samoa ma Natisha Tautalatasi, i tu’uaiga o le taumafai e fasioti tagata i lona tulaga e lua, ae o Lama Lauvao na molia i le fa’ao’olima i lona tulaga muamua.  O fa’asalaga mo Samoa ma Tautalatasi, o le soloatoa i le falepuipui, ae o Lauvao e 10 tausaga sa faasala ai o ia i le falepuipui.