Pago Pago - AMERIKA SAMOA

PASIA E LE SENATE SE IUGAFONO ‘AUFA’ATASI E MOMOLI I FAAMAISEGA I LE TU’UMALO O LE AFIOGA SENATOA VASAGA TILO, SR.

Sa pasia e le Maota o le Senate, i le aso Faraile o le vaiaso ua tuanai, i lona faitauga lona tolu, ia se i’ugafono ‘aufa’atasi e momoli aloaia atu ai fa’amaisega a le Fono Faitulafono, e avea ma sui o le malo o Amerika Samoa ma ona tagata, i le faletua ia Christine Tialavea Morris Tilo ma le aiga faanoanoa, i le tu’umalo a le afioga i le Senatoa ia Vasaga Tilo Sr.  Ae le gata i lea, o le aloaia ai o lana tautua matavela, e le gata i totonu o lana ekalesia, aiga, itumalo, le vaega’au a le Ami, ae faapea le teritori a Amerika Samoa.

O lo o ta’ua i totonu o le I’ugafono e faapea, o le afioga Tilo sa soifua mai i le aso 6 o Iulai, 1943 ia Tilo Uta’ifeau Eliga Kalepo Tilo ma Fa’asilitama’ita’i Mulimuliinu’u Faoa Maui’a Aumoeualogo o Amerika Samoa.  Sa faapea ona malaga atu le aiga o Tilo i Hawaii a’o laititi o ia ma faamautu ai i Laie, Oahu.  Sa papatisoina Tilo ma faamauina atu i ona matua, i totonu o le Ekalesia a Iesu Keriso o le Au Paia o Aso e Gata Ai, i Hawaii.  Ma e to’a 22 uso ma tuafafine o le afioga i le Senatoa.

Na amata mai le soifua tau a’oa’oga a le afioga Tilo i Hawaii ma ina ua fa’au’uina mai i ana a’oa’oga, na faapea loa ona faigaluega.  I le 1964 sa ulufale ai le afioga Tilo i le Army Guard.  O le tausaga na soso’o ai, na malaga atu ai ma faamautu i Texas aua le fa’aauauina o ana a’oa’oga i le Kolisi a Texas Tutotonu.  I se taimi mulimuli ane, sa ia taliu mai ai i lona aiga i Amerika Samoa.

O le uluai galuega a le afioga Tilo i totonu o Amerika Samoa, o totonu o le Ofisa o Femalagaiga ma o I’inei i Amerika Samoa sa ofoina atu ai lana tautua i totonu o vaega’au a le malo tele, i le 1967 ma tau ai i le taua i Vietnam, se’ia faamae’aina i le 1972.  E 25 tausaga na tautua ai le afioga Tilo i totonu o vaega’au a Amerika.

O le 1991 sa toe taliu mai ai le afioga i le Senatoa i Amerika Samoa mo le fa’aauauina o lana tautua i totonu o lona aiga.  Sa fa’ae’eina atu foi ia te ia, ia le suafa Tulafia, a’o fa’aauau lana tautua i totonu o le malo o Amerika Samoa.  Lea na avea ai o ia ma sui Faatonusili o le polokalama a le JROTC, i totonu o le Ofisa o Aoga.  Mulimuli ane, sa fa’ae’eina atu le suafa Tilo ia te ia.

I le tausaga e 2015, i le atoa ai o le 25 tausaga o lana tautua i le malo o Amerika Samoa, sa faapea loa ona litaea le afioga Tilo mai ana galuega i totonu o le malo.  Ae i lona litaea, na filifilia ai o ia e avea ma Senatoa mo le itumalo #6, ia Ianuari 2016, lea sa faatautoina ai o ia i le nofoaiga lona 36 a le Fono Faitulafono.

O le afioga i le Senatoa ia Tilo, sa fa’auluulu iai le Komiti o Atina’ega tau i le Tamaoaiga, a le Senate.  Sa aofia foi o ia i le komiti o Faatoaga, o le Komiti o Paketi ma Alagamanuia o Tagata, le Komiti o Paka ma Malaeta’alo, le Komiti o Litaeao, le Komiti o le Falemai ma le Soifua Maloloina, le Komiti o Femalagaiga – Uafu/Malae vaalele faapea le Komiti mo le Tautua o Tagata Lautele.

O le afioga Tilo o se totino a le Uarota a Aua Muamua, o le siteki a Pago Samoa, i le Ekalesia a Iesu Keriso o le Au Paia o Aso e Gata Ai.  E maliu o ia, o lo o ia umia le tofi Perisitua o le Mekisateko ma avea o ia ma Fesoasoani Lua, i le au Epikopo. 

Na tu’umalo le afioga Vasaga Tilo, Sr., i le aso 3 o Tesema, 2023 i le a’ai o Sate Leki, i Utah.  O lo o soifua mai nei lona faletua ia Christine, o ni alo e to’afa, o fanau a fanau e to’a sefulu ma le tasi, faapea se fanau o fanau a fanau, e to’atasi.

E maliu le afioga i le Senatoa ia Tilo, ua mae’a ona fa’amanatuina lona 80 tausaga.

O lenei i’ugafono o le a faapea ona tau’a’aoina atu i le faletua ia Christine, i se sauniga faapitoa.

FA’ATAUNU’UINA SE FONO FA’ALAUA’ITELE A LE OFISA A AMERIKA SAMOA I HONOLULU

O le vaiaso ua mavae na faataunuuina ai se fono tele i le Ekalesia Faapotopotoga Kerisiano a Samoa, i Kunia, Oahu, sa taitaia e le aufaigaluega a le Ofisa a Amerika Samoa i totonu o Hawaii, aua le soalaupuleina o le polokalama o lenei tausaga, mo le aso o tu ma aganu’u Samoa.

Sa mafai ona folasia ai le auiliiliga o le polokalama mo lenei faamoemoe, i lenei tausaga, aua le aloaiaina o tu ma aganu’u Samoa, o ni aoaoga o le gagana, o siva ma faaaliga taleni faa Samoa.

Na fa’asoa ai foi e SSG Rani Tiatia, se totino o le National Guard a le Ami i Hawaii, ia avanoa faigaluega mo fanau talavou faapea le mamalu lautele.  Sa auai ai foi ma totino o le komiti kirikiti, ia Sue Miller ma Eseta Saole, mo le fa’amalamalamaina o le Liki Kirikiti lea o le a fa’ataunuuina mo i latou e 40 tausaga, aga’i i luga.

Sa faamaninoina ai foi i lea fonotaga ia tulaga o sikolasipi a le malo o Amerika Samoa “E lelei le Atua”, mo fanau aoga Samoa o lo o nonofo i totonu o Hawaii.  O lenei polokalama sa faavaeina e le ofisa o le Kovana, e fesoasoani i fanau aoga aua le fa’aalualuina I luma o a latou aoaoga.