Pago Pago - AMERIKA SAMOA

FA’AOPOOPO FAIGAMALAGA A LE HAWAIIAN AIRLINES I LE VA O HONOLULU MA PAGO PAGO

A’o feagai ai le ofisa vaalele a le Hawaiian Airlines ma tapenapenaga aua vaitaimi pisi mo femalagaiga i le va o Pago Pago ma Honolulu, i le vaitaimi o le tau mafanafana, ua faapea ai ona toe faaopoopo e le ofisa vaalele ia faigamalaga mo le teritori i le va o Me 22 se’ia pa’ia Setema 4, mai i le faalua i le vaiaso, i le faatolu i le vaiaso.

O vaitaimi tonu ia o lo o faapea ona tele ina aga’i atu ai tagata o Amerika Samoa mo asiasiga i aiga i Amerika, ae faapea foi le foufou mai o tagata Samoa mai i Amerika ma isi atunu’u o le lalolagi, mo tafaoga i aiga o lo o i le teritori.

E le gata I lea, o le toe taliu atu o fanau aoga i aoaoga i Amerika.

O le faigamalaga faaopoopo a le Hawaiian Airlines mo Amerika Samoa, o le a faaopoopo i le aso Lulu ma o le a faapea foi ona faaopoopoina isi faigamalaga a le ofisa vaalele, i le va o Honolulu ma Los Angeles, faapea Honolulu ma Las Vegas.

Ua faamaonia mai e le ofisa vaalele le tatalaina o avanoa e mafai ona totogi ai pasese  mo faigamalaga faaopoopo ua iai nei.

Ma e mafai ona totogi pasese i luga o ‘upega tafa’ilagi pe valaau foi le ofisa vaalele i Tafuna, i le 699-1875.

AUSIA E PAKA FA’AVAOMALO SINI FAATUINA MO SAILIGA TUPE

O se tala fiafia i le Asosi o Paka o le Pasefika i Hawaii (HPPA), ina ua mafai ona ausia sa latou sini faatuina, mo le sailiga o se tinoitupe e $90,000 e fesoasoani i paka faasao faapea nofoaga o tala faasolopito, e le gata i totonu o Amerika Samoa, ae faapea foi Hawaii.

Ua lipotia mai le aoina e le HPPA se tinoitupe e $106,125 – silia ma le latou $90,000 sa faatuina.

O lenei Asosi o le HPPA sa faavaeina i le 1933, ma o la latou faamoemoega autu, o le faatupeina o polokalame, e mafai ona faasaoina, faaliliuina ma aoaoina ai le taua o paka faasao faapea ma nofoaga o tala faasolopito i totonu o Hawai’i ma Amerika Samoa.

I le 90 tausaga o le faavaeina o le HPPA, ua silia ma le sefulu o le miliona tala ua mafai ona o latou saoina e fesoasoani ai i polokalama ma poloketi taua mo paka faasao.

I le tausaga na se’i mavae atu, i le faamanatuina ai o le 90 tausaga a le HPPA, sa fa’atuina ai sa latou lu’i mo le aoina o se tupe e $90,000 e ala i foa’i sa aoina i faleoloa a paka faasao i motu o Maui ma Hawai’I, ae e le i aulia le aso 31 o Tesema, 2023.

O lea sini sa mafai ona ausia i le ulua’i aso o le masina o Tesema, 2023, ae peitai, sa fa’aauau ai pea ona talia foa’i se’ia o’o ia Tesema 31, 2023, e pei ona sa fuafuaina.  Ma o le aofaiga atoa sa mafai ona aoina, e $106,125.

Na fa’aalia e le Faatonusili a le HPPA, ia Mel Boehl, le agaga faafetai mo pa’aga, o i latou uma sa foa’i, faapea le latou aufaigaluega, ona o le galulue faatasi ina ia mafai ona ausia lenei sini faatuina mo le fa’aauauina pea o le tausiga o paka faasao, aua fanau o le lumanai.

FAAILOA MAI E LE MINISITA O LEOLEO A SAMOA LE TAOFIOFIA O LE FAATAUINA ATU O LE AISA

Ua fa’alauiloa mai e le Minisita o Leoleo a Samoa, le afioga Faualo Harry Schuster e faapea, e tusa ai ma faamaumauga i tulaga o fualaau faasaina, o lo o fa’ailoa mai ai le tulaga lelei o le taofiofia o le fuainumera o fualaau faasaina o lo o faatauina atu i tagata, ae o lo o va’aia le maualuga o le sii o le tau o nei fualaau faasaina. 

Sa tete’e foi e Faualo ia lipoti e faapea, o lo o gaosia fualaau faasaina i totonu o Samoa.

O se uluai taimi lenei ua fa’alauiloa ai e le Minisitia o Leoleo, i luma o le Palemene, ia lipoti faamaumaina o tulaga i fualaau faasaina.

A’o iloiloina le paketi faaopoopo, sa saunoa Faualo, e valu ni osofaiga a leoleo sa faia i le tausaga e 2022 ma e 11.32 kalama aisa sa aoina ai, fitu ni laau maliuana, 23 lala ma fatu la’au e 11.

I le 2023, e 13 osofaiga, 72.10 kalama o aisa sa aveina e leoleo, 1452 laau maliuana, 115 lala ma fatu la’au e 1814.

E tasi se osofaiga a leoleo na faia i le amataga o le 2024 ma e na’o le 0.04 kalama aisa sa mauaina ai, 28 lala maliuana ma fatu laau e 140.

O lea na saunoa ai Faualo, o lo o fa’ailoa mai i a latou faamaumauga, e le o agai i luga le fuainumera o fualaau faasaina o lo o faatauina atu i totonu o Samoa.

Sa ia faatusatusa le 0.04 kalama o aisa, i le laititi o se atigilima, ma sa masani ona faatauina atu i le $100, ae o le taimi nei, ua $200.

Sa ta’ua foi e le Minisita, e tusa ai ma faamaumauga o lo o aoina e leoleo, o lo o fa’ailoa mai ai, e le o agai i luga le fuainumera o fualaau faasaina o loo faatauina i Samoa ma o lo o iai foi se talitonuga, o nei fualaau faasaina, o lo o aumai mai atunu’u i fafo, ae e le o gaosia i totonu o le atunu’u.