Pago Pago - AMERIKA SAMOA

MATAGI MALOLOSI A’AFIA AI MOTU O MANU’A I LE AOAULI ANANAFI

I se fa’aaliga mai i le Ofisa o le Tau a America Samoa i le aoauli ananafi, na ta’ua ai le tulatalata o ni ta’aviliga o matagi malolosi (tropical depression 08F) i motu o Manu’a faapea le Rose Atoll ma o le malolosi o le agi o savili, e o’o atu i le 35 i le 45 maila i le itula, ma si’isi’i.  

Ma sa ta’ua foi e le ofisa o tau, le a’afia o motu latalata ia Manu’a i le malolosi o nei matagi, ma sa fa’aauau ai lea tulaga i le po anapo.  

Na lapataia mai ai foi ia tulaga o Lologa i motu uma o Amerika Samoa, se’ia o’o mai i le aso nei.  Ma o lenei tulaga loualoua o le tau, ua talitonu, o le a tumau ai seia o’o i le faaiuga o le vaiaso.

O le mafua’aga lea na fa’alauiloa mai ai e le Ofisa o Vaalele ma Va’a folau, le taofia o le faimalaga masani a le MV Manu’atele lea na fuafua mo le aso nei, se’ia o’o atu i le faaiuga o le vaiaso, a’o fa’atalitali le toe tulaga lelei o tala o le tau.

MEAALOFA TUPE MAI NIU SILA MO LE ‘HALL’ A TAUSIMAI I LE FALEMAI MOTO’OTUA

Ua fa’ameaalofa mai e le malo o Niu Sila ia se tinoitupe e $5 miliona (tupe Samoa) mo le toe fa’aleleia o le ‘hall’ a Tausimai lea o lo o i totonu o le maota gasegase Tamasese Meaole, lea o lo o i Motootua.

O lenei meaalofa sa faaleoina e le Minisita o le Soifua Maloloina, le afioga Valasi Tafito Selesele, i tauaofiaga a le Palemene.

E le i toe fa’aaogaina lenei ‘hall’ a Tausimai talu ona mae’a ona fa’aaogaina i le taimi na pesi ai le faama’i o le misela i le 2019, ona o le tulaga faaletonu na iai le ‘hall’ ma le toe sefe mo le fa’aaogaina.

O lenei ‘hall’ sa fa’aaogaina mo so’o se fuafuaga a tausima’i o lo o galulue i le falemai i Motootua.

Ma na fa’aalia e nisi o tausimai mai i Motootua, lo latou fiafia tele i lenei fuafuaga mo le toe faaleleia o le latou ‘hall’ aemaise o le agaga fa’afetai i le malo o Niu Sila, mo le meaalofa tupe e faatino ai lea faamoemoe.

SAILI NI NESIONALE AMERIKA MO SE ATA TIFAGA

O lo o ua tau sailia nei e ni alii fai tifaga, le susuga ia Gabrielle Alafagamalufilufi “Gabby” Fa’ai’uaso mai i Fagatogo ma Nu’uuli; faapea le susuga ia John Falaniko “Niko” Patu mai Nu’uuli ma Pago Pago, ia nit agatanu’u moni o Amerika Samoa (Nesionale a Amerika), e fia auai i se la ata tifaga, o lo o fa’aalia ai manatu ma finagalo o tagata, e faatatau i le mataupu i tofi sitiseni a tagata o Amerika Samoa.

O lo o galulue faatasi ia Gabby ma Niko ma le susuga ia Tulaga Whitcombe, o se alii pu’e ata tifaga, ua loa ona galue i totonu o Amerika Samoa.

O lo o latou tau saili nisi e 18 tausaga agai i luga, e fia fa’aleo o latou manatu i lenei mataupu ma so latou malamalama’aga iai.

Na saunoa Fa’ai’uaso, o le faamoemoega o la latou poloketi, o le aoina lea o manatu ma lagona o tagata o Amerika Samoa e tusa ai ma le mataupu i le avea ma sitiseni o Amerika, pe leai.