Pago Pago - AMERIKA SAMOA

TETE’E E LE KOMITI A LE MAOTA O SUI I AMERIKA IA SE FAAOPOOPOGA I SE PILI E FESOASOANI I FANAU AOGA A CNMI MA AMERIKA SAMOA

Tete’e e le komiti a le Maota o Sui i Amerika ia se pili e fesoasoani i fanau aoga a le teritori

Ua lipotia mai e se vaega fa’asalalau i Saipan, le te’ena e le toatele o Faipule i totonu o le Maota o Sui a Amerika, ia se pili na faauluina e le afioga i le Faipule ia Gregorio Kilili C. Sablan, e faavae ai se polokalama e mafai ona ona totogia se vaega o pili mo fanau aoga a le CNMI ma Amerika Samoa, o lo o fia a’o’oga i kolisi ma iunivesite i fafo.

O lenei pili sa te’ena e le toatele o sui faitulafono Ripapilikana i totonu o le Komiti o Aoaoga ma Galuega, i le aso Lulu o le vaiaso ua mavae ae peitai, e ui i le le faamanuiaina o ana taumafaiga, sa saunoa le afioga i le Faipule o Sablan, o le a ia taumafai pea e saili auala e mafai ai ona maua e fanau aoga CNMI, ua agava’a, ia se fesoasoani e fa’alauteleina ai a latou aoaoga.

Sa fa’aalia e Sablan i sana tusitusiga i le faaiuga o le vaiaso e faapea, o le pili na ia faauluina ma se faamoemoega e tatalaina ai avanoa i fanau aoga CNMI ma Amerika Samoa, o lo o foufou atu mo kolisi ma iunivesite, ae o le toatele o i latou e o mai mai aiga e lima vaivai i tulaga o le seleni.

Na saunoa Sablan i le taimi o le iloiloga o lenei pili, i le taua tele ona mauaina e fanau uma o Amerika ma ona teritori, ia avanoa e fa’aauau ai a latou aoaoga.

O lo o finagalo ia Sablan ina ia fesoasoani lana taumafaiga mo fanau aoga uma a le atu Mariana ma Amerika Samoa, ina ia maua avanoa e fa’aauauina ai a latou aoaoga.

Na saunoa Sablan, e na o le CNMI ma Amerika Samoa, teritori a le Iunite Setete, e leai ni kolisi 4 tausaga, ma o le mafuaaga lea e faimalaga ai fanau aoga i atunu’u i fafo e fa’aauau a latou aoaoga.

O le pili a Sablan, sa faatulaga faataitai i se polokalama fesoasoani a le Itumalo o Columbia, mo pili o aoga.  Me na ia ta’ua e faapea, o lana faaopoopoga po o se suiga sa ia taumafai iai, ina ia mafai ona faatulaga se vaegatupe mo kolisi ma iunivesite i Amerika, e totogi ai le eseesega o pili a fanau aoga i totonu o setete ma pili mo fanau aoga mai fafo o setete.

TOE FOUFOU MAI SEISI TAAVILIGA O MATAGI MALOLOSI I LE VAIASO FOU

I se lipoti mai i le Ofisa o le Tau i Tafuna i le aoauli ananafi, na fa’alauiloa mai ai le agai ese atu o le afa o Osai lea sa tu latalata i Manu’a, ae o le a fa’ato’a faaitiitia tulaga o savili malolosi i le po ananei.

Ae peitai, o le faaiuga o le vaiaso nei ua fa’ailoa mai le foufou mai ai o nisi foi taaviliga o matagi fou ma o le a iloa i le aso Gafua pe ono liua i se afa.

O lo o fa’aauau pea ona tumau lapataiga mo lologa faapea ma galu tetele i ogasami a Amerika Samoa.

LOKA SE ALII I HAWAII UA MOLIA I LE FAATAUINA ATU O FUALAAU FAASAINA

O lo o ua lokaina nei i Hawaii ia le susuga ia Pio Kapeli, e 56 tausaga le matua, ina ua molia i faitauga e fa o le faatauina atu o fualaau faasaina.

Sa mauaina Kapeli ma aunese e fa o le vaega o fualaau faasaina, o le Aisa ma le 20 kalama o maliuana.

O le aso Faraile ua mavae, na te’ena ai e le faamasino ia le tatalaina i tua o Kapeli, i lalo o le vaavaaiga a se tagata.

Ae ua faatulagaina le $221,000 e mafai ona tatalaina ai o ia i tua, e faatali ai lona faamasinoga.

$30,000 MO SAGATO MARIA

I se lipoti mai i le Samoa Observer, ua fa’ailoa mai ai le faamanuiaina o le aoga a le Sagato Maria i Samoa, i se tinoitupe e $30,000 mai i le Amepasa a Siamani i Ueligitone, Niu Sila, e fesoasoani i le faaleleia atili ai potu aoga mo aoaoga faatekonolosi.

Ua fa’ailoa mai e faapea, e 15 komipiuta feavea’i (laptops), o se ea malulu (air conditioning unit) ma ni isi mea totino mo le potu aoga, e aoaoina ai komepiuta.

Sa faamanino e le Konesula o Siamani i Samoa, ia Tagaloa Christa Szegedi le  taua o lenei poloketi mo le Kolisi a Sagato Maria. Aemaise ai le taua o le malamalama o fanau aoga i komepiuta aua e taua tele mo lo latou lumanai.