Ads by Google Ads by Google

TALA I VAIFANUA


[ata: foa'i]

Pago Pago - AMERIKA SAMOA

GAIOIGA FA’ALEAGANU’U A LE ‘SAMOAN HERITAGE’ I HAWAII

Honolulu, HAWAII – O le aso Toonai, Aperila 6, 2024, sa fa’ataunu’uina ai le polokalama o le ‘Samoan Heritage’ i Hawaii, e pei ona tu’ufa’ata’asia e le Komiti o Aganuu ma Gagana, faatasi ai ma le lagolago malosi a le Ofisa a le Kovana i Hawaii, i le Hall a Kanana Fou.

O i latou na mafai ona auai i lea faamoemoe, sa mafai ona aofia i gaioiga e pei o le sauniga o taumafa Samoa, e pei o Koko Alaisa, Poi Fa’i, Koko Samoa, Panipopo ma Fa’ausi.

O le ‘ava o feiloaiga sa faapea ona taitai’a e le susuga ia Fata L. Utupo, ma le autalavou a le Lighthouse.  Sa mafai ona fa’asoa mai ai le susuga i Faifeau Toeaina ia Koneferenisi Nu’usa, nisi o tima’iga ma puna’oa i le fa’afaileleina ma le a’oa’oina o alo ma fanau.

O nisi o gaioiga sa faapea ona a’oa’oina ai le gaosia o Tuiga faapea ma Palefuiono, lea sa fa’ataunu’uina e Laronda Mavaega, o le ‘Le Atuto’s Creations’.

E le gata i lea sa faapea foi ona a’oa’oina ai le gaosiga o Elei, e Leiese ma le susuga ia Lawrence Apo, o se polofesa o le gagana Samoa i le Iunivesite a BYU.

O le susuga ia Sam Alone sa gafa ma le a’oa’oina o le Ta Mamanu, faatasi ai ma si ona alo tamaitai.

O nisi o malo fa’aaloalogia sa mafai ona auai i lea aso, na aofia ai Arrianna Princess Auva’a, ma le Tausala o Samoa Hawaii ia Sive Jarrard ma Claire Toeava.  O le taualuga faaiu, na sa’asa’a ai le susuga i le Faifeau Toeaina ia Koneferenisi Nu’usa.

PE A MA LE 72% O LE FALE FOU A LE MAOTA FONO UA MAE’A ONA FAUSIA

Ua atoa le fa tausaga o fa’aauau pea ona tu’ufesili le mamalu o le atunu’u, aemaise o afioga i sui faitulafono, i le tulaga ua iai le fale fou a le Maota Fono, lea o lo’o fausia nei i le afioaga o Fagatogo.

O se mataupu foi ua leva ona avea ma atugaluga i lagona ma mafaufau o afioga i Sui Faitulafono a le atunu’u.

Ae i le vaiaso ua mavae, sa fa’alauiloa mai ai e le susuga ia Mark Knutson, le sui peresetene o le Arcadia Inc., le tele o se vaega o le foloa o le fale ua mae’a ona fausia, i le lua masina na se’i mavae atu.  O le Arcadia Inc., o le kamupani lea o lo’o okaina uma mai ai u’amea ma tioata, o lo’o fa’aaogaina e fola ai le fale fou a le Maota Fono.

Na fa’aalia e le susuga ia Knutson le matagofie o le galuega o lo’o fa’agasolo nei.  Na malaga mai le sui peresetene o le Arcadia, ina ia mafai ona ia tagai i le fa’agasologa o le galuega o lo’o faia nei.

Na ta’ua foi e le susuga ia John Goeke, o ia lea o lo’o avea ma sui o Mark Lively, lea na tusia le ata o le fale fou ma o ia foi o lo’o mataituina le faagasologa o le galuega kamuta o le fale, e pe a ma le 72% o le poloketi lea ua mae’a.

O lo’o fa’aauau foi galuega i totonu o le fale, lea o lo’o fa’afoeina e le kamupani a le Paramount Builders.

AUSIA E CADET COMMAND SERGEANT TAUILIILI, CHARLES, IA SE SIKOLASIPI ROTCH MO LE TOLU TAUSAGA

O se tala fiafia mo le Laumua a le Toa, ae le gata i lea, o le aiga o le alii talavou ia Charles Tauiliili, le faamanuiaina o ia i se sikolasipi mo le tolu tausaga, i totonu o le polokalama o vaega’au a fanau aoga maualuluga (ROTC).

Ua ausia e le alii taitai’au, Cadet Command Seargent Major Charles Tauiliili, ia se sikolasipi, e $80,000 lona tau atoa, mo le tolu tausaga, e aofia ai le pili o lana aoga, faapea ma le totogiina o ana tusi a’oga ($1,200) faapea ma se tupe fa’alemasina e $420, o le a ia maua e fesoasoani ia te ia pe a o’o atu i lona vasega 10-12.

Ua to’atolu ai nei fanau aoga mai i le aoga maualuga a Tafuna, ua faamanuiaina i Sikolasipi mo lenei tausaga faau’u.  

Ua faamoemoe Tauiliili e fa’aauau ana aoaoga i le Kolisi a Southern Utah University (SUU), ona o lona naunau ia fa’aauau pea i totonu o le polokalama a le ROTC.

O Tauiliili, o se alo e fa’asino i le susuga ia Ionatana Tauiliili ma le faletua ia Falaga, mai i le afioaga o Tafuna.