TALA I VAIFANUA
Pago Pago - AMERIKA SAMOA
FA’ASA ONA TOE FA’ATAU ‘VAPE’ I FALEOLOA
O le aso Faraile o le vaiaso ua mavae, Me 3, 2024 na o’o mai ai se lipoti i le Samoa News mai i nisi o faleoloa o le atunu’u, le fa’asaina e le Ofisa o le Soifua Maloloina (DOH) ona toe fa’atauina ia sikaleti ia e ta’ua o le ‘vape’, i totonu o faleoloa ma o se tulaga ua fa’ate’ia ai le to’atele o tagata o le atunu’u, e fiafia i lenei ituaiga sikaleti.
Sa taumafai se sui o le Samoa News e feso’ota’i ma le Ofisa o le Soifua Maloloina faapea ma le Ofisa o le Kovana, po o anafea na sainia ai e le kovana ia lenei tulafono, ua fa’asaina ai ona toe fa’atauina ‘vape’ i totonu o faleoloa.
Ae peitai, e tusa ai ma fa’amaumauga a le Samoa Nwes, sa faaulufaleina e le afioga i le Senatoa ia Magalei Logovi’i, ia se pili, i le masina o Mati o le tausaga nei, o lo’o ta’ua ai le taua tele o le toe faatulagaina o le Tulafono o lo’o mataituina ai ia le tapa’a, ina ia mafai ona o gatasi ma sikaleti po o tapa’a fou faapea ma oloa o lo’o aofia ai le ‘nicotine’, lea o lo’o ua a’e mai i nei vaitaimi ma o lo’o tele ina fa’atosina ina ai fanau talavou o le atunu’u.
O lo’o ua ta’ua foi i totonu o lea pili e faapea, o lo’o tumau pea le sini autu, mo le puipuiga o le soifua maloloina o fanau talavou mai i le tagofia o le tapa’a.
Ma o lenei pili, e pei ona lipotia e le Samoa News, o le a suia ai tulafono o lo’o iai nei, e fa’asaga i tapa’a, e ala lea i le si’itia o tausaga o le tagata, e faataga ai ona tagofia sikaleti po o le tapa’a, mai i le 18 i le 21. E le gata i lea, ae o le faatulagaina foi o se siitaga i pili o laisene e mafai ai ona faatauina o oloa tau tapa’a, mai i le $25 i le $300, i le tauaga. Faapea ma le faasaina ona toe faatauina o isi ituaiga ‘flavor’ o oloa tau tapa’a, seia vagana ai lava le tapa’a mao’i faapea le ituaiga o le ‘menthol’.
O lo’o aofia i totonu o lenei pili ia ituaiga sikaleti fou ia ua a’e mai nei, faapea ma tapa’a lea e fa’aaoga le paipa e ula ai ma tapa’a lamu.
O so’o se tasi e solia lenei tulafono, o le a mafai ona molia i le vaega ‘A’ o solitulafono mama, e pei ona ta’ua i totonu o le pili taufa’aofi. O fa’asala e aofia ai se sala tupe, e le sili atu ma le $1,000 i le ulua’i moliaga, ae afai ae toe molia faalua, ua si’i le sala tupe i le $2,000, faatolu - $3,500 ma a ova ma le fa’atolu, ua sala i le $5,000.
Na pasia lenei pili i lona faitauga faatolu i totonu o le Senate, ia Mati 2024, i se palota e 13 ioe, 0 leai.
O le masina o Ianuari o lenei tausaga, na fa’aulufale ai e le Maota o Sui ia sa latou foi pili e siitia ai tausaga e faataga ai ona mafai ona faatauina oloa tau tapa’a, mai i le 18 i le 21. Ma e tutusa foi fa’aupuga o su’esu’ega na faia i lenei mataupu, e pei foi ona aofia i totonu o le pili a le Senate lea sa faaulu e Magalei.
E leai se faamaumauga a le Samoa News pe na pasia e le Maota o Sui ia le pili a le Senate, ma faapena foi i le Senate, i le pili a le Mota o Sui, ma pe sa o’o foi lenei pili i le kovana e saini faatulafonoina.
O SE UPU A LE FAIPULE TAMAITAI IA UIFAATALI AMATA I LE FAAMANATUINA O LE ASO O TINA
Laumua i Uosigitone --“Ia faamanuia e le Atua o tatou tinā uma lava! O le alofa o se tinā ua sili ona aoga lea i le lalolagi uma ma ana fanau. ‘E tulai mai lana fanau, ma faafetai ia te ia,’(Faataoto31:28).
Faafetai ona o tausaga e tele o lau tausiga alofa, o au galuega, ma lau tautua i lou aiga. Auā ua tatau lenei ia te outou le ta’u atu i outou tinā ua alofaina ma faapelepeleina i latou, tou te ava foi ma faasili i latou, ona manatunatu lea o nisi o i tatou i se tinā na faatonuina i tatou e ala i ana aoaiga, apoapoaiga ae maise o lana faaa’oa’o.(Faataoto 22:6)
“Ia olioli foi oe i lau fanau faapei o a’u! Faafetai ia te outou taitoatasi i mea uma ua outou fai, ma ia manuia ma fiafia outou i le Aso o Tinā!”
AUAI ASVB I FA’ATASIGA A FAALAPOTOPOTOGA O TURISI A LE PASEFIKA
E to’a luasefulu (20) motu o le Pasefika, na aofia ai ma Amerika Samoa, sa faapea ona potopoto faatasi o latou ofisa turisi, i se faatasiga na faia i Nadi, Fiti, lea na amata mai i le aso 29 o Aperila se’ia o’o mai i le aso 4 o Me, mo le fefa’asoaa’iina o manatu ma polokalama, e atina’eina ai tulaga tau turisi i totonu o motu eseese o le Pasefika.