Pago Pago - AMERIKA SAMOA

ALOAIA VAIASO TURISI 2024

O le vaiaso o Me 19-25, o lo’o faamamaluina ai e le Iunaite Setete ia lea vaiaso, e ta’ua o le Vaiaso o Femalagaiga Faavaomalo ma Vaiaso Turisi 2024.  

Ma ua faapea ona alo atu foi le Ofisa Turisi a Amerika Samoa, mo le faamamaluina o lenei vaiaso taua, i totonu o la latou tautua.

O lenei vaiaso e faamamaluina i tausaga uma lava, talu ona faavaeina mai lenei vaiaso faapitoa i le tausaga e 1983. O le a faapea ona aloaia ma faamamaluina ai le taua o femalagaiga ma lona vaega i totonu o le tuputupu a’e o le tamaoaiga, ae le gata i lea, o lona taua i tulaga tau i galuega mo tagata aemaise o le faatuputupuina o pisinisi i totonu o le atunu’u.

Ua iai se fuafuaga a le ofisa lotoifale a le ASVB e faamanatuina lenei vaiaso ia Setema, e o gatasi ma le Aso Turisi lea o lo’o faamanatuina i le lalolagi atoa.

Ae o lo’o faamamaluina pea e le ASVB ia lenei vaiaso taua, e faapitoa i femalagaiga ma le vaiaso o Turisi.

TOE PASIA LE AOGA MAUALUGA A TAFUNA MO LEISI ONO TAUSAGA

I  se fa’aaliga aloaia mai i le Asosi o Aoga ma Kolisi i Sisifo (WASC), ua fa’ailoa mai ai le pasiaina o le aoga maualuga a Tafuna, i sa latou fonotaga i le amataga o le masina, mo leisi ono tausaga.

Na fa’alauiloa mai e le Taitaifono a le WASC, o Odie J. Douglas, i le tamaitai pule o le aoga maualuga, ia Tutuila Togilau, e tusa ai ma lipoti sa faaulufaleina e le aoga ma isi tulaga uma, na aofia ai ma le asiasiga sa faataunu’uina i le aoga, ua ausia ai e le aoga ia vaega fa’atulagaina mo le toe pasiaina o le aoga.

Ma ua autasi ai le Komisi e toe fa’aopoopoina leisi ono tausaga, lea e faamae’aina ia Iuni 30, 2030, e fa’aauauina ai le tautua a lenei aoga maualuga, i totonu o Amerika Samoa.

AOAOGA A LE LBJ MAI I LE SOSAIETE O LE ‘CRITICAL CARE’ AUA LE TAUSIGA O ALO MA FANAU A LE ATUNU’U

I le galulue so’otau’au a le LBJ ma le Sosaiete o le ‘Critical Care Medicine’ (SCCM), ua o latou tu’ufaatasia ai se tautua faapitoa mo alo ma fanau iti a Amerika Samoa (Peditric Fundamental Critical Care Support-PFCCS), o lo’o taofia i totonu o le maota gasegase autu a le malo i Faga’alu.

O lenei Sosaiete o le SCCM, o se sosaiete pito sili ona tele i faalapotopotoga fa’afoma’i, o lo’o galulue patino i le siitia o tautua i le tausiga o gasegase tuga.  Ma e silia ma le 100 atunu’u o iai lala a le SCCM, ae e na o le pau foi lea o le faalapotopotoga o lo’o aofia uma ai vaega eseesega o tautua i totonu o falemai.

Sa fa’aleoina e le susuga ia Dr. Akapusi Ledua, le faatonusili o le LBJ, lona agaga fiafia i lenei galulue faatasi ma lenei sosaiete, aua le si’itia o tulaga o le tausiga o gasegase i totonu o le falemai i Faga’alu.

Na saunoa le susuga i le faatonusili, o lenei polokalama e o gatasi ma le tautoga a LBJ, aua le fa’aleleia atili o la latou tautua mo le mamalu o le atunu’u.  

Sa fa’aalia foi e se tasi o taitai o le LBJ, ia Dr. Maria Gayapa, le taua tele o lenei polokalama fou ae le gata i lea, o lona agaga fa’afetai i le lagolago ma le fesoasoani mai a le faalapotopotoga a le SCCM.

O le susuga ia Dr. Mike Favazza, o se tasi o foma’i ua iloga lona tomai i galuega fa’afoma’i ma o se tasi foi na galue muamua i le LBJ, o lo’o ta’ita’ia maia le vaega a le SCCM, lea o le a gafa ma a’oa’oga.

Na fa’asoa mai Dr. Favazza i le faigata o le tausiga o alo ma fanau e a’afia i gasegase tuga ma o le a aoga nei aoaoga mo lea tulaga.  O nei aoaoga, sa tu’ufa’atasia e le sosaiete a le SCCM ma e faapitoa lava mo fomai, tausimai ma isi tautua i totonu o le falemai, aua le tausiga o alo ma fanau iti, mai lava i le amataga o a latou gasegase.

Sa saunoa foi Dr. Favazza, o le sini autu o lenei faamoemoega, o le siitia lea o tulaga o le tautua mo fanau iti o lo’o a’afia i gasegase tuga, i totonu o Amerika Samoa, e ala lea i le fa’aau’upegaina o alii ma tamaitai fomai, tausimai ma so’o se tautua i totonu o le falemai, i le tomai ma le taleni e mafai ai ona tali atu i gasegase tuga o le fanau, ma fa’asaoina ai o latou soifua.

Na saunoa Dr. Favazza i le taimi o galue ai i le LBJ, pe a ma le sefulu tausaga ua tuanai, sa ia va’aia le tele o faamanuiaga na maua e le falemai, e le gata i puna’oa ae faapea lana tautua ma i sana taga’i ai i le taimi, o lo’o faapea lava ona alualu i luma.

I le vaiaso ua mavae, e silia ma le 30 tagata faigaluega a le falemai na feagai ma nisi o aoaoga.