Pago Pago - AMERIKA SAMOA

AMATALIA POLOKALAMA A LEOLEO E FAAMALOSIA AI LE FAAMAUINA O FUSIPA’U I TOTONU O TAAVALE

I se fa’aaliga aloaia na sainia e le afioga i le Kovana, Lemanu P. S. Mauga, i le aso 16 o Me, ua fa’alauiloa mai ai le aloaia o Me 20 se’ia o’o atu i le aso 2 o Iuni, 2024 ma vaiaso o le a toe amatalia ai ona faamalosia e leoleo le faamauina o fusipa’u i totonu o ta’avale, ma ua faapea ona lapata’ia mai e le afioga i le Kovana, ia le mamalu o le atunu’u, ina ia fa’amauina fusipa’u taavale i taimi o femalagaiga i luga o le alatele.

O le a faapea ona mataituina e sui malu o le malo, i ia vaiaso, le usitaia o lenei polokalama e pei ona pasia mai e le kovana, ina ia fa’aitiitia ai manu’a tuga faapea ma le maliliu, e le gata o aveta’vale ae faapea foi pasese i totonu o taavale, i taimi e tupu ai fa’alavelave tau ta’avale.

O loo ua galulue so’otau’au nei ia le Ofisa o Leoleo ma vaega fa’asalalau ina ia mafai ona nofo malamalama tagata o le atunu’u i le taua o lenei polokalama.  Ma o se polokalama ua mafai ona faamaonia lona aoga tele, i le u’unaiga o tagata o le atunu’u ina ia fa’amau a latou fusipa’u i totonu o ta’avale, faapea ma le fa’aitiitia o fa’alavelave tau ta’avale, lea e maliliu ai tagata.

I se su’esuega na faia i le tausaga 2023 i totonu o Amerika Samoa, sa fa’alauiloa mai ai le o’o atu i le 84.4% o tagata sa usitaia lenei tulafono ma o le to’atele o tagata na fa’amauina a latou fusipa’u, o aveta’avale.

O le fa’aaogaina o fusipa’u i totonu o ta’avale, o se tulaga o lo’o lagolagoina e tulafono a Amerika Samoa ma ua faapea ona u’una’ia aveta’avale a le teritori, ina ia le gata ina faamauina a latou fusipa’u, ae faapea foi fusipa’u a le ‘au pasese.  Mo fanau e i lalo ifo o le 4 tausaga, e tatau ona iai a latou nofoa faapitoa, ae o fanau iti e i luga ma le 4 tausaga, e tatau ona fa’anofo i nofoa pito i tua o le aveta’avale ma faamauina a latou fusipa’u.

FUAFUAGA MO LE FA’AGOTOINA O LE MV LADY NAOMI

E foliga mai o le a fa’agotoina i le moana, i gatai o Apia, ia le va’a o le MV Lady Naomi, lea sa masani ona femalaga’i i le va o Samoa ma Amerika Samoa faapea le atu Kuki ona o le tele o vaega o le va’a ua fa’aleagaina.

O lenei va’a sa fausia i le 1988 ma i le silia ma le tolusefulu (30) tausaga, o lana tautua, ua faapea ona tele ni vaega o le va’a ua faaleagaina ma ua taugata le toe fa’aleleia.

Ua sui tulaga nei e le MV Lady Naomi 60, lea na amataina lana tautua i le lua tausaga ua tuanai, i le va’a o le a faagotoina.