Ads by Google Ads by Google

TALA I VAIFANUA


O se va’aiga i nai tamaitai lalelei a le Teritori, na tausinio i le po o le aso Faraile mo le tofi o le Tausala o Amerika Samoa 2024-2025, lea ua pale ai nei le tamaitai o Pauliana Angelfromheaven Felise Vitale. [ata foa’i]

Pago Pago - AMERIKA SAMOA

FAAPALEINA LE TAUSALA FOU A AMERIKA SAMOA

O le po o le aso Faraile, Me 31, 2024 na faapaleina ai le Tausala Lalelei fou a Amerika Samoa mo le tausaga 2024-2025, e sui tulaga i le tausala o le 2023-2024, le tamaitai o Judy Tauanu’u.

E to’alima tausala sa tausinio i lea afiafi, ma ua faapaleina ai nei le tamaitai o Pauliana Angelfromheaven Felise-Vitale.  O le tulaga lua sa mauaina lea e le tamaitai o Penicia Hunkin-Pene.  O le tulaga tolu, sa faapaleina ai le tamaitai tauva o Francine Iopu-Masoe.  O le tulaga fa sa faamanuiaina ai le tamaitai o Destiny Lauvao ma le tulaga lima, sa manumalo ai le tamaitai o Jenavee Herrera.

I tulaga o fa’ailoga, sa mauaina e le Tausala fou a Amerika Samoa 2024-2025 ia fa’ailoga o le Laei Fa’asavili (Best Sarong), Siva Samoa, Paluina o le ‘Ava (Ava Ceremony), fa’ailoga o le Taleni sili ona matagofie (Best Talent), faapea ai ma le fa’ailoga mo le vaega o Fesili ma Tali (Best Interview).

O le tamaitai tulaga lua ia Penicia Hunkin-Pene, sa faamanuiaina i fa’ailoga o le; Pito sili ona aulelei i pu’ega ata (Most Photogenic), ma le la’ei togia o le afiafi (Best traditional inspired wear).

Ae o le tamaitai sa ia ausiaina le tulaga tolu, o Francine Iopu-Masoe, sa na ia mauaina ni fa’ailoga se tolu, na aofia ai fa’ailoga a le MASI (MASI award), tamaitai uiga tausa’afia (Miss Personality), ma le vaega o Fesili ma Tali ae e le’i fa’ataunu’uina le tauvaga (PrePageant Interview).

I le vaega o Fesili ma Tali i le po o le aso Faraile, na fesiligia ai le Tausala fou a Amerika Samoa i sona manatu e tusa ai ma le a’afiaga o le siosiomaga ma sana fautuaga ia i latou e le talitonu, o lo’o tulaga faaletonu lo tatou siosiomaga.

Na saunoa le tamaitai o Pauliana Angelfromheaven Felise-Vitale, po o le Tausala fou a Amerika Samoa mo le 2024-2025, e na te aveina so’o se tasi e le talitonu ua tulaga faaletonu lo tatou siosiomaga, e faataga’i i le tulaga o lo’o gata mai ai le sami i le Paka Liona, ma ia faamatalaina ia lea tagata le talitonu, e pe a ma le lima tausaga ua tuanai, sa iai le oneone po o se matafaga i le Paka Liona.  Ae o le taimi, ua o’o mai lava le sami i le mea o iai ma’a.  E ta’u mai iina, ua si’isi’i tulaga o le sami ma ua a’afia ai le siosiomaga.  Ua a’afia le siosiomaga ona suiga i tala o le tau (climate change) ma o se tulaga pagatia lea mo o tatou tagata.

Ua sauni atu nei le Tausala a Amerika Samoa 2025-2026 mo le faatinoina o ona tiute i totonu o le atunu’u, aemaise ai le tauvaga Tausala a le Pasefika lea o le a fa’ataunu’uina i le atu Solomona, ia Fepuari o le tausaga fou.

TULAGA FA’ALETONU TALA O LE TAU I LE FAAIUGA O LE VAIASO

Na molimauina e le mamalu o le atunu’u, le amataina mai i le aso Tofi o le vaiaso ua mavae, ia tulaga fa’aletonu o le tau, e pei ona sa faasalalauina mai e le Ofisa o Tau a le teritori.

E tusa ai ma se fa’aaliga faapitoa mai i i le Matagaluega mo le Puipuiga o le Lotoifale (DHS) ma le ofisa a le TEMCO i le vaiaso ua mavae, sa fa’alauiloa mai ai le amataina o le tulaga faaletonu  ole tala i le tau, i le aso Tofi, Me 30, 2024.

Ma sa ta’ua ai le fa’alauiloa mai e le Ofisa o le Va’ai Tau i Tafuna ia ni lapataiga mo galu maualuluga mo Tutuila ma Manu’a.  E le gata i lea, o galu maualuluga i nisi o taimi ma o le a a’afia ai talafatai i Matu.  Ma o lea lapataiga i galu maualuluga, sa fa’aauau mai se’ia o’o mai i le aso Toonai.

O isi a’afiaga na fa’asalalauina, na aofia ai le malosi ma le a’ave o le ami.  Ma le solo o le gataifale.

E le gata i lea sa faapea ona fa’aauauina lapata’iga mai i le Ofisa o le Vaai Tau, i le mamafa o timuga ma le malolosi o matagi, lea na va’aia le o’o mai lava i le afiafi o le aso Toonai.

Sa faapea foi ona lagonaina le pa pa o faititili.

O le aso ananafi sa molimauina ai le to’a mai o le tau, e ui ina iai ni nai timuga, ma le susulu o le la.

SUIA FAIGA O PEMITA MO GALUEGA I TOTONU O LE TERITORI

Ua iai nei se suiga fou i totonu o le malo o Amerika Samoa, e mafai ona fa’afaigofieina ai le sailiga o pemita mo galuega a aiga ma pisinisi, lea sa masani ona alu aso ma masina o fa’ata’amilo.

Ua filifilia nei e le faigamalo a Amerika Samoa ia se vaega e ta’ua o le ‘OpenGov’, e mafai ona fa’afaigofie ai le faia o pemita o galuega a aiga ma pisinisi.  O lenei faiga fou, o le a le toe tau faatumu ai ni pepa pe asiasi atu i le tele o ofisa a le malo, e pei ona masani ai, mo le totogia o pili ma le fa’asaini mai o tagata faigaluega i ofisa a le malo.

I lenei suiga fou (OpenGov Permitting & Licensing) o le a faatino uma lava i luga o le initeneti, e o’o lava i le totogia o pili e pei ona mana’omia.

O lenei polokalama o lo’o fa’aaogaina foi i isi malo ma atunuu.

O le amataga o le masina o Me, sa fa’aalia ai e le faatonusili o le Matagaluega o Puna’oa o le Gataifale ma le Vaomatua, le susuga ia Taotasi Archie Soliai, ona o le a’afiaga o le siosiomaga, i nisi o galuega o lo’o fa’ataunuuina i Malaeimi ma Nu’uuli.  Ma o se tasi nei o tulaga sa faaleoina e le susuga i le faatonusili i lana tusi sa auina atu i le faatonusili o le Matagaluega o Fefa’atauaiga, ona o nisi o nei galuega, e le o iai ni pemita e faataga ai le faataunu’uina.

Sa ta’ua e Taotasi i lana tusi, le taua o le taulimaina o se pemita e faia ai galuega i totonu o fanua, ina ia mafai ona faamautuina ai le o gatasia o le galuega ma tulaga o le tulafono.

O se tasi o tulaga na patino iai le atugaluga a le susuga i le faatonusili, ona o le le manino o le a’afiaga o puna’oa o le gatafaile ma ola o meaola ma figota o le sami, i nei galuega.