Pago Pago - AMERIKA SAMOA

AVEA SE TAMAITAI SAMOA MA ULUA’I FITAFITA UA FAATAGA ONA TA LONA TAULIMA

O le tama’ita’i Samoa, o se ta’ita’i ‘au i totonu o le vaega’au o le Ami, a le Malo Tele, o Capt. Isis Sake, e 38 tausaga o lona soifua, ua avea ma ulua’i fitafita ua fa’atagaina ona ta sona taulima i ona lima.  

Ma ua le gata ina avea lenei taulima ma fa’amanatu o lana Tu ma Aganu’u faaSamoa ae ua faapea foi ona avea ma faamanatu i le taliaina e le Ami o lana aganu’u.

Sa ta’ua e Sake e faapea, o le to’atele o ta’ita’i sinia sa le i nofo silafia, e le o fa’atagaina le taina o le taulima a fitafita, lea o lo’o ta’ua e Sake, o se vaega tele lea o le tu ma aganu’u faaSamoa.  Ae o lea ua mafai ona ia fa’asoaina atu le taua o lenei galuega taulima faapea ai ma ona uiga.

O le masina o Fepuari, sa avea ai lenei ta’ita’i ‘au Samoa ma ulua’i fitafita i totonu o le Ami, e mafai ai ona ta lona taulima.  O Sake, e malaga mai i Apia, Samoa ma sa faamautu lona aiga i Amerika a’o laititi o ia.  Sa mulimuli atu lenei tamaitai i tulagavae a ona uso matutua, ina ua ulufale i totonu o le Ami i le 2008.

O lo’o ua la’ei foi o ia i le la’ei a tamaitai Samoa, po o le malu, talu mai le 2017.

FA’AFEFE E SE ALII LANA UO TEINE I SE AGAESE

O lo’o ua lokaina nei ia se alii e 30 tausaga i Honolulu, Hawaii, ina ua na ia fa’afefeina sana uo tamaitai, i se agaese.  O le aso Gafua o le vaiaso ua mavae, sa ave faapagotaina ai e leoleo Honolulu ia lenei alii i Wahiawa.

O lo’o ua molia nei o ia i sauaga fa’aterorisi.

TALIMALO LE ASOSI TENISI A AMERIKA SAMOA I ‘AU TENISI O LE PASEFIKA

A iai sou avanoa, ona e asiasi atu lea i le paka Liona, e maimoa i ta’aloga faavaomalo o le tenisi o lo’o fa’ataunu’uina ai, lea e amataina i le aso nei, Iuni 5, 2024 se’ia o’o atu i le aso 10 o le vaiaso fou.

E lata i le to’a 60 alii ma tamaitai ta’a’alo ua aofia potopoto mai i motu o le Pasefika e 11 aua nei fa’agatama, o lo’o talimalo ai le susuga ia 

SU’EGA ULUFALE MO LE KOLISI TU’UFA’ATASI A AMERIKA SAMOA

I se fa’aaliga mai i le Kolisi Tu’ufa’atasi a Amerika Samoa, ua fa’alauiloa mai ai le fa’ataunu’uina o le su’ega ulufale ‘le fa’atulagaina’ (unscheduled) i le aso a taeao, Iuni 6, 2024, mai i le 8 i le taeao se’ia pa’ia le 1 i le aoauli.

Ta’ua i le fa’aaliga a le Kolisi, e tasi lava le suega e tatala ai le avanoa i alo ma fanau e fia a’o’oga i vasega o le Summer 2024 amataina ia Iuni 17, 2024.

Mo nisi fa’amatalaga e tusa ai ma lenei su’ega, e mafai ona valaau i le Kolisi i le 699-2722.