Pago Pago - AMERIKA SAMOA

FA’AMATU’U MAI SE VAEGATUPE E $7.2 MILIONA MAI I LE ASEPA MO AMERIKA SAMOA

O le vaiaso nei sa pasia ai e le Faigamalo a Biden-Harris se tulafono e fa’amautu ai le iai o vai taumafa mama e ala lea i le ta’i 10 tausaga ma sui paipa u’amea o lo’o ta’i ai vai taumafa.  E le gata  lea, ua fa’amatu’u mai e le EPA ia se vaegatupe e $7,181,000 mo le faatupeina o galuega ina ia mafai ai ona faatinoina lea tulaga, i totonu o Amerika Samoa.

E tusa ai ma le saunoaga a le ta’ita’i o le EPA mo le Pasefika ma setete i Saute i Sisifo, ia Martha Guzman sa ia fa’aalia ai le tatau ona tofutofusia tagata uma o Amerika ma suavai taumafa e le a’afia i le ‘ele ma isi tulaga faapena, ma o lo’o taumafai fesoasoani Amerika Samoa i le Pule’aga o Suavai ma Eletise a le teritori, ina ia sailiili ma fofoina fa’afitauli ina ia sui ese laina vai o lo’o ono a’afia i le ‘ele.

TO’ALUA NI SUI TALAVOU A AMERIKA SAMOA I TA’ALOGA A LE ‘OCEANIA’

E to’alua ni fanau talavou a Amerika Samoa ua faapea ona faimalaga atu i Hong Kong, i le ‘au Tenisi a le Pasefika Oceania, i taamilosaga a ‘au tenisi 12 tausaga aga’i lalo.

Na filifilia ia Joella Ioane ma Hermann Thomsen e avea ma sui o le Pasefika Oceania i se ‘au e to’aono ana tagata ta’a’alo.  O leisi to’afa e aofia ai Faith Perera ma JJ Camelo mai i Guam, o Mareko Webb mai i le atu Kuki faapea ma Alex Chand mai Fiti.

O faiaoga o le ‘au a le Pasefika Oceania, o Ryan Horn mai Guam ma Florence Wasko, le peresetene o le Asosi Tenisi a Amerika Samoa.

O nei ta’aloga sa amata i le aso Gafua na se’i mavae atu, ma o lo’o fa’afoeina e le Asosi Tenisi a Hong Kong Saina i lalo o le fa’amalumaluga a le Faalapotopotoga Tenisi a Saina.

MAUA LE TINO MALIU O SE ‘ALU’ALUTOTO NA MALEMO I FALEFA, SAMOA

O le aso ananafi na maua ai e leoleo ia le tino maliu o se ‘alu’alutoto e fa (4) tausaga mai i Falefa i Samoa, ua lua aso o tau saili ina ua malemo i afu.

Sa fa’amaonia e leoleo le mauaina o le tino maliu o Apa Taufoe e ni tagata maulu, i le taeao o le aso ananafi (aso Faraile i Samoa).

Sa faamatalaina e le tua’a o si nei alii atalii, le susuga ia Taufoe Faitoto’a le matuitui ma le o’ona o lenei tulaga ua o’o iai lo latou aiga.  Ma sa ia faapea mai foi i le Samoa Observer, e le’i toe manogi se mea’ai talu ona malemo si ona atalii.

Na taumafai uso laiti o Apa (2 tausaga ma le 1 tausaga), e lavea’i mai si o la tei matua ina ua tupu le fa’alavelave, ae peitai, sa le’i fa’amanuiaina a la taumafaiga.

Ae na fa’aleoina e le tama ia Taufoe lona agaga fa’afetai ina ua mafai ona fa’asaoina mai nai ona alo laiti, a’o la taumafai e su’e ma lavea’i si o la tei matua, semanu e maliliu uma i latou.

O Apa, o le lona lua o se fanau e to’afa ma e pei ona faamatalaina e si ona tama loto mafatia, o Apa sa gafa ma le va’aia o lona uso ma lona tuafafine laititi.

Sa fa’aalia e le susuga ia Taufoe le mafatiaga o feagai nei ma lo latou aiga i le to’esea o Apa, aemaise ai le Lotu Tamaiti i le faaiuga o le vaiaso nei.