Pago Pago - AEMRIKA SAMOA

O’O MAI LE VALA’AU PA’IA A LE ATUA I SE TASI O TINA TAUTUA MALOSI 

O le aso Tofi o le vaiaso ua mavae, na o’o mai ai le vala’au pa’ia a le Atua i le tina ia Pauline Young, i le 99 tausaga o lona soifua, mai i le afioaga o Nu’uuli.

O lenei tina ua afu lana tautua i totonu o Amerika Samoa, e pei o lana auaunaga le totogia mo le Faalapotopotoga a Fafine a le LBJ, faapea ai ma le Sosaiete a le Sacred Hearts i Fatuoaiga.  

O Young, o se tasi foi na fesoasoani malosi i le faatauina o le fasi fanua lea na amata mai ai le ekalesia Katoliko i Tafuna, lea ua ta’ua nei o le Fatuoaiga.

E o’o mai le vala’au a le Atua, o lo’o faia pea e Young lana auaunaga le totogia mo le ‘Hope House’.  O ia foi o se tasi o totino o le Ekalesia Katoliko i Fatuoaiga.

E manatuaina lava lenei tina e lana kalapu o le 50+, o se tina e laufofoga fiafia i taimi uma.

Ma e manatuaina pea foi lana tautua i totonu o le Komiti e gafa ma le faamamaina o so’o se vaega o Amerika Samoa faapea ai ma le avea o ia ma totino o le kalapu ta polo (Lavalava Golf Club), lea sa ia umia ai le fa’ailoga o se totino pito sili ona leva i totonu o lea faalapotopotoga.

O le taimi mulimuli lava na auai ai i lenei tina i taamilosaga ta polo, o le taimi o lo’o 90 tausaga o lona soifua, ma sa faia ia ta’aloga i Hawaii.

O gaioiga sa fiafia ai tele lenei tina, na aofia ai le fa’agatama o le fa’ata’avale polo (bowling), o le galue i lana togala’au, su’isu’i, fa’atauina atu o ana galuega taulima ma le malaga atu i atunu’u i fafo.

O Young na soifua mai i Apia Samoa, ma o ia o se tasi o alo, e to’a 16, e faasino ia Kalolo ma Louisa Bartley.

Na feiloai atu lenei tina i lana manamea, o Richard Young, i lona talavou, a’o galue i Pago Pago ma o le aso 5 o Tesema 1942, sa avea ai i la’ua ma tino e tasi, i le faaipoipoga.

E to’afitu sa la’ua fanau, Margaret (Leo Prange), Richard Jr (Pamela), Fred (Gayle), Louisa (Jayson Borgen), Kenan (Nyla), Jeffrey (Kris), and Peter (Sandra).  Ae to’a sefulu ma le valu (18) fanau a fanau:  Angela, Charles & Gabriel Prange; Richard III & Christopher; Bartley & Alisa; Brianna & Ryan Borgen; Alexander; Mitchell, Keana & Matthew; Brandon, Tiffany, Leolemau, Pikasone & Likaki.

Ae to’a 14 fanau o fanau, a fanau, ma fanau o fanau o fanau a fanau, e to’aiva.

O le 1967 na toe taliu mai ai Richard ma Pauline i le atoa ai lena o le 21 tausaga o feoa’i i tiute faalemiliteri.

E ui i le agaga faanoanoa o lenei aiga, ona ua le mafai ona o latou faamanatuina le 100 tausaga a le tina ae peitai, sa o latou fa’aalia lo latou agaga fa’afetai ua mafai ona umi se latou mafutaga.

O le aso 22 o Novema, 2024 o le a faataunu’uina ai se sauniga mo le faamanatuina o le soifua o lenei tina.

E momoli atu fa’amaisega a le Samoa News/Le Lali i le aiga a Pauline Young.

FUGA TOLANI TELESO

O le fa’ai’uga o le masina o Oketopa, i le 92 tausaga o lona soifua, sa fa’amanavaina ai e le Atua ia galuega a le tama matua, le afioga ia Fuga Tolani Teleso, i le setete o Arizona i Amerika.

O le afioga Fuga o se tasi na fesoasoani malosi i le tusiaina o le ata ma le fausiaina o le malae ta polo i Iliili faapea ai ma le ‘Veterans Memorial Stadium’.

O lenei tama matua sa loloto lona tomai i lenei fa’agatama o le ta polo (golf).  Ma ina ua mae’a ona litaea mai i le militeri, i le 1972, sa talosagaina o ia e le malo o Amerika Samoa ina ia fesoasoani i le fausiaina o le malae ta polo, lea ua iai nei i Iliili.

Sa mafai ona fausiaina e Fuga ia le malae ta polo faatasi ai ma nisi sa galulue e aunoa ma ni totogi, faapea ma foa’i mai i pisinisi ma tagata ta polo lotoifale.  Sa ia faatauina foi le fanua lea e soso’o atu i le malae ta polo ma amataina ai sana pisinisi lea e faatauina ai tulaga uma e mana’omia mo lenei ta’aloga.

O le to’atele o tagata o le atunu’u e fiafia i lenei fa’agatama, sa o latou a’o’a’oina mai ia Fuga.

O le ogatotonu o le ’90 sa fausiaina ai e Fuga ia le Veterans Memorial Stadiu, e sauniuni atu ai mo le talimalo a Amerika Samoa, i ta’aloga o le Pasefika, i le 1996.  

Ae i le 1999 sa toe talosagaina ai e le malo o Amerika Samoa ia lana fesoasoani i le fausiaina o le malae ta polo, i Faleata.  Ma o le taimi lava lea e tasi, na aveina ai o ia e ni tagata faipisinisi i Asau, e va’ava’ai pe ono mafai ona fausia se malae ta polo i le motu tele i Salafai.

O le tau faaiuga o le ’70 na faatauina ai e Fuga ia le Samoa News mai ia Jake King, lea na ia toe fa’atauina atu ia Lewis Wolman, i se taimi mulimuli ane.

O le 1974 sa fa’afotutupu ai lona suafa matai o Fuga mai i lona aiga i Pago Pago.  E tele nisi galuega lotoifale sa faapea ona galue ai le afioga Fuga, a’o fa’aauau pea lana tautua mo le atunu’u.

E momoli atu fa’amaisega a le Samoa News/Le Lali i le fanau faapea le aiga o le afioga Fuga.