Pago Pago - AMERIKA SAMOA

TAUNU’U MASINI FALETUPE I MANU’A

O se tala fiafia mo aiga i Ofu ma Olosega, i Manu’a, ina ua mafai ona fa’ao’oina atu iai e le Faletupe a le Teritori (TBAS) ia se masini tupe (ATM) i le malae vaalele i Ofu.  Lea ua mafai ai ona faafaigofie ai ona toina mai i fafo tupe a tagata, i so’o se taimi.

O le ulua’i masini ATM lea i lea nofoaga ma ua fa’afaigofie ai ona mauaina tupe a tagata e faatino ai a latou tiute fai o le aso, e aofia ai ma taimi o faalavelave faafuasei, e aunoa ma le toe tau o atu i isi motu o Manu’a.

E pei ona sa saunoa le Peresetene ma le Pulesili o le TBAS, ua fa’amautuina i le iai o se ATM i Ofu, le tuuto a le TBAS i la latou auaunaga mo tagata uma, e tusa lava po o fea o faamautu ai.

FA’AMAVAE ATU LE AMEPASA O AMERIKA IA SAMOA

I le lamalama faai’u ai o le faigamalo a Biden, ua faapea ona faamavae atu le Amepasa a Amerika, le susuga ia Tom Udall, i le malo o Samoa, e ala i sana toe asiasi mai i le faaiuga o le masina.

O lo’o fa’atalitali nei Samoa mo le filifiliga a le faigamalo fou ma ua faailoga fesili ai foi le filifilia o se to’atasi e avea ma amepasa mo na’o Samoa lava, e tusa ai ma se ripoti a le Samoa Oberver.

E tusa ai ma se ripoti mai i le Ofisa a le Amepasa a le malo tele, sa tulaga lelei le auaunaga a Udall ma lona au ofisa, ua faapea ona fa’aleleia atili ai le va o le Iunaite Setete ma Samoa.

Na amataina mai le auaunaga a Udall ia Fepuari 2022, i le taimi o vevesi ai le lalolagi ona o le faama’i o le Koviti 19.  Ma i lana malaga fa’amavae, sa ia toe feiloai atu ai i le afioga i le Palemia o Samoa, Fiame Naomi Mataafa, faapea le Ao o le Malo, le afioga Tuimalealiifano Vaaletoa Sualauvi II ma le Masiofo ia Faamausili Leinafo Tuimalealiifano.

POLOKALAMA I FITI E TOE FA’AAOGAINA AI OLOA GAOSI I LE UGA

Ua amataina nei se polokalama fou a le malo o Fiti, mo le aoina ma le toe fa’aaogaina o uga vaivai, e gaosia ai nisi oloa.

O lenei polokalama ua fa’aigoaina o le ANPAC (Australian, New Zealand and Pacific Islands Plastics Pact) ma o lo’o tau atia’e i le taimi nei.

U’UNA’IA TAMAITAI MA TINA PAPUA NIU KINI E ULUFALE I TOTONU O VAEGA’AU

Ua to’atele nisi o tamaitai ma tina o Papua Niu Kini, o lo’o faapea ona u’una’ia ina ia ulufale atu i totonu o vaega’au a le malo.

I se fonotaga sa faataunu’uina, na fa’aleoina ai e le taitai ‘au ia Major Grace Kitoneka, le na’o le 4% o totino o vaega’au, o tina ma tamaitai.

O lona uiga, e na’o le to’a 150 tina ma tamaitai o lo’o i totonu o se vaega’au e to’a 3,000.  Ma na u’una’ia e Kitoneka ia tina ma tamaitai ina ia avea ma totino o vaega’au a le malo.