Pago Pago - AMERIKA SAMOA

MALIU FAI FALEAITU LAUILOA IA PETELO

O le aso Lua na se’i mavae atu nei, Tesema 31, 2024, na fa’amanavaina ai e le Atua galuega a le fai faleaitu ta’uta’ua o Samoa, le susuga ia Taavaomaalii Petelo Asomua, po o ‘Petelo’ e pei ona lauiloa ai o ia i tagata Samoa o lo’o aumau i so’o se tulimanu o le kelope.

O le susuga ia Petelo, sa lauiloa i le fai tala malie e uiga i so’o se vaega o le olaga, ma sa ia fa’aaogaina foi lenei taleni taua ma auala e fa’alauiloa mai ai ni isi o mataupu taua e a’afia ai ola ma soifua o tagata.

I le fa’atumutumuga o lana taleni, sa tele ina saili e ekalesia ma afioaga, faapea faalapotopotoga, ia le susuga ia Petelo, aua sailiga tupe mo le fausiaina o falesa ma fale a’oga.

I totonu o Amerika Samoa sa masani ona tauala atu nisi o fa’alauiloa taua a le Ofisa o le Soifua Maloloina i lenei taleni.  Mo se fa’ataitaiga, o le taumafaiga ina ia taofia le tagofia o tapa’a, o le fa’alauiloaina o le taua o le faia vave o su’esu’ega i le kanesa o le susu, ma isi lava mataupu faapena.

O isi faleaitu lauiloa a Petelo, sa faapea ona talanoaina ai tulaga i totonu o aiga, aemaise i le va nofo fealofani o aiga.

Ua toatele tagata Samoa na fa’aalia lo latou agaga fa’anoanoa aemaise o fa’amaisega i luga o upega tafa’ilagi, i le to’esea o lenei tama ta’uta’ua o le atunu’u.

FAASA ONA TOE FAATAU PE FA’AAOGAINA IPU PEPA (POLYSTYRENE FOAM) 

O le tulafono lautele #38-12 lea o lo’o fa’asa ona toe fa’aaogaina ai ipu pepa o lo’o gaosia i le ‘polystyrene foam’, sa sainia e avea ma tulafono e le afioga i le Kovana Lemanu P.S. Mauga ia Me 7, 2024.

Ae peitai, ona o le tele o a’afiaga i le pasiaina o lenei tulafono, o lea na tonu ai e le Matagaluega e Puipuia le Siosiomaga, o le a fesoasoani i le tele o pisinisi lotoifale i lenei suiga fou, e ala i le toe tolopoina o le aso e amata faamalosia ai lenei tulafono, ia Ianuari 1, 2025.

Ma o le aso Lua na se’i mavae atu nei, Tesema 31, 2024, sa faamutaina ai ona toe fa’atauina atu ipu pepa o lo’o gaosia i le ‘polystyrene foam’.

Ma o lea ua amata ona mataituina e le Ofisa o Tiute faapea le Matagaluega mo le Puipuiga o le Gataifale ia le le toe fa’atauina atu, po o le okaina mai foi i totonu o le teritori, o nei oloa.

TALOSAGA MEDICAID IA AOFIA AI AUAUNAGA MO NIFO A LE FANAU MA ‘HOPE DIALYSIS’

O lo’o ua galulue faatasi nei ia le Ofisa a le Medicaid a Amerika Samoa ma le auaunaga a le CHIP, ina ia mafai ona faaopoopo ia le totogia o le faia o nifo a le fanau (braces) faapea ma talavai faamama toto a le ‘Hope Dialysis’, i la latou auaunaga.

O lo’o iai se faamoemoega o le a taliaina lenei talosaga ma amata ona totogia nei talavai mo fanau ma gasegase faamama toto a le Hope, e amata mai ia Oketopa 1, 2024.

Na saunoa le Faatonusili a le Medicaid, ia Sandra King Young, i le si’itia ai o le tupe lotoifale mo le tausaga tupe 2025, o se fiafiaga ia i latou, le faaopoopoina o nei tautua fou i le polokalama a le Medicaid.  

Sa ia ta’ua, o le latou faamoemoega na iai, o le fesoasoani lea i manaoga o fanau (21 tausaga agai i lalo), ina ia mafai ona o latou maua lenei auaunaga fomai nifo, aua o se auaunaga manaomia tele mo i latou.  Ma o lo’o iai se faamoemoega o le a mafai ona aofia ai ma nifo faapipi’i i lenei auaunaga, i se taimi o i luma.

O le taimi nei, e na o le tasi lava le fale fa’i nifo tuto’atasi i totonu o le teritori, o le Island Smiles, mo le polokalama a le Medicaid.

E le o avanoa i le taimi nei, o se vaega o le polokalama ‘off-island referral’ ia auaunaga a foma’i nifo.