Pago Pago - AMERIKA SAMOA

TOE FA'ATAUTOINA AMATA E FA'AAUAU LANA AUAUNAGA I TOTONU O AMERIKA SAMOA

O le aso Faraile o le vaiaso ua mavae, Ianuari 3, 2025, sa toe fa'atautoina ai le afioga Uifaatali Amata, e avea ma sui Faipule o le teritori o Amerika Samoa, i totonu o le Maota o Sui a le Iunaite Setete, ma ua atoa ai le ono tausaga o lana tautua mo Amerika Samoa, i totonu o le Konekeresi.

Sa fa'aleoina e Uifaatali lona agaga fa'afetai, ona o lenei avanoa ua na ia maua, e mafai ona fa'aauauina ai lana auaunaga mo le teritori i totonu o le Laumua i Uasigitone.  Sa saunoa le afioga i sui Faipule, e pei ona masani ai, o le a fai ma malaga mai i le teritori ina ia mafai ona ia lagonaina manaoga a le atunu'u.  Ma e ui i lona fiafia e galulue faatasi ma taitai o le latou foi itu, ae o le a ia galue so'otau'au ma isi sui faitulafono, i le sailiga ma le lagolagoina o pili e aoga mo le atunu'u, e pei ona ia faia talu ona filifilia o ia i le 2014.

Sa le gata ia Uifaatali ae na faapea foi ona faatautoina uma ai isi sui faitulafono mo le Nofoaiga lona 119 a le Konekeresi, i le aso Faraile ua mavae.  Ma sa mafai ona auai atu ai nisi o lona aiga i le ulua'i aso o le tatalaga o le Fono Faitulafono, lea na aofia ai ma le palotaina o le Fofoga Fetalai a le Maota o Sui.

TALOSAGA A SE SUI FAIPULE I TOTONU O LE MAOTA O SUI E UIGA I SE FAAFITAULI O LO'O FEAGAI MA TERITORI

A'o feagai ai le Maota o Sui a le Iunaite Setete ma le palotaina o sa latou Fofoga Fetalai fou, i le aso Faraile o le vaiaso ua mavae, sa faapea ona tula'i le tamaitai Faipule mai i se tasi o teritori a le Iunaite Setete, o Stacey Plaskett, le sui mai i le US Virgin Islands, ma ia faaleoina se faafitauli o lo'o fa'aauau pea ona tupu e faatatau i teritori a le Iunaite Setete.

Sa saunoa Plaskett, o lo'o iai se faafitauli o feagai ma teritori ma kolone i totonu o le malo o Amerika.  Ma o se faafitauli ua avea ma faafitauli tumau ma ua tatau ona faia iai se fuafuaga.  A'o saunoa Plaskett, na toatele nisi sa faalia lo latou le fiafia i lana tautalaga ma i'u ai lava ina tapeina lana masini faaleotele leo.

Ae ina ua toe ola mai le masini, sa maua atu ai le faaiuga o lana saunoaga e faapea, "E iai so'u leo!"

Sa toatele nisi o sui o le itu Temokarasi sa o latou patipatia le saunoaga a Plaskett - ma o le a'ano o lana tautalaga, o lona fesiligia lea o le mafuaaga e le o mafai ai ona auai sui Faipule o teritori, e aofia ai Amerika Samoa, Guam, le atu Mariana, Puerto Rico ma D.C., i le tauvala'auga mo le filifiliga o se Fofoga Fetalai, ae o lo'o avea i latou ma sui o le faitau miliona o tagata.

E na o faipule mai totonu o setete o Amerika, o lo'o mafai ona palota.

LAPATAIGA MAI LE OFISA O LE SOIFUA MALOLOINA

I se fa'aaliga mai i le Ofisa o le Soifua Maloloina, ua faapea ona lapata'iina ai le mamalu o le atunu'u, ona ua molimauina le to'atele o nisi o le atunu'u ua a'afia i gasegase e aia auga, e pei o le Koviti-19, RSV ma le Influenza.

Ma ua lapata'ia ai e le Ofisa o le Soifua Maloloina ia le mamalu lautele ina ia fufulu mama lima i fasimoli ma le vai, pe a ma le 20 sekone, i taimi uma.  Ufiufi foliga aemaise gutu, i taimi e mafatua pe tale ai.  A mafai, ia fa'aaogaina ufi fofoga ina ia fa'aitiitia ai le pipisi o le fa'ama'i.

Ia fa'amama ia vaega uma i totonu o le fale ma ofisa, e ala i le fa'aaogaina o 'spray' e tineia ai le koviti-19.

Nofo i le fale ma taumafai e alo'ese mai i faapotopotoga tetele, pe fai se va ma isi tagata, i nofoaga lautele.

Tatala faamalama ina ia mafai ona fa'asavili totonu o maota ma laoa.

Ua fautuaina foi le faia o tui puipuia aemaise lava mo fanau iti.

O le 633-5871 le fuainumera e mafai ona faafeso'ota'i mo nisi faamatalaga po o le 219.