Pago Pago - AMERIKA SAMOA

TAPUNIA OFISA FETERALE I LE ASO TOFI O SE FA'AALOALO MO LE TU'UMALO O PERESETENE CARTER

I se fa'aaliga aloaia mai i le Peresetene o Amerika o Joe Biden, ua fa'alauiloa mai ai le tapunia aloaia o Ofisa Feterale faapea ma le sisiina faavaeloto o tagavai a le Iunaite Setete, e fa'aalia ai le agaga fa'aaloalo ma le faamaisega, i le tu'umalo o Jimmy Carter, lea na avea ma Peresetene o le Iunaite Setete, ina ua maliu i lona aiga i le faaiuga o le masina o Tesema 2024, i lona aiga i Plains, Georgia, i le atoa ai o le 100 tausaga o lona olaga.

E tusa ai ma le fa'aaliga aloaia mai i le alii Peresetene, ua fa'alauiloa mai ai le malolo uma o tagata faigaluega feterale seia vagana ai i latou o lo'o manaomia a latou auaunaga, aua le puipuiga o le saogalemu o le atunu'u, vaega'au faapea isi ofisa ma'oti.

LAPATAIGA MO TAFEGA MA LOLOGA I LE AFIAFI ANANAFI

Sa fa'aauau mai i le aoauli ananafi ona fa'alauiloa mai e le Ofisa Vaai Tau i Tafuna, ia lapataiga mo Tafega ma Lologa mo le Rose Atoll i Manu'a.

E tusa ai ma fa'aupuga o le fa'aaliga taua mai i le Matagaluega o le Puipuiga o le Lotoifale (Homeland Security) ma le ofisa a le TEMCO i le aoauli ananafi, ua mafua lea lapataiga, ona o le mamafa o timuga o lo'o i luga pe lata foi i le atunu'u.

"E faatupula'ia lologa ma tafega i alavai, auvai, aualatele ma nofoaga maualalo.  E ono tapunia auala e faafaigata ona faafoe ai lau taavale.  E mafai foi ona solo 'ele'ele mai i mauga ma nofoaga mapu'epu'e.  Aua ne'i savalia pe uia auala ua malolosi tafega ma lologa," e pei ona ta'ua i le fa'aaliga fa'alauaitele i le aoauli ananafi.

Ma o le 6:00 i le po anapo sa faamutaina ai lea lapataiga. 

AUSIA E JOELLA IOANE PINE SILIVA I TAAMILOSAGA TENISI MO TAMAITAI LALO 12 TAUSAGA 

O le tamaitai o Joella Ioane, se alo e faasino i le susuga ia Joe Ioane ma le faletua ia Leuila, ua na ia ausiaina le pine siliva i le ta'amilosaga o Tenisi mo tamaitai i lalo o le 12 tausaga le matutua, lea sa faia i Arbury, i Ausetalia.

O Joella sa avea ma sui o Amerika Samoa i lea tauvaga ma sa ia ta'ua e faapea, o lona ausiaina o lenei fa'ailoga, o se miti ua tino mai.  Sa ia fa'aalia lona agaga fiafia i lona auai atu i lenei tauvaga ma o se tulaga na moemiti ai talu ona manumalo mai ai lona uso, i lea lava tauvaga e tasi, i le tausaga ua mavae.

Na fa'aalia foi e Joella lona agaga fa'afetai i lona aiga ma uo mai Amerika Samoa ma lagolagoina ana taumafaiga.  Ae le gata i lea, o le aiga o Leota Lu i Melbourne, sa faapea ona lagolago malosi i ana ta'aloga.  

Sa fa'aalia e le faiaoga a lenei tamaitai, o Coach Neel ia lona agaga fa'afetai ia Joella i lona agaga tauivi lea ua fa'aeaea ai le atunu'u ma lona aiga.  Sa ia ta'ua le tele o se suiga i fanau ta'a'alo mai totonu o le Pasefika, i a latou ta'aloga ma isi 'au ta'a'alo mai i Ausetalia.  E le gata i lea, o faiaoga ma i latou uma o lo'o fa'aaluina o latou taimi ma taleni, e a'oa'oina ai ma le atina'eina o taleni a fanau talavou o le atunu'u.