Pago Pago - AMERIKA SAMOA

Ona o lo ua alofaiva le tamaitai o Tisa Faamuli ma le Tisa’s Barefoot Bar, mo le fa’aaliga lona 17 o Tatau ma Malu a so’o se tasi i totonu o le atunuu, ua saili ai fo’i o ia i nisi fa’asoa aoga tele e mafai ona ia fa’amauina, ae le tupulaga o le lumana’i lea o le atunuu, latou ‘oa ma latou measina, e ao fo’i ina fa’aauau i le soifuaga o le tagata Samoa Moni.

Ona o le tamaitai Faipule o Fofo, Faipule Tereise Andra Samoa, o se tasi ua fai fo’i si loa o la’eia le Malu a Tama’ita’i Samoa, lona lua o se tasi ua iloga lona agaga i lona afio’aga ma lona nuu sa soifua ae ai, ae maise o se tama’ita’i e taua ia te ia lana aganuu, gagana ma ona tagata, ae maise fo’i lona aiga, o lea sa vala’auina fa’apitoa ai mo sana folasaga.

“E leai lava se isi mea e sili atu nai lo lou la’eia o le la’ei Samoa moni, tautua i lou aiga ma le afio’aga, fa’aopoopo atu i ai lou tautua i le Atua e ala i lau Ekalesia ma taumafai e ola ai i se olaga fa’amaoni ma usita’i, tautua ai lea i lou malo i faiva ua e agavaa ai, ae aua ne’i galo ia te oe, ona e galue i le eleele, o le fatu lea o aiga Samoa uma, o lou fa’asinomaga fo’i lea.” O se amataga lea o fetufaa’iga i le va o nei tamaitai iloga o le atunuu, Tisa  Fa’amuli o le Tisa’s Tattoo Festival i Alega ma le Faipule mai Fofo Tereise Andra Samoa.

“I le ola mai e le fa’apea e i ai se mea na misi, o le sasa ma le fa’atonu e le ‘alo a le tina, e leai se tali upu e faia, aua e tigaina atili ai. A vala’au atu e sau, e sili atu ona la’ititi le sasa pe a usita’i, e ui ina faia ma loimata, nai lo le tamo’e, ae folo atu ai le ma’a poo se isi lava mea e tau muamua atu ai lima o le tina.” O se tala ata lea a le faipule.

“Masalo e to’atele faipule lae i le Maota o Sui e le’i ui mai i ala faigata ia. Ae aisea ea ua ea ai le pologa sa fai mai? Ou te iloa o fa’amanuiaga e toto fatu i le loto, ia aoga e toe faafoi se tautua mo tagata lautele o lou nuu ma aiga, ae maise o le Malo lea e ao ina tofu sao i ai ina ia manuia.” O sana toe talanoa fa’aauau pea.

O le ataata ma le talitali ioe a le tamaitai faipisinisi ua lagalaga mea lelei ina ia toe fa’aolaola pea measina a Samoa, Tisa Fa’amuli sa iloga ai e tutusa lava ala sa uia mai a’o talavou ma laiti o tau fafau mai olaga e matua.

Na fesiligia i se mafuaaga sa taina ai le Malu a Tama’ita’i, ae o le tali lenei a le tamaitai faipule. “O le tausaga e 1988 na oo ai lo’u olaga i se mea sili ona faigata, ina ua tala upu tamau o le feagaiga o la’u ulua’i fa’aipoipoga, sa ou nofo ma taumanatu i se ala e mafai ai ona ou manatuaina sa ou uia lea ala faigata, ma ia mautu lava i lo’u loto se aoaoga ua ou maua mai ai.”

Na ou manatua le la’ei o lo’u tina matua, ona so’o mai lea i le uso matua lava o lo’u tina, e le’i la’eia e lo’u tina, ae sa ou manatu, “O se mea lea ou te faia ina ia soloa’i ai lo’u tino ma lo’u loto, e tautua i lo’u aiga pele ma lo’u nuu, toe fa’amau ai ma lo’u malosi’aga sili, ou te mafaia ona tatali le tiga o le au.”

“Ua oo mai i lenei taimi, ua ou taumafai e fa’aoo lea mau sa ou teuloto maia i tausaga e tele, ua aoga fo’i ia te a’u lenei fa’amau. Masalo ana leai, e le toe mafaia ona ta sa’u malu i le taimi nei. Fa’afetao sa mautu lo’u fa’amoemoe i le 1988, ma ou malaga ai i Samoa e ta la’u malu a tamaitai.”

E i ai le taimi ua sausaunoa ai le tama’ita’i faipule ma ua silamio ai le to’atele i lona la’ei Samoa. O le taualuga lea a lana vasega mo le sailiga tupe e fa’amau fa’ailoga ai le atoaga o le 50 tausaga o le A’oga Maualuga a le Fa’asao i Fatuoaiga, sa mataina ona faiva ona o lona la’ei.

Ua fa’amauina lenei molimau ola a le tamaitai faipule, le “afioga Laulauga” Tereise Andra Samoa e le Tisa’s Tattoo Festival 2022, ina ia fai fo’i ma sao e nofouta ai fanau talavou o le lumana’i, e i ai le agaga moni o lou la’eia ai o le La’ei Samoa. 

“O lou fa’asinomaga ma lau auaunaga o le Tautua i lou aiga lautele, lou afio’aga e pele ia te oe, ma lou malo, ae le galo ai lau auaunaga i lou Atua o mea uma.”