Pago Pago - AMERIKA SAMOA

O le vaiaso nei o lo’o i ai le au filifilia o tama taaalo a aoga Maualuluga mai Amerika Samoa i le taamilosaga a le Marist Sevens under 19 i Samoa. Ma e to’a 14 le au taaalo. 

Na taua e Mata’u Valusia Talataina, le Fa’atonu Ta’aloga a le ASHSAA Sports i le Samoa News, o le ulua’i taimi lea ua auai atu ai se ‘au mai le teritori o Amerika i lenei ta’amilosaga.

E le gata i lea, “o le taimi muamua lea ua toe faaopoopo ai e le Asosi Taaloga a A’oga Maualuga a Amerika Samoa-ASHSAA le Lakapi faaPeretania ma o lea ua tasi ai le aso o le taamilosaga o le Lakapi Taitoafitu, ina ua mae’a le faamaoniga a le ASHSAA.”

O ‘au lakapi e iai tama ta’aalo-tama’ita’i – ali’i ma tama’ita’i – mai aoga maualuluga a Fagaitua, Samoana, Nuuuli Voc Tech, Tafuna, Faasao-Marist, ma Leone. Ma, “talu ai o lea ua iai ‘au lakapi a Amerika Samoa,” o le tala lea a Mata’u ua maua le valaaulia mai Samoa e taaalo i le Taamilosaga a le Malisi 7 i Upolu i le vaiaso nei.

Ae peitai, o le taimi lenei, o le valaaulia na mo na o alii.

Na faamanino e Mata’u i le pulega o le Marist 7s i Samoa le fa’asa o tama ta’aalo a le Aoga Maualuga a Amerika Samoa i le 19 tausaga.

“O le au taaalo a le Marist Sevens e mo i latou i lalo ifo o le 19 ae le o le 19 tausaga pe sili atu foi,” o lana faamalamalamaga lea. O le matou o atu i lalo o le Matagaluega o Aoga, e fai ma sui o aoga maualuluga uma ma Amerika Samoa,” o lana tala lea.  

“O le a iai i Samoa le ‘au mo lenei vaiaso atoa ma le taamilosaga e faamae‘a i le Aso Toonai, ona toe foi mai ai lea i aiga i le aso lava lea. O le ‘au filifilia e mautinoa e faia ni ta’aloga se tolu, afai e manuia ona tauva lea mo le ipu.”

Sa ia fa’ailoa, “O le lakapi ua avea nei ma ta’aloga fou ua fa’aopoopoina e le ASHSAA mo le taimi muamua ina ua mae’a se ta’amilosaga manuia a le atunu’u talu ai nei, lea na manumalo ai Leone i ta’aloga a ali’i ma tama’ita’i.”

Fai mai Mata’u, o lea ua lisiina le lakapi o se tasi o taaloga faaletausaga ua tuufaatasia i totonu polokalama a le Matagaluega o Aoga mo aoga maualuluga i Amerika Samoa. 

Fai mai a ia, o loo iai foi avanoa mo sikolasipi lakapi, ona o lea ua tatala mo le taimi muamua, ina ua maua le valaaulia mai le Marist i Samoa.

Na ia fa’afetaia le DOE ma le ASHSAA mo le tu’uina atu o le lagolagosua.

O le Faiaoga Ulu o Tony Esau o lo'o ta'ita'ia le 'au e 14 alo o le atunu’u sa tuua le teritori i le aso Gafua o le vaiaso lenei. 

O le Aso To’ona’i na tu’ua ai e Mata’u le teritori mo Samoa.