Pago Pago - AMERIKA SAMOA

E talitonu afioga i alii Faipule mai le Itumalo o Manu’a, ua olegia e le Pulesili o le Faletupe o le atunu’u (TBAS) le itumalo i le mafua’aga ua ala ai ona tuai na toe faapipi’i masini ATM i le itumalo.

Na taua e le Pulesili o le TBAS ia David Buehler i lana molimau i le iloiloga sa faia i le Maota o Sui i le masina na te’a nei, ua mafua ona tuai na toe faapipi’i masini ATM i le Faletolu i Ta’u, Faleasao ma Fitiuta, ona o loo faatali fesootaiga ma le kamupani mai fafo latou te faatinoina lea auaunaga. 

Sa ia folafola i le masina na te’a nei, o le aso 1 o Me o le tausaga nei e tatau ona oo atu i ai ua mae’a ona faapipi’i masini ATM fou mo Ta’u atoa ai ma se masini se tasi i Ofu.

Ae ina ua fesiligia e le Komiti o le Faagaioiga o le Malo a le Maota o Sui le alii faipisinisi ia Timothy Jones, o lana kamupani lea sa faapipiiina masini ATM i totonu o le atunu’u, i le mafua’aga ua ala ai ona tuai na toe faapipi’i ni masini i Manu’a, na faamanino e Jones, ua mafua ona taofia le tautua a lana kamupani ona ua tapuni e le TBAS le teugatupe a lana kamupani sa mafai ai ona faatino le faatinoina o lana tautua mo le atunu’u.

O le teugatupe a lana pisinisi sa tatala i le Faletupe o le TBAS, na mafai ai ona faia fesootaiga ma Faletupe i fafo mo le fafagaina mai o le tino i tupe e fesoasoani e faatupe ai masini ATM. 

Na faamanino atili e Jones e faapea, sa sainia se feagaiga i le va o le TBAS ma lana kamupani, e faatino e lana kamupani le auaunaga ae faataga a le TBAS lana teugatupe e tatala i totonu o le Faletupe. Peita’i o le faafitauli ua tula’i mai, ua faafuase’i ona tapuni e le TBAS le teugatupe ma le toe mafai ai loa ona faaauau le tautua a lana kamupani.

Saunoa le afioga i le alii Faipule ia Alumamalu Filoiali’i Ale, o se tulaga faanoanoa le gaioiga ua faia e le Pulesili o le TBAS, o lona faia lea o ni alofaga e ufiufi ai le mea moni o lo o tulai mai i le itumalo. E talitonu le afioga a Alumamalu, e lei faia le galuega a le susuga a Buehler, o le mafua’aga lea ua ia faia ai lenei ‘alofaga i luma o le Maota o le atunu’u.

O le vaiaso na te’a nei na molimau ai le susuga a Jones i luma o le Komiti a le Maota o Sui, mo le faamaninoina o le mataupu e faatatau i masini ATM lea o loo vavao ai le itumalo o Manu’a.

Na faailoa e le Taitai Komiti ia Faimealelei Anthony Fu’e Allen i le susuga a Jones, o le iloiloga e autu i le mafua’aga ua faaletonu ai le faapipiiina o masini ATM i Manu’a.

Sa fautuaina fo’i e Faimealelei le susuga a Jones, ina ia tau mamao mai le taua o faamatalaga e faatatau i le tagi lea ua ia faaulu i le Fa’amasinoga Maualuga faasaga i le Pulesil o le TBAS, ae taula’i sa’o lava lana molimau i le tautua a lana kamupani i le faapipi’iina o masini ATM.

Na faamanino e Jones i le Komiti e faapea, ua mafua ona taofia le tautua a lana kamupani e ala i le faapipiiina o masini ATM, ona ua tapuni e le TBAS le teugatupe sa mafai ai ona faigofie fesootaiga ma Faletupe i Amerika mo le faaleleia o le tautua e ala i le sapalaiina atu o tupe i totonu o masini.

E tusa ma le 4 tausaga na tau fuafua mai ai lana kamupani, ona o le manaoga sa maitauina i lea taimi, i le vave lea ona leai o se tinoitupe i totonu o masini ATM i soo se tulimanu o Tutuila i se taimi o le 2016, a o i ai le Faletupe o Hawaii e le’i tula’i ese, atoa ai ma le ANZ Bank lea ua faamoemoe e tula’i ese ia Setema o le tausaga nei.

Na tau fai lagolago e le to’atele o afioga i Faipule le saunoaga a Jones e faatatau i le faafitauli sa feagai ma le atunuu i tausaga ua mavae, o le vave lea ona uma o tupe i totonu o masini, ae faatitino lava lea faafitauli i faaiuga o vaiaso, o le taimi pito sili lea ona mana’omia ai e tagata le tupe mo faatauga faapea ai manaoga o le aiga.

O le faafitauli o lo o maitauina i Faletupe i le taimi nei, ua leai se naunau e faatupu lau teugatupe o loo teu i totonu o le Faletupa, ae ua galulue Faletupe e saili auala e faaopoopo ai tupe e totogi e le tagata teutupe.

Mo se faataitaiga e pei ona saunoa Jones, afai e teu i totonu o lau teugatupe i le aso le $100, e oo atu i le masina o Tesema ua toeitiiti lava mae’a le $100 lena i tau faaee (fees) a le Faletupe. Ua le toe galulue Faletupe e faaaoga lau tupe o loo teu e faa faigaluega ma nono atu ina ia toe maua mai ai sau tupe faasili, ae ua na o le galulue lava e saili auala e faaitiitia ai lau teugatupe.

Ina ua fesiligia e afioga i Faipule le susuga a Jones, poo le a se auala na te faia ina ia vave ai ona toe faapipi’i masini ATMA mo Manu’a. Saunoa Jones, afai e mafai ona fesoasoani atu le Fono e ala i se iugafono e talosagaina ai le Faletupe o le TBAS ina ia toe tatala lana teugatupe i le Faletupe, ona mafai ai loa lea ona toe faaauau lana tautua mo Manu’a.

Sa ia polomisi e faapea, o le taimi lava e toe tatala ai le teugatupe a lana kamupani i le TBAS, o le taimi fo’i lea e malaga ai loa i Manu’a ma faapipii masini ATM fou e 2 i Ta’u, Faleasao ma Fitiuta, ma isi masini fou e 2 mo Ofu ma Olosega.

Na fesili le Sui Fofoga Fetalai ia Fetu Fetui Jr ia Jones e faamanino le mafua’aga na tapuni ai e le TBAS le teugatupe a lana kamupani. 

Na taua e Jones e faapea, na mafua ona tapuni e le TBAS le teugatupe, ona ua manatu le alii Pulesili ia Buehler, o tupe o loo faa faigaluega i totonu o le teugatupe lenei, o tupe eleelea.

Na faamanino e Jones, e 2 lava auala e mafua ai ona mafai e se kamupani o loo faa faigaluegaina tupe i luga o masini, e pei o lana kamupani, pe afai e faamaonia e le Faletupe, e le o ni tupe mo ni gaioiga faa Terorisi o loo teu i totonu o lana teugatupe, ma le isi mafua’aga, e le o ni tupe eleelea mai solitulafono i isi atunuu o loo aumai e faamama i Amerika Samoa. 

Ina ua faamaonia e le TBAS e le aafia le kamupani a le susuga a Jones i aafiaga e pei ona taua, sa latou talia ai loa le tatalaina o le teugatupe, peita’i mulimuli ane, na toe tapuni e le Pulesilis o le TBAS le teugatupe ona o lona talitonuga, o tupe eleelea o loo teu i totonu o le teugatupe.

O le pisinisi mo le faapipiiina o masini ATM, o se pisinisi e tele se vaega tupe e maua mai ai, e pei ona faamanino e Jones.

Sa ia taua i luma o le Komiti, e silia il e $350,000 le tupe e maua e le TBAS i le masina mai le pisinisi o le ATM, tusa lea o le silia i le 50,000 faagaioiga faatino, ae $4.95 le tupe e maua i soo se faagaioiga faatino e mafai ona maua e le Faletupe.

Saunoa Fetu, toeitiiti lava o aso uma e telefoni mai ai tagata o lona itumalo i Manu’a ma faasea mai ia i latou o faipule, i le nofonofo e aunoa ma se gaioiga o latou faia e toe faafoi atu ai le tautua tau masini ATM i Manu’a.

Na talosaga Fetu ia Jones ina ia vaai alofa i le tagi mai o le itumalo ma ia faagasolo tulaga uma mo le toe faapipiiina o masini ATM fou mo Ta’u ma Ofu. 

Na lagolagoina e le afioga i le ali’i Faipule ia Tiaoalii Fau Sai finagalo o Fetu ma Alumamalu. Sa ia taua le mana’omia fo’i e lona itumalo i Ofu ma Olosega o se masini ATM.

O le faafitauli o loo i ai i le taimi nei, afai ae leaga le masini ATM i Manu’a, e totogi e tagata o le itumalo le pasese i le vaalele e malaga mai ai i Tutuila e faaaoga masini ATM.

Ae o le taimi nei i le tapunia ai o malaga a va’alele, ua matua pagatia lava tagata o le itumalo.

Na talosaga le Komiti ina ua mae’a le iloiloga, o le a galulue mo se iugafono e faatino ai le manaoga o le susuga a Jones, pe afai ae toe a’e mai le Fono i ana galuega masani ia Iulai o le tausaga nei.