Ads by Google Ads by Google

Talitonu Faipule Manu’a e le sa’o le su’e o latou tagata i fualaau faasaina


[ata: foa'i]
ausage@samoanews.com

Pago Pago, AMERIKA SAMOA

 

E talitonu nisi o afioga i Faipule mai le Itumalo o Manu’a e le sa’o le faaiuga ua faia e le Ofisa o Tiute a le malo e sailia ai vaalele ma tagatanu’u o Manu’a pe a taunu’u mai i le malae va’alele i Tafuna i tulaga o fualaau fa’asaina.

 

O lea mataupu na faaleo e afioga i ali’i Faipule mai Manu’a i le iloiloga ma sui o le Ofisa o Tiute a le malo, Sui Teutupe faapea ai ma le Faatonusili o le Pulega o Uafu ma Malaeva’alele, lea na faatautaia e le Komiti o Faagaioiga o le Malo i lalo o le ta’ita’iga a le afioga Vailiuama S. Leasiolagi.

 

O se talosaga mai le afioga i le Faipula mai le itumalo o Fofo ia Andra Samoa e faatatau i le auala e faatautaia ai e le Ofisa o Tiute le sailiina o uta mai vaa oloa faapea ai uta o loo aumaia e va’alele, i le tauafai lava lea e saili le auala o loo ofi mai ai fualaau fa’asaina i le atunu’u.

 

O molimau na valaauina i le iloiloga e aofia ai le Taitai o le Ofisa o Tiute ia Elisara Pita Elisara, o le Sui Teutupe a le malo ia Keith Gebauer ma le Faatonusili o le Pulega o Uafu ma Malaevaalele ia Taimalelagi Dr. Claire Poumele.

 

Na fesili le Sui Fofoga Fetalai ia Fetu Fetui Jr, o ia fo’i lea o le isi Faipule mai le Itumalo o Manu’a #1 i lona fia malamalama i le mafua’aga o loo saili ai e le Ofisa o Tiute tagata Manu’a pe a malaga mai i Tutuila e aunoa ma se mafua’aga.

 

Na tali le susuga a Gebauer e faapea, o Manu’a le isi nofoaga lea o loo aofia i totonu o le polokalame a le Ofisa o Tiute, lagolagosua i ai ma isi vaega o le malo mo le sailia o va’alele mai le Itumalo faapea ai tagata mo fualaau fa’asaina.

 

Na faailoa e Fetui Jr ia Gebauer, e le sa’o le gaioiga o loo latou faia o le sailia lea o tagata Manu’a faatasi ai ma va’alele i fualaau fa’asaina e aunoa ma se mafua’aga, ae na tali Gebauer, o loo manino le Tulafono 34-19, e mafai ona latou sailia soo se va’a e aga’i mai i le isi uafu i le isi uafu i tulaga o fualaau fa’asaina. Ae talu ai suesuega o loo faagasolo, na faailoa ai e Gebauer i le Komiti, o le a le mafai ai ona ia talanoa auiliili e tusa ai o nisi o suesuega o loo galulue i ai le Ofisa.

 

E le i nofo lelei i le finagalo o Fetui Jr le saunoaga lea a Gebauer, ma ia fesiligia ai loa Gebauer poo a faamaumauga o loo ia taumafai e ufiufi ma nana mai le Fono Faitulafono.

 

“Soo se faamatalaga lava e oo mai i luma o le Maota lenei e avea ma faamatalaga faalaua’itele. Ou te le iloa fo’i le mafua’aga e te taumafai ai e fai faanana nisi o ia faamatalaga,” o le saunoaga lea a Fetui Jr.

 

Na faamanino e Fetui Jr i molimau e faapea, i lona talitonuga, e le o sa’o le gaioiga o loo latou faia o le su’e fua lea o vaalele ma tagata mai Manu’a e aunoa ma se mafua’aga tatau.

 

“O le gaioiga o loo outou faia, ua outou soli ai aia tatau o tagata Manu’a i lalo o le Tulafono, e le sa’o le gaioiga o loo outou faia,” o le saunoaga tuu sa’o lea a Fetui Jr.

 

Ae na toe faamanino atili e Gebauer e faapea, o loo manino le Tulafono, lea o loo tuu atu ai i le latou Ofisa (Ofisa o Tiute) le malosi latou te sailia ai vaalele ma tagata mai Manu’a i tulaga o fualaau fa’asaina. Sa ia taua atili fo’i le mae’a lea ona latou fesiligia o le Loia Sili e uiga i lenei mataupu, ma ua fautuaina fo’i i latou e le Loia Sili ona ia tausisi i le tulafono ma faatino pea a latou galuega.

 

E le i malolo le afioga i le Sui Fofoga Fetalai i lona finauina pea lea o lenei mataupu, ona e i ai lona talitonuga, e le o tusa ma le tulafono le gaioiga o loo faia i tagata Manu’a. 

 

Na faamanino e Fetui Jr e faapea, e manino le tulafono, afai ua masalomia se tagata i lona umia faasolitulafono o fualaau fa’asaina, fai mai le tulafono, e tatau ona su’e ma saili meatotino ma le tino o le tagata lea. 

 

“A mae’a loa ona su’e le tino ma meatotino a le tagata lea e aunoa ma ni fualaau faasaina na maua ai, toe fai mai loa lea o le tulafono, e le tatau ona toe sailia. O le taimi lona lua e toe sue ma saili ai e le malo tagata nei, ua latou solitulafono le tulafono.

 

Saunoa atili Fetui Jr e faapea, afai ua saili e le malo malaga a va’alele mai Manu’a i fulaaau fa’asaina, e tatau fo’i la ona saili uma atu ai ma pasi la’upasese o loo tautuaina le atunuu i Sisifo ma Sasa’e mo le tau sailia o fualaau fa’asaina.

 

Na tali le susuga a Gebauer e faapea, e le aafia ai fua pasi la’upasese i lalo o le tulafono. O pasi la’u pasese o loo faauigaina i lalo o le tulafono, o auala tau femalagaaiga i totonu lava o le atunuu, se’i vagana ai malaga mai le isi uafu i le isi uafu, fai mai le tulafono e tatau ona su’e va’a ma tagata o loo auai i malaga nei.

 

Na lagolagoina e le afioga i le ali’i Faipule mai Ofu ma Olosega/Sili le finagalo o le Sui Fofoga Fetalai, i le le talafeagai lea o le gaioiga e sailia ai tagata ma va’alele mai Manu’a.

 

Saunoa le afioga a Tiaoali’i Fau Sai e faapea, ua mae’a ona la talanoa ma le Faatonusili e faatatau i lenei mataupu, ma ua mae’a fo’i ona faaoo atu i ai se finagalo o le itumalo e tusa ai o auala o loo faatino ai a latou galuega.

 

O se tasi o mataupu na fesiligia i le iloiloga, o le auala o loo saili ai uta ma oloa o loo aumaia i totonu o containers mai fafo.

 

Saunoa le affoga i le ali’i Faipule ia Gafatasi Afalava e faapea, o se tasi o itu ua ia maitauina o loo mafua ai ona ofi mai fualaau faasaina i le atunu’u,e le o faamaoni tagata faigaluega a le Ofisa o Tiute o loo sailia uta o oloa mai totonu o container o loo la’u atu i luma o Faleoloa.

 

Na taua e Gafatasi se tasi o aso na aga’i atu ai i lana ta’avale, ae ia vaaia ai ni alii faigaluega Asia o loo latou la’u uta o oloa mai toton o le container o loo taatia i luma o le latou faleoloa ma la’u aga’i i totonu o le faleoloa, ae ese lava le itu o loo tutu mai ai le sui o le Ofisa o Tiute ma piilima mai ai e aunoa ma le alu e vaai i oloa o loo la’u mai i fafo o le container.

 

Saunoa Gafatasi e faapea, afai e le faamaoni tagata faigaluega nei i le faatinoina o latou tiute, e ala i le saili faalelei o container oloa o loo la’u mai e pisinisi, ona faigofie loa lea ona ofi mai fualaau faasaina i le atunu’u. Saunoa atili Gafatasi e faapea, e tatau ona i ai se Taitai e gafa ma le mataituina o tagata faigaluega a le Ofisa o Tiute o loo tiute i tua i nuu ma afioaga, ina ia mautinoa o loo faamaoni le faatinoina o le galuega.

 

Saunoa le affoga i le ali’i Faipule ia Vaetasi Tuumolimoli Saena Moliga e faapea, e le tatau lava ona ‘alo e Ofisa i le faamalosia o le tulafono, ona o le tulafono mo tagata uma ae le nao se vaega toaitiiti.

 

Na taua atili e Vaetasi lona faanoanoa i ripoti o loo maua mai e faatatau i tagata o lona itumalo o loo aafia i le la’uina mai o fualaau fa’asaina i Tutuila nei. Sa ia fautuaina molimau ina ia tutusa tagata uma i lalo o le tulafono, ae le o le vaai atu loa o lea tagata o se tagata maualuga poo se Ta’ita’i ona alo ese ai loa lea o le tulafono.