Ads by Google Ads by Google

Talitonu Faipule ua soli e le Faigamalo le Tulafono e ala i siitaga o totogi


[ata: foa'i]
ausage@samoanews.com

Pago Pago, AMERIKA SAMOA

Na fa’aalia e ni isi o afioga i alii Faipule i se iloiloga sa faia a le Komiti o le Paketi a le Maota o Sui i le vaiaso na te’a nei, faatasi ai ma sui o le Kapeneta a le Kovana, e soli Faavae le faaiuga lea ua faia e le faigamalo a Lemanu ma Talauega, o le fa’aaoga o tupe e faia ai siitaga a tagata faigaluega a le malo e aofia ai ma Faiaoga.

E mafua lea talitonuga e pei ona saunoa le afioga i le ali’i Faipule mai le Itmalo o Tuala-uta, lea fo’i na lagolago i ai le Sui Fofoga Fetalai ma nisi o afioga i Faipule, ua muamua fa’aaoga e le faigamalo tupe e faatino ai a latou siitaga ma faaiuga ua mae’a ona faataoto, e aunoa ma le fesiligia o le Fono Faitulafono i sona finagalo.

O loo manino le Faavae o Amerika Samoa, faapea ai le Tulafono o loo lima taitaiina ai galuega fa’atino a Vaega eseese e 3 o le Faigamalo, o le tiute o le Vaega Faamalosi Tulafono (Administration) latou te fuafua ma faataoto polokalame mo le manuia o le malo, ae o le tiute tauave a le Fono Faitulafono, na te faasoasoanina ma faataga le fa’aaogaina o tupe a le malo.

E talitonu afioga i Faipule, o le faaiuga ua faia e le faigamalo e fa’aaoga ai tupe mo siitaga o faiaoga ma tagata faigaluega a le malo e aunoa ma le tapa o se finagalo o le Fono Faitulafono, ua manino mai ai le solia o le Fa’avae.

Ae o le faia e le faigamalo o siitaga o totogi mo faiaoga talu mai le masina o Me na te’a nei, ua manino mai ai i finagalo o afioga i Faipule le soli ai o le Tulafono, ona e lei aofia i totonu o le Paketi a le malo na pasia e le Fono Faitulafono i le masina o Setema o le tausaga na te’a nei 2020, siitaga o totogi o faiaoga e pei ona fesiligia e le Fono.

O sui e toalua o le malo na molimau i lenei mataupu e aofia ai le Faatonusili o le Ofisa o le Paketi ia Cathy Aigamaua-Saelua ma le Faatonusili le tumau o le Ofisa o Aoga a le malo ia Dr. Roxanne Sua’ava Salave’a.

O le afioga i le ali’i Faipule ia Vailiuama Steve Leasiolagi na taitaia le iloiloga, lea fo’i sa auai sui o le Komiti. 

O le autu o le iloiloga, sa fia malamalama afioga i Faipule, pe na faapefea ona fuafua e le faigamalo siitaga o totogi mo Faiaoga, ae poo i ai fo’i se vaega tupe ua mae’a ona fa’atulaga ma fuafua e faatupe ai nei siitaga fou o totogi, lea na faatoa amata i le masina o Me o le tausaga nei. 

Na faamanino e Saelua i luma o le Komiti e faapea, ua mae’a ona faatulaga e le faiga malo se vaega tupe mai Tupe Fesoasoani a le Feterale o loo faamatu’u mai mo le Matagaluega o Aoga i tausaga taitasi, e totogi ai siitaga mo faiaoga.

Sa ia faapupula atili e faapea, e nao le siitaga lava i totogi o faiaoga o loo faatupe i tupe fesoasoani mai fafo, ae o totogi e pei ona pasia i le Paketi, o loo fa’aauau pea ona totogi mai vaega tupe a mae’a ona pasia e le Fono Faitulafono.

Na faalua e le Faatonusili le Tumau le saunoaga a Aigamaua-Saelua ma ia taua ai e faapea, ua mae’a ona faia ni fesootaiga a le Ofisa o Aoga a le malo ma le Ofisa autu e gafa ma le vaavaaia o tupe fesoasoani mai le malo feterale, ina ia latou silafia le fa’aaogaina o lenei tupe mo siitaga o totogi.

O le agaga atoa o le afioga i le ali’i Kovana ia Lemanu Peleti Sialega Mauga, ia maua uma e tagata faigaluega a le malo siitaga o totogi ina ia lava ma totoe totogi latou te maua, ma gafatia ai e tagata faigaluega ona tausi o latou aiga, totogi pili, ma faatino ai isi manaoga lelei mo le aiga i le lumanai’.

Na fa’aalia uma lava e faipule na auai i le iloiloga lo latou lagolagoina o le fuafuaga a le Kovana ma le faigamalo e sii totogi o faiaoga, faapea ai tagata faigaluega a le malo, ina ia mautinoa e ola fiafia aiga uma ma gafatia e aiga taitasi le tau o le soifuaga. Peita’i o le itu e tatau ona faataua e le faigamalo, ia faia gaioiga uma e tusa ma le Tulafono, e tusa ma le Fa’avae o Amerika Samoa.

Na fa’aalia e le afioga i le ali’i Faipule ia Larry Sanitoa e faapea, ua tele tausaga o talosaga atu pea le Fono i le faigamalo mo ni ripoti o tupe maua ma tupe fa’aalu ina ia silafia ai e le Fono le tulaga o loo i ai le tamaoaiga o le malo.

Peita’i o le tulaga o loo maitauina, o loo nofo pogisa pea lava le Fono Faitulafono i le tele o nei mau alagatupe fou o loo sasa’a mai e le malo tele o Amerika mo Amerika Samoa. I lona talitonuga, e le tatau lava ona fa’aaoga e le malo se tupe mo soo se manaoga se’i vagana ua faataga atu e le Fono Faitulafono, ina ia tusa ai ma le Tulafono faapea ai le Fa’avae. 

O se tasi o itu o loo popole i ai Sanitoa, o se vaega tupe e faaauau ai le totogi o siitaga a faiaoga pe afai ae faamuta i le faaiuga o le tausaga nei le isi alaga tupe mai le feterale o loo maua e le Ofisa o Aoga i tausaga taitasi. Na faamanino e Sua’ava-Salave’a i le Komiti e faapea, afai e muta le aoga o le isi vaega tupe mai le malo tele lea ua fuafua e mae’a i le masina o Setema o le tausaga nei, ona aapa loa lea o le Ofisa o Aoga, galulue faatasi ai ma le faigamalo e fa’aaoga mai tupe mai le isi alaga tupe fesoasoa fo’u mai le malo feterale, lea faatoa mae’a lona aoga i le masina o Setema o le 2024.

E pei ona manino i le saunoaga a le Faatonusili le tumau o le Ofisa o Aoga, e eseese uma lava alaga tupe o loo totogi ai le to’atele o faiaoga. E tusa ma le to’a 240 le aofa’i o faiaoga o loo totogi i lalo o le vaega tupe fesoasoani mai le malo feterale (Consolidated grants); lata i le to’a 100 faiaoga o loo totogi i lalo o le tupe fesoasoani mai Aoga Amata (ECE); lata i le to’a 300 faiaoga o loo totogi i lalo o tupe lotoifale, faapea ai ma se vaega to’atele o faiaoga o loo totogi i tupe fesoasoani mai le “special education grants”.

O faiaoga uma lava nei o loo aofia uma i latou i siitaga fou o totogi mo faiaoga, e fuafua i le maualuluga o faailoga o loo latou umia. Ua i luma fo’i o le Fono Faitulafono se pili mo se Tulafono tau faaofi mai le faigamalo a Lemanu ma Talauega, e faaleaoga ai le faatulaga mo totogi o faiaoga o loo i ai, ae suia i le fuafuaga fou e pei ona.

Saunoa Sanitoa, e le o malamalama le Fono Faitulafono i le tele o nei mau alaga tupe fou o loo maua mai e le faigamalo a Amerika Samoa mai le malo tele, o le mafua’aga fo’i lena ua tele ai fili faasaga i nei mau tupe fou, ona e lei maua le avanoa o le Fono Faitulafono latou te iloilo ma fesiligia ai nei faamaumauga.

“O le mafua’aga lena e taua ai ripoti o tupe maua o loo talosaga atu ai le Fono i le tele o taimi, ina ia faigaofie ai ona matou malamalama i le tulaga o loo aga’i atu i ai le tamaoaiga o le malo,” o le saunoaga lea a Sanitoa.

Na faaopoopo le afioga a Vailiuama i le saunoaga a Sanitoa ma ia faailoa i molimau e faapea, nei manatu le faigamalo o loo nofo nofo le Fono Faitulafono e aunoa ma sa latou galuega o faatino, ae o le mea moni lava, o loo faatalitali atu pea le Fono i ripoti mai le malo e faatatau i le tulaga o lona tamaoaiga.

E le i teuteua saunoaga a le Sui Fofoga Fetalai, afioga Fetu Fetui Jr ina ua maua lona avanoa e sauona ai i molimau. Sa ia taua e faapea, “ou te lagolagoina le sii o totogi o faiaoga ma tagata faigaluega a le malo, ae ou te matua teena le gaioiga ua faia e le malo e sii ai totogi. E le o sa’o le auala ua si’i ai e le malo totogi o faiaoga ma tagata faigaluega, e le gata e solitulafono ae soli Faavae fo’i.”

I le faaiuga o le iloiloga, na faamaualalo ai le Faatonusili o le Ofisa o le Paketi i luma o le Komiti e tusa ai o faaletonu ua alia’e mai. Na tutulu le faletua ia Aigamaua-Saelua ma saunoa e faapea, e leai se lagona e vaai maualalo le faigamalo i sui o le Fono Faitulafono, ae ona o le naunau e fai se mea sili mo tagata faigaluega ua mafua ai ona tutupu nei lagona. 

Sa ia taua fo’i e faapea, sa masani ona ia fautuaina taitai o le malo ina ia silasila toto’a i le Tulafono ma le Faavae, ui o lea, e foliga mai ua ese le tulaga ua aga’i atu i ai taumafaiga a le malo.