Pago Pago, AMERIKA SAMOA

Ua talosaga nisi o Faipule o le Maota o Sui i le faigamalo, tauala atu i le Ta’ita’i o le Maota mo se avanoa e maua mai ai ripoti mo le fa’aaogaina o tupe fesoasoani mai le malo tele o Amerika e fesoasoani ai i le fa’ama’i o le COVID-19 lea na taunu’u mai i le atunu’u i le ogatotonu o le tausaga na te’a nei.

Na tula’i le afioga i le ali’i Faipule ia Larry Sanitoa ma talosaga i le Sui Fofoga Fetalai mo se avanoa e talosagaina ai le faigamalo mo ni ripoti e fa’atatau i le fa’aaogaina o tupe fesoasoani mai le malo tele e fesoasoani ai mo Amerika Samoa i le faama’i oti o le coronavirus.

Saunoa Sanitoa e faapea, a o aga’i atu le Fono mo ana galuega faatino i le amataga o lenei tausaga, atoa ai ma le tula’i mai o le faigamalo fou, e tatau lava ona i ai ni ripoti e faatatau i tupe maua atoa ai a tupe fa’aalu e faitau ma malamalama i ai faipule. E le gata i lea, sa ia talosagaina fo’i ripoti mo le fa’aaogaina o le faitau miliona ma miliona o tupe fesoasoani mai le malo tele, le CARES Act.

I le tulaga o tupe maua a le malo mo le tausaga tupe fou lenei 2021, na taua e Sanitoa le tatau lea ona malamalama le Fono i le malosi o le itu o tupe ao a le malo talu mai le Kuata Muamua o le Tausaga tupe lenei ua mae’a.

Na faamanino e Sanitoa e faapea, o lea ua faafofoga le Fono Faitulafono ma ona ta’ita’i i le saunoaga a le ali’i Kovana i le aso na tatala aloaia ai le ulua’i tauaofiaga a le Fono, i le tulaga o loo i ai tupe maua a le malo. Ae i lona talitonuga, e tatau fo’i ona malamalama le Fono i tulaga o tupe fa’aalu a le malo ina ia mautinoa ai, o loo sosolo lava le fa’aaogaina o tupe i luga o le laina.

Na tula’i le afioga i le ali’i Faipule mai le Itumalo o le Vaifanuatele ia Lavea Fatulegaee Palepoi Mauga ma ia lagolagoina le talosaga a Sanitoa mo ripoti i le fa’aaogaina o tupe fesoasoani mai fafo mo puipuiga o le faama’i o le coronavirus. 

Na talosagaina e Lavea se iloiloga ma sui o le Matagaluega o le Soifua Maloloina e tusa ai o le Falema’i i Amouli lea e oo mai i le taimi nei o lo o faaletonu pea. Saunoa Lavea e faapea, o le isi lea nofoaga na agavaa ona fa’aalu ai vaega tupe fesoasoani mai fafo e toe faaleleia ai peita’i e le o malamalama le Fono pe fia se tupe o totoe i le taimi nei.

Na taua e Lavea le taua tele o se Falema’i mo le mamalu o le atunu’u o loo afifio i le itu i Sasa’e o le atunu’u, ona o le tulaga mamao o le Falema’i i Faga’alu pe a oo ina tula’i mai ni faalavelave e moomia ai togafitiga faanatinati. 

Sa ia talosagaina fo’i se iloiloga ma le Matagaluega o le Puipuiga o le Saogalemu Lautele e tusa ai o le faaletonu o loo tula’i mai i le Ofisa o Leoleo i Fagaitua, i le le lava o Leoleo faapea ai ta’avale Leoleo e tautuaina le Falelima i Sasa’e. E oo fo’i i se Taavale Fuimu, na taua e Lavea le faaletonu o auaunaga taua nei mo le Falelima i Sasa’e.

O lona popolega o loo i ai, afai ae tula’i mai ni faalavelave e pei o mu, poo ni faalavelave fo’i e ono aafia ai soifua o tagata, e le taitai lava Leoleo e to’alua o loo galulue i le Ofisa i Fagaitua e tali i manaoga, poo taavale Fuimu fo’i pe a tula’i mai se faalavelave e aafia ai Maota ma Laoa o aiga.

I le talanoaina ai o le mataupu i ripoti mo tupe fesoasoani mai le malo tele o Amerika Samoa, na talanoaina ai fo’i e afioga i Faipule nofoaga e nonofo ai tagata pe a malaga mai i va’alele ia ua tapena le malo e tatala i le faaiuga o le masina nei.

Saunoa le afioga i le ali’i Faipule ia Faimealelei Anthony Fu’e Allen, o lea ua toe 2 vaiaso taunu’u mai le ulua’i malaga ae le i taitai mae’a ona fausia fale o loo i Faga’alu e fa’aaoga mo tagata pe a aafia i le siama. 

Na talosaga Faimealelei mo se iloiloga ma le Komiti Faafoe fou e iloiloina faaiuga mo puipuiga o le faama’i o le coronavirus, se’i faamanino tulaga o tapenaga ua i ai pe afai ae aafia se tasi o le atunuu i le siama. 

Saunoa Faimealelei e faapea, e faateia lona loto i le Komiti Faafoe fou lea ua filifilia e le afioga i le Kovana, e le gata ua aveese le Foma’i Sili ia Dr. Iotamo Saleapaga, o se tasi e tele lona tomai i faaiuga mo le puipuiga o le soifua maloloina, a o lea ua tu’u i ai sui mai le Aufai Pisinisi e leai ni agava’a faa foma’i.

Na taua e nisi o sui o le Falelima i Sasa’e i le Samoa News lo latou faanoanoa tele i le tulaga o loo i ai le Falema’i i Amouli, lea ua fia tausaga e le o toe fa’aaogaina. 

Na asia e le Samoa News le nofoaga o loo i ai le Falema’i i Amouli ma faamaonia ai tulaga e pei ona fesiligia i luma o le Fono faapea ai faasea mai nisi o le Itumalo. E le gata e le i taitai mae’a galuega mo le toe faaleleia o le Fale, ae foliga mai i le tulaga o loo i ai le galuega e le iloa se taimi e mae’a ma toe fa’aaogaina ai.

Na taua e se tasi o Tama matua mai Tula tulaga pagatia o loo fetaia’i ma le Falelima i Sasa’e i le taimi nei, pe afai ae tula’i mai se gasegase oso faafuase’i, lona uiga e tau tuli mai le Falema’i i Faga’alu mo se lavea’i.

“O le isi lea aoga o tupe fesoasoani e miliona ma miliona na aumai i le malo tele mo puipuiga o le fa’ama’i, e le gata e fausia ai fale e nonofo ai tagata malaga mai fafo, ae fausia ai fo’i nofoaga e pei o Falema’i e aofia ai le Falema’i i Amouli mo tagata mama’i, ae foliga mai ua aumai le tupe ma soona fa’aalu solo i isi manaoga ae tu’u ai le manaoga taua e tatau ona fa’amuamua,” o le saunoaga lea a se tasi o Tama matua mai Tula.

O lagona lava fo’i ia na fa’aalia e tagata matutua mai le motu o Aunu’u ina ua fesiligia e le Samoa News.

Na taua e se Tina matua le faalavelave na aafia ai lana granddaughter i le tausaga na te’a nei, ma talosagaina ai loa se fesoasoani a le EMS. Talu ai e leai se falema’i i Aunu’u, e le o toe fa’aaogaina le falema’i i Amouli, faaopoopo atu ai ma tulaga faaletonu i va’a i le va o Aunu’u ma Auasi, na aumai mamao ai lava le ma’i o si ana granddaughter mai Aunu’u ma aga’i atu i Faga’alu.

Na taua e le Tina e faapea, o le alofa o le Atua na manuia ai si ana tama, ae silia i le 2 itula talu ona oso le ma’i faatoa taunu’u i le Falema’i i Faga’alu.

Na faafetaia e le Sui Fofoga Fetalai afioga i Faipule mo le lagaina o lenei mataupu taua, ae i lona talitonuga, e tatau ona tu’u se taimi i le faigamalo fou e tapena mai ai ni a latou ripoti i le fa’aaogaina o tupe e pei ona fesiligia. E ui o tupe na aumai e fesoasoani ai i le puipuiga o le faama’i, ae ua mae’a lava ona tufatufa atu e le malo i Ofisa ma Matagaluega taitasi a latou vaega tupe e fa’asoasoa ma fa’aaoga.

E pei ona taua i ripoti na tuuina atu e le nofoaiga a Lolo ma Lemanu ua mavae atu i luma o le Fono Faitulafono i le tausaga na te’a nei, e silia i le $164 miliona le aofa’i o tupe fesoasoani na aumai e le malo mo Amerika Samoa e tapena ai puipuiga mo le faama’i.

I le ripoti sa tauaao atu i le Fono Faitulafono, na manino mai ai le aofa’i o tupe ua mae’a ona faamatu’u ese atu mo Matagaluega ma Ofisa Tumaoti eseese a le malo. Mo se faata’ita’iga o le Matagaluega o le Soifua Maloloina, e silia i le $6 miliona le tupe sa tuuina atu ai e faatupe ai a latou tapenaga.

O le talitonuga o ni isi o Faipule atoa ai nisi o le atunuu o loo alala i le Falelima i Sasa’e, o le galuega mo le toe faafouina o le Falema’i i Amouli, o le isi lea galuega sa tatau ona fausia i tupe fesoasoani na aumai mo puipuiga o le fa’ama’i.