Ads by Google Ads by Google

Talosaga Letuligasenoa e solofua le tagi fa’asaga ia te ia


[ata: foa'i]
ausage@samoanews.com

Ua taoto atu nei i se faaiuga a le Fa’amasinoga Maualuga le talosaga a le susuga a Togamamao Letuligasenoa, tauala atu i lana loia fautua ia Marcellus Talaimalo Uiagalelei, e talosagaina ai le fa’amasinoga mo sana faaiuga e solofua ai le tagi a le malo fa’asaga ia te ia.

 

O le susuga a Letuligasenoa, lea o lo o tatala i tua ina ua ia totogi le $2,000, o lo o tu’uaia i le moliaga mamafa o le umia fa’asolitulafono o vaega o fualaau fa’asaina o le mariuana.

 

O le tama’ita’i loia sili lagolago ia Christy Dunn na tula’i mo le itu a le malo.

 

Na taua e Uiagalelei i lana folasaga e fa’apea, o lo o tu’uaia e le malo ia Letuligasenoa i le moliaga mamafa o le umia fa’asolitulafono o vaega o le laau fa’asaina o le mariuana, le ituaiga o le “CBD oil” (Cannabidiol). Ae tusa ai o le tulafono e fa’amanino ai le CBD e pei ona taua e Uiagalelei, e le o se vaega lea e maua i totonu o le laau fa’asaina o le mariuana.

 

I le tagi a le malo fa’asaga ia Letuligasenoa o lo o taua ai e fa’apea, o le CBD oil, o se tasi lea o elemeni e maua i totonu o le laau fa’asaina o le mariuana, o le mafua’aga fo’i lea e ala ai ona lisi le CBD oil i lalo o le lisi o elemeni e faasa ona umia e se tasi pe a ulufale mai i le atunuu.

 

Na finau Uiagalelei e fa’apea, i lalo o le tulafono lea o lo o faavae ai le tagi a le malo fa’asaga ia Letuligasenoa, e le o taua mai ai le avea o le ‘CBD oil’ ma elemeni o le mariuana, lona uiga fo’i la, e le o se vaega e ono mafai ona molia ai fua le susuga a Letuligasenoa.

 

Na faauilavea le afioga i le ali’i Fa’aasino ia Fiti Sunia ma ia fesiligia Uiagalelei, i le eseesega o le CBD oil ma le THC oil (Tetrahydrocannabinol). Na tali Uiagalelei e fa’apea, o le THC oil, o le elemeni tonu lava lea e maua i totonu o le mariuana, o le mafua’aga fo’i lena e ala ai ona mafai e le malo ona molia soo se tasi na te umia le ituaiga suauu lenei o le THC oil, ona ua faamaonia i suesuega le avea o lea ituaiga suauu ma elemeni e maua i totonu o le mariuana.

 

Na finau atili fo’i Uiagalelei e fa’apea, o se tasi o itu e tulaga ese ai le tulafono lea o lo o molia ai e le malo le ua molia, ona o se tasi lenei o tulafono ua leva ma ua tuai fo’i, e to’atele fo’i tagata e le o iloa ma silafia lelei, a o lea ua molia ai e le malo ia Letuligasenoa.

 

I lona talitonuga, e tatau ona aveese lea vaega o le tulafono. Sa ia finau fo’i e fa’apea, e leai ni mariuana na maua i le tino o le ua molia poo ato fo’i sa i lalo o lana vaavaaia i le po na ulufale mai ai o ia i le atunu’u.

 

Na fia malamalama Sunia pe sa faia se suega i le CBD oil lea e fa’apea na maua ia Letuligasenoa, ae na tali le loia a le itu tete’e, na te le iloaina le tulaga lea, se’i vagana ai le malo e mafai ona latou tali i lea fesili.

 

Ina ua maua le avanoa o le malo, sa teena malosi ai e Dunn le solofua o le tagi fa’asaga ia Letuligasenoa. Sa ia taua e fa’apea, o le CBD oil lea na maua i le ato pa’u a le ua molia, o se tasi lea o elemeni e maua i totonu o le mariuana, o le mafua’aga fo’i lena ua mafua ai ona molia o ia i le moliaga o lona umia fa’asolitulafono o vaega o le laau fa’asaina o le mariuana.

 

E tusa ai o le faafinauga a le itu tete’e fai mai e leai se vaega o le mariuana na maua i le ua molia, na finau Dunn e faapea, talu ai o le CBD oil o se tasi o elemeni o le mariuana, lona uiga fo’i la, o mea ia na maua i le ua molia, o vaega o le laau faasaina o le mariuana.

 

I le faafinauga a le itu tete’e e fa’atatau i le tatau lea ona aveese le vaega o le tulafono lea o loo molia ai Letuligasenoa, ona o se tasi lenei o tulafono tuai e to’atele latou te le silafia, na finau Dunn e fa’apea, e leai se mea e ta’u o se tulafono tuai.

 

O le tulafono o lo o i ai nei, na siitia mai lea i le tulafono o lo o fa’aaoga e le malo feterale e fa’atino ai ana galuega mo le fa’amalosia o le tulafono.

 

“E talitonu le malo na umia faasolitulafono e le ua molia vaega o le laau fa’asaina o le mariuana i le po na ulufale mai ai o ia i totonu o le atunu’u, e mafua mai ina ua ia umia vaega o le CBD oil, o se vaega lea o elemeni o lo o maua i totonu o le mariuana,” o le fa’afinauga lea a Dunn.

 

Na faamanino atili e Dunn e fa’apea, o Letuligasenoa, na malaga mai o ia i le Hawaiian Airlines i le po o le aso 13 o Setema 2018. Ina ua taunu’u i le malae va’alele Faavaomalo i Tafuna, sa faia loa galuega masani a le Ofisa o Tiute, o le sailia lea o uta ina ia mautinoa e le o i ai ni vaega e faasa ona faaulufale mai i le atunu’u.

 

Sa maua i totonu o se tasi o ato a le ua molia ni fagu o lo o i ai le suauu. Sa faia ni suega i nei suauu ma iloa ai, o lo o i ai i totonu o nei suauu le CBD, poo le elemeni e maua i le mariuana.

 

Na maua fo’i e le malo i fa’amaumauga mai le Ofisa o le Loia Sili, le malaga ese atu lea o Letuligasenoa ma Amerika Samoa i le aso 10 o Setema, 2018, ae toe taliu mai i le po o le aso 13 o Setema.