Pago Pago - AMERIKA SAMOA

Ua talosagaina e le afioga i le faipule ia Luaitaua Gene Pan le faigamalo a Lemanu & Talauega ina ia “toe fetuutuunai” a latou faamuamua i le tulaga o le saogalemu o tagata lautele mo tagata nonofo i sasae mamao i Tutuila.

Sa faaalia e le alii faipule lona faanoanoa ona o le leai o se ofisa o leoleo i Fagaitua, ae na o le toatasi le avefeau (dispatcher) o lo’o tofia i lea itu o le motu. 

Ina ua fesiligia e le Samoa News, sa fa’amaonia mai e le Sui Komesina o Leoleo ia Vaipuna Foifua Jr, e fa’apea ua latou fa’aiti’itia leoleo i le tolu sifi e lua o lo’o faigaluega i le ofisa o leoleo i Fagaitua – “ona o le le lava o tagata faigaluega”.

Fa’amanino e Foifua e fa’apea, “e tasi le matou ta’avale leoleo o lo’o tu i Fagaitua, e to’atolu leoleo o lo’o galulue i sifi ta’itasi, e aofia ai ma le avefe’au. Afai e mana’omia se fesoasoani fa’aopoopo, o le a ‘auina atu loa leoleo mai le nofoaga tutotonu i Fagatogo, ae o lo’o tatala pea le fale tinei afi i Fagaitua.”

I le taimi o le tauaofiaga a le Maota o Sui i le aso Lua o le vaiaso lenei, sa saunoa ai Luaitaua e fa’apea, e faitau afe tagata o lo o nonofo i le itu i sasa’e o lo o mana’omia le fesoasoani a leoleo, ae le tatau ona “faatalitali” i se taimi e tali mai ai Leoleo mai Fagatogo,  ma o se tulaga faapopoleina.

Na taua e Luaitaua i le Samoa News e fa’apea, e ui e faitau afe tagata o lo o nonofo i le itu i sasa’e, ae o ta’avale uma a Leoleo ma tagata faigaluega o lo o fa’agasolo atu i Fagaotogo.

“E tatau i le malo ona silasila toto’a i lea tulaga, aisea ua ala ai ona faatali tagata i le itu i sasa’e mo se fesoasoani ae e le o toe faatali tagata i le ogatotonu, Tafuna ma le itu i sisifo,” o le saunoaga lea a le afioga i le faipule. 

Ma sa ia fa’aopoopo mai fo’i e fa’apea, ua tatau i le Matagaluega o le Puipuiga o le Saogalemu Lautele ona toe fa’afo’i lana fa’ai’uga muamua ma toe tatala le Ofisa o Leoleo i Fagaitua i lona tulaga fa’atinoina atoatoa, e pei ona i ai muamua.

“Matou te agavaa i lenei auaunaga a leoleo,” o le tala lea a le faipule.

Na taua e le Sui Komesina o Leoleo i le Samoa News, i le taimi nei, e i lalo ifo o le 200 tagata faigaluega a le Matagaluega o le Puipuiga o le Saogalemu Lautele o le  o lo o faigaluega.

"Ma o loʻo matou vaʻavaʻai i se isi aʻoga a leoleo,” o le tala lea a le sui komesina. 

Saunoa Luaitaua e fa’apea, e le tatau ona fa’atapula’a na’o le matagaluega le mataupu tau tagata faigaluega, ae tatau ona fa’aasili i le Ofisa o le Kovana.

Ua le gata i lea sa ia fa’ailoa foi e fa’apea e tatau i le Matagaluega ona la’a i totonu ma ave le faamuamua i tagata lautele.

“O Amerika Samoa o lo’o feagai ma fa’afitauli o fualaau fa’asaina ae e le o iai lava se leoleo i sasa’e. “E tatau ona tatou faia mea lelei mo le manuia o tatou tagata,” o le faaaliga lea a le Faipule.

Na ia taʻua atili, "o le faʻamatalaga” a le Matagaluega “e foliga mai o se 'alofaga. Ua faaalia foi e tagata o le itu i sasae o latou atugaluga; o lea na laga ai lenei mataupu i le tauaofiaga a le maota.”

“E le mafai ona tatou o fa’apea. O le 2023 ua tatou i ai, ae e foliga mai ua tatou toe foi i le 1960's lea e le o ausia ai auaunaga a le tatou malo. E tatau fo’i ona tatou toe fa’aleleia atili,” o lana tala lea i le Samoa News.

O le aso ananafi lea sa fa’atulaga e faia ai se iloiloga a le Komiti o le Saogalemu Lautele a le Maota o Sui, lea e ta’ita’i komiti ai le afioga i le faipule ia Avagafano Vaimauga Maiava, o se tasi sa avea ma Ta’ita’i Leoleo i le Matagaluega o le Puipuiga o le Saogalemu Lautele.

Ma sa valaauina Foifua e molimau i le mataupu o lo o tulai mai. O le a lipotia atu i le vaiaso a sau, tulaga o le iloiloga a le komiti.