Ads by Google Ads by Google

Talosaga Soliai mo le su’etusi a le Initeria mo tupe o le COVID a le Matagaluega o Aoga


[ata: foa'i]

Pago Pago - AMERIKA SAMOA

 

I le taoaofiaga a le Maota Maualuga i le amataga o le vaiaso lenei, sa talosaga ai e le afioga ia Senetoa Soliai Tuipine Fuimaono le su’etusi a le Matagaluega o le Initeria a le fetarale (DOI) e suetusi o le miliona o tupe o le COVID-19 mo le Matagaluega o Aoga a Amerika Samoa. 

 

Saunoa Soliai e fa’apea, e tatau ona taloina se iloiloga mo le Fa’atonusili o Aoga ia Talauega Dr Samasoni Asaeli e molimau ma fa’amalamalama le mea na fa’aalu ai le vaega tupe ae o a fo’i galuega sa fa’atinoina.

 

“E tele lava fa’afitauli ua tula’i mai i le fa’aaogaina o tupe a le malo. I la’u lava ia matau, o lo’o galulue tuto’atasi le faigamalo, ae o aso ua tuana’i e masani ona galulue lima ma lima, ae fa’anoanoa ua le o toe fa’apea,” o lana tala lea.

 

Fai mai a ia, e mana’omia e le DOI le su’eina o tupe a le malo.

 

"Ou te talitonu e tatau ona suʻe tupe a le malo ma e tatau ona talosaga i le DOI e suʻe tupe a le feterale aemaise lava le faʻatupeina o le COVID talu ai nei."

 

Saunoa Soliai, e tatau i le loia a le Senate ona faila se talosaga aloaia.

 

E lei nofo lelei le finagalo o le afioga i le ali’i senatoa ia Togiola Tulafono, i lona taua o le talosaga e le tatau ona manatu māmā i ai, ona e ono tu’u sese ai le fe’au i tagata lautele, pe a fua i le mamafa o le talosaga.

 

“O lo’o su’etusi nei tupe a le malo ma e faigofie ona maua ripoti pe a mae’a su’etusi,” o lana fa’aaliga lea.

 

Na taua e Togiola o le atugaluga, e le o su’eina e le DOI tupe a le malo.

 

“Ou te popole ona e le o se talosaga faigofie lea. E le gata i lea, e le mafai e le DOI ona su’eina tagata o le atunuu, o le tulaga lena i aso ua mavae a o pulea e le Konekeresi le paketi a le malo, ae o le taimi nei, o tatou e pulea le tatou paketi ma le faasoasoaina,” o se vaega lea o le saunoaga a Togiola.

 

“Ae afai foi e maua se tala e faapea o le a aumai e le Fono suetusi feterale mai le DOI e su’e tupe a le atunuu ma i’u ai lava, e te’ena le talosaga ona e le faigofie.”

 

Fai mai Togiola, e i ai se atugaluga e taua tele - ona o lo o i ai lipoti e faapea o nisi o tupe a le COVID na toe faafoi, e aofia ai le $56 miliona na faaagaga mo faleaoga fou. “Ia o se popolega lea,” o le saunoaga lea a Togiola.

 

Fai mai a ia e i ai mataupu e tatau ona silasila toto’a i ai le Fono - le mafuaaga na toe faafoi ai tupe a le feterale e tasi.