AMERIKA

Ua i luma nei o le Faamasinoga Maualuga a Amerika ia se apili a le faigamalo a Peresetene Donald Trump, mo se fa’atagana e mafai ai ona ia taofia le avea o i latou e fananau i totonu o Amerika, i ni matua mai atunu’u i fafo, ma sitiseni o Amerika.

O lenei taumafaiga sa faapea ona taofia e faamasinoga maualalo i totonu o Amerika.

Ae ua finau le faigamalo a Trump, ua la’asia e faamasinoga maualalo o latou aia tatau, e ala i le polokaina o lenei tulafono fou, ma o latou talosagaina ai le faamasinoga maualuga, ina ia limiti ia le a’afiaga o fa’ai’uga a faamasinoga maualalo.

I le masina o Ianuari sa ta’ua ai e se tasi o faamasino feterale le le o gatasi o fa’atonuga mai i le alii peresetene, ma tulaga o le fa’avae a le atunu’u, ma taofia ai e lea faamasino ia le fa’amalosia o lenei tulafono fou.

I ni nai aso mulimuli ane, sa faapea foi ona polokaina e se faamasino mai Maryland ia lenei fuafuaga a le faigamalo fou, ona ua talitonu lea faamasino, e le o gatasi le fuafuaga a Trump ma tala faasolopito a le atunu’u, lea e mafai ai ona avea so’o se tasi e fanau pe soifua mai i totonu o Amerika, ma sitiseni o le malo.

E o’o lava foi i faamasinoga apili ua o latou le taliaina ia le talosaga a le faigamalo a Trump ina ia fa’aleaogaina fa’ai’uga mai i faamasinoga maualalo, lea e poloka ai lenei tulafono fou ua mae’a ona ia sainia, i le ulua’i aso o lana nofoaiga fa’alua.

I le silia ma le 150 tausaga, o lo’o malamalama faamasinoga i le faaopoopoga e 14 i totonu o le Faavae, e fa’amautuina ai sitiseni mo so’o se tasi sa fanau pe fa’atautoina, i totonu o le Iunaite Setete, e tusa po o fea le atunu’u e malaga mai ai matua.

Ma sa fa’amautuina i le tausaga e 1898 ia le faaupuga o lea faaopoopoga i le Faavae, ma e o’o mai lava i faamasinoga i nei ona po, ua o latou fa’aalia lo latou le manana’o e toe iloiloina lea vaega o le Faavae.

Ae peitai, o lo’o ua finau mai le itu ‘conservative’, e sese nei manatu mai le tausaga ua tuanai, ona o lo’o aofia i totonu o le Faaopoopoga lona 14 ia se fa’aupuga, e apalai ai lenei tulaga i na o tagatanu’u moni o Amerika.  

O lenei tulafono fou o lo’o taumafai ia le peresetene o Amerika e fa’amalosia, ua faapea ona polokaina e faamasinoga mai setete o Maryland, Massachusetts ma Uasigitone, ona o se talosaga mai i le silia ma le 20 setete, o ni faalapotopotoga e lua mo tagata mai fafo faapea ma ni tagata se to’afitu.