Pago Pago - AMERIKA SAMOA

Na molimauina le fa’afaigata ona taliina e le sui Komesina o le Ofisa Palota, le susuga ia Dr. Uiagalelei Lealofi, o fesili na fesiligia ai o ia e le Komiti o Tulafono a le Senate, i le latou iloiloga i le taeao o le aso Faraile o le vaiaso ua mavae.

Ma o lea, na taofia ai e Afioga i Senatoa ia le iloiloga, ae talosagaina le sui Faatonu ina ia tau’a’aoina atu lana konakarate sa ia sainia ma le faigamalo ua mavae atu, ina ia mafa iona tagataga’i iai sui o le maota maualuga.

Sa fesiligia e le Peresetene o le Senate, le Afioga Tuaolo Manaia Fruean ia Dr. Uiagalelei, pe ua iai sana fuafuaga e tusa ai ma palotaga mo le Faipule a Swains, aua o lea ua mafai ona palota le sui mai Swains, i totonu o le Fono.  

E le gata i lea, na fia malamalama foi Tuaolo i le tulaga o le konakarate a le sui Komesina ma le faigamalo ua mavae atu.

Na fai sina umi o taumafai Dr. Uiagalelei e tali le fesili a le Peresetene a le Senate, ona i sona talitonuga, e tele ni vaega o nei mataupu e lua, e le o manino ma fai sina numi.

Sa ta’ua e le sui Komesina, e tusa ai ma le tulafono, o le matafaioi a le Ofisa Palota mo le fa’atulagaina o tulaga palota mo Swains, e manaomia ai ona faimalaga ona tagata faigaluega i Swains, e le gata i le faatulagaina ae ia mataituina o le palotaga.

Ae peitai, ona e leai se tasi e nofo i Swains i le taimi nei, ua mae’a ona ia fa’alauiloa atu le faataunu’uina o le palota mo Swains, i le ofisa palota, ae peitai, sa ta’ua e le sui Komesina, e le o aofia lea tulaga i totonu o le tulafono.

Na ta’ua foi e Dr. Uiagalelei, le fautuaina o ia e lana au pulega ma loia, ina ia saili se fofo o lenei mataupu mai o latou taitai.  Ae peitai, sa ia faamamafaina le le mafai ona fa’ataunuuina o tiute ma galuega a le latou ofisa, ona e leai nisi o nonofo i Swains.

Ae na toe faamanino mai e Tuaolo lana fesili, e uiga i le ituaiga palotaga o le a fa’atulaga mo le Faipule o Swains, pe tutusa ma auala o faataunuuina ai palota i isi itumalo.  E pei o le lesitala o tagata palota i le aso palota.

Sa ta’ua e le peresetene o le Senate, o le sui mo Swains na filifilia e tagata o Swains.  Ae peitai, ona o lea ua taulimaina e le sui mai Swains ia le aia tatau e palota ai i totonu o le Maota o Sui, ua tatau ona filifilia o ia e ala i le ‘popular vote’, e pei lava o isi Faipule.

Ae na saunoa mai le sui Komesina, e le o manino mai le tulafono i lea mataupu ma e latou te mana’omia se taiala mai i le Fono.  Na ta’ua e Dr. Uiagalelei, o lo’o manino mai i le tulafono le manaomia o ni sui e nonofo i totonu o le itumalo o lo’o avea ai i latou ma sui tauva, ae e le o manino po o le a le ituaiga palotaga o le a faia i lenei mataupu.

Sa fesiligia foi e Tuaolo ia Dr. Uiagalelei, pe ua faamavae mai lona tofiga, lea na tali mai ai le sui Komesina, e leai ma ua mae’a ona tofia o ia e le Afioga i le Kovana Pulaali’i N. Pula, mo le fa’aauauina o lona tofiga o le Komesina a le Ofisa Palota, pe afai ae pasiaina o ia e le Maota o Fono.

Ae na toe fa’amanino mai e Tuaolo, o le uiga o lana fesili, pe sa faamavae mai lona tofiga ina ua malolo le faigamalo tuai.  Ma sa ia ta’ua le iai o sana lisi o sui o le kapeneta tuai, ua mae’a ona maua a latou totogi faai’u.  Ma na saunoa Tuaolo, ua mafua ona maua nei totogi fa’ai’u, ona ua mae’a ona fa’amavae ia taitai mai o latou tofiga.  Ma na faapea ona ia toe fesiligia ai le sui Komesina pe ua mae’a ona ia faamavae.

Na saunoa le sui Komesina, i sona malamalama’aga, e fa’ato’a mae’a lana konakarate lea na amata mai i le faigamalo ua mae’a, ia Ianuari 2006.  Ae o lona tofiga fou mai i le Afioga i le Kovana Pulaali’i, na amataina ia Fepuari 7.  Ma na ta’ua e le sui Komesina le iai o lona igoa i luga o le lisi o faatonu sa tatau ona fa’amavae ina ua tula’i ‘ese le faigamalo tuai.

Sa faapea ona toe fesiligia e Tuaolo ia le sui Komesina, pe sa ia mauaina sona totogi fa’ai’u, e pei o isi sui o le kapeneta tuai.  Na tali Dr. Uiagalelei, e $17,000 sa ia mauaina mo ona livi e le’i fa’aaogaina.

Na toe faamanino mai e Tuaolo e faapea, o le mafuaaga e maua ai e sui o kapeneta ia totogi fa’ai’u (political payouts) lea e aofia ai ma livi e le’i fa’aaogaina, ona ua mae’a ona o latou fa’amavae mai o latou tofiga.  

Ae peitai, sa fa’aauau pea ona taofi Dr. Uiagalelei, e na te le’i faamavae mai i lona tofiga, ae sa ia maua ia lana tupe mo ona livi e le’i fa’aaogaina. Ma na fa’ato’ese foi le sui Komesina ona ua ia le manino i le mea o lo’o tupu.

Na faapea ona fesiligia e le Afioga i le Senatoa Togiola T.A. Tulafono, ia le tulaga o le konakarate a le sui Komesina ma le faigamalo tuai, ma pe na fa’amutaina e le Kovana.  Lea sa tali mai ai Dr. Uiagalelei, i le la talanoaga ma le Afioga i le Kovana Pulaali’i, ua toe filifilia o ia e fa’aauauina le galuega i totonu o le faigamalo fou.

Sa faapea ona toe fesiligia e Togiola ia le sui Komesina pe sa ia malie i le faamutaina o lona konakarate, aua afai ua faamutaina lana konakarate, e aunoa ma sona ioega po o se mafuaaga tatau, o lona uiga ua tatau ona totogia o ia e le malo mo aso o totoe o lana konakarate.

Sa saunoa foi Togiola i le ‘ese o le tofiga o le Komesina o Palota mai isi tofiga o le kapeneta, aua e mana’omia le tuto’atasi ma le sa’oloto mai i u’una’iga faapolokiki, aua o lea tofiga e gafa ma le mataituina o palotaga faavaomalo.

Na faapea ona finau mai le Afioga i le Senatoa, o le konakarate muamua a le sui Komesina, lea sa faia ma le faigamalo tuai, e le’i fa’amutaina.  Ae o lea ua toe tofia o ia e le faigamalo fou, e fa’aauau lana galuega.  Ma o se tulaga e le lelei, ona e a’afia ai le tuto’atasi ma le saoloto o le tofiga, mai i u’una’iga faapolokiki.

Ma sa ia faamamafa mai foi le tatau ona tutoatasi o le Komesina o le Ofisa o Palota.  Ma na toe fesili mulimuli ai Togiola, pe ua mae’a ona fa’amutaina e le kovana ia le koanakarate a le sui Komesina, lea e faamutaina i le tausaga fou.

Ina ua toe tali mai Dr. Uiagalelei, sa ia faapea mai, e tusa ai ma le la talanoaga ma le kovana, ua toe filifilia o ia i le tofiga ma o le mafuaaga lea ua o’o mai ai i luma o le Senate.

Sa faaleoina e Togiola lona le taliaina o le tali a Uiagalelei ma ia ta’ua ai e faapea, e tusa ai ma tulafono mo konakarate, e tatau i le malo ona totogi aso o totoe o le konakarate tuai a le sui Komesina, pe afai ua fa’amutaina e aunoa ma sana ioega.

O le mea lea, e pei ona saunoa Togiola, e le mafai ai ona pasia o ia e le Senate, ona o tulaga felavasa’i o lo’o tula’i mai.  Saunoa Togiola, o lo’o iai le konakarate muamua, lea e faamuta i le 2026, ua faamutaina e le kovana, ae o lea ua toe tofia o ia, i le tofiga o lo’o mana’omia ona pasia e le Senate.

Ma na saunoa ai Togiola, e le mafai ona pasia e le Senate ia le tofiga a le sui Komesina, se’ia vagana ua fa’amutaina lona konakarate muamua.

Na saunoa Dr. Uiagalelei, o le taimi nei, e le o maua sona totogi ma e foliga mai ua faamutaina le konakarate muamua, ina ua toe tofia o ia e le kovana ma amataina lea tofiga fou ia Fepuari 7, ina ua mae’a ona ia sainia ia lea konakarate fou.

O lea na talosagaina ai e Togiola ia se kopi o le konakarate sa sainia e Dr. Uiagalelei ma le faigamalo tuai, ma ia fa’atula’i ai loa se mau mo le tapunia o le iloiloga.

Sa lagolagoina e le Afioga i le Senatoa ia Tuana’itau Malaki Togiola ia le saunoaga a Tuaolo, i le manaomia ona fa’atulagaina o tulaga o palota mo le sui mai Swains.  Ma ona o ia o se tasi o tagatanu’u o Swains, o lo latou filifilia le sui mai Swains ma palota i isi itumalo.

O lea na talosagaina ai e le taitaifono o le Komiti o Tulafono a le Senate, le Afioga i le Senatoa ia Magalei Logovi’i ia le sui Komesina mo se kopi o lana konakarate tuai aua se tagataga’i a afioga i Senatoa, ona toe logo atu ai lea o ia.