Ads by Google Ads by Google

Taofi Senatoa ua le faamaoni Malemo i luma o le Senate


[ata: foa'i]

Pago Pago - AMERIKA SAMOA

Na fa’aalia le le fiafia o afioga i Senatoa i le sili atu o le tupe fa’aalu a le Faigamaloi le tausaga faaletupe o le 2023, lea na silia ma le $40 miliona, e pei ona ta’ua i se lipoti sa faaulufaleina e le Tausitupe a le Malo, le susuga ia Malemo Tausaga, aemaise ai le le usita’ia e le Faigamalo, o tulafono fa’ata’atia, e mataituina ai le fa’aaogaina o tupe a le malo.

O le a’ano tonu lea o le iloiloga a le Komiti o Paketi ma Tupe Fa’asoasoa, a le Senate lea sa faataunu’uina i le aso Lua, Fepuari 20, 2024, lea na auai atu ai le Teutupe a le Malo, ia Malemo Tausaga ma le Faatonusili o le Ofisa o Paketi, le faletua ia Catherine Saelua.

Sa amataina le iloiloga, i le fesiligia e le Taitaifono o le Komiti a le Senate, le afioga i le Senatoa ia Utu Sala Poasa, ia le faletua ia Saelu, e faamanino auiliili, le faagasologa o le totogiina o matagaluega ma ofisa a le malo, faapea kamupani tua, mo a latou auaunaga, e ala i le faatagaina o le talaina mai o tupe mai i teugatupe eseese a le malo.

Sa faamanino e Saelua e faapea, o so’o se pili (pili tusitusia i luga o pepa, po o pili e lafo atu i luga o tekonolosi), e muamua lava auala atu i lona ofisa, ona faato’a fa’ao’o atu lea i le Ofisa o Tupe, mo le totogia.

Na fesiligia e Utu ia Saelua, po o le a lana gaioiga e fai, pe afai e alu atu se pili ae ua le lava le tupe e totogi ai.  Sa tali Saleua, e ‘stamped’ le pili lea, ona toe faafo’i lea.  Ma na ta’ua foi e Saelua, o lo o iai se vaega i totonu o a latou komipiuta (system), e taofia ai le totogia o se pili, pe afai ua leai se tupe.

Ona toe fesili lea o Utu pe aisea la ua sili atu ai le tupe fa’aalu, nai lo tupe faatulagaina.  Sa fia malamalama Utu, po o ai lea o lo o faatagaina le fa’aaogaina o tupe o le paketi, po o Saelua, po o le Ofisa o Tupe – e aunoa ma le fa’ailoa mai ia Saelua.

Ae e le i tu’uina mai se tali a Saelua, na saunoa mai le afioga i le Senatoa ia Magalei Logovi’i, lea sa avea ma Tausitupe a le malo i tausaga ua tuanai, ma ia faamanatuina mai i le Faatonusili o le Ofisa o Paketi, le iai o se ‘safeguard’ e poloka ai le toe fa’aaogaina o se tupe, pe afai ua uma le tupe o lea poloketi ma lea poloketi.  Ae o lo iai i le Faatonusili o le Ofisa o Paketi, le pule, pe a faataga mai e le kovana, e mafai ai ona fa’aleaogaina lea ‘safeguard’.

Ma na saunoa Magalei, o lo o fia malamalama le afioga i le Taitaifono, pe aisea ua silia ma le $2 miliona le tupe faasilia ua fa’aaogaina mai i le ‘Contingency Fund’ a le kovana, lea e masani ona teu faaleoleo ai se vaegatupe, pe a ma le $300,000 aua ni aitalafu e ono tulai faafuasei mai.  Ma na toe faaleo e Magalei le fesili a le afioga Utu, pe sa faatagaina lea tulaga e le Ofisa o Paketi, pe na sau le faatagana mai i le Ofisa o Tupe a le malo.

Sa saunoa Saelua, e mafai foi e le Ofisa o Tupe ona tatalaina le ‘system’ e faataga ai le totogia o pili a le malo, ae fa’ato’a faailoa mulimuli atu ia te ia.

Sa toe saunoa Magalei, o lo o fia manino le komiti, po o ai tonu o lo o faatagaina le tupu mai o lea tulaga, on aua iai nei i a’ao o le Loia Sili ia se iugafono a le Senatoa, e talosagaina ai le Faamasio Sili, mo le filifilia o se Loia tuto’atasi, e na te su’esu’eina lenei mataupu, o le fa’aaogaina fa’alesolitulafono o tupe, e le Faigamalo.

Sa saunoa Magalei, o le tulaga lea o lo o fia malamalama ai le komiti a le Senate, po o ai tonu, lea na te ‘override’ po o le tatalaina o totogia o pili a le malo, e ui ua leai se tupe o totoe, ina ia mafai ona tu’uina atu le suafa o lea tagata i le Loia Sili mo le suesueina.

Na toe fesiligia e Magalei po o iai ni faamaumauga o talosaga o peimeni/pili, e le i o’o atu i lona ofisa, ae ua mae’a ona totogia.

Sa tali Saelua, o lo o iai i lona ofisa, faamaumauga o pili ua mae’a ona totogi, e aofia ai ma pili sa totogi e le Ofisa o Tupe, e aunoa ma lona silafia.

Na saunoa le afioga Utu i le maualuga tele o le tupe fa’aalu, ae ua le toe iai se tupe o totoe, aemaise ai le faia o lea tulaga ma le iloa.  Sa ia fa’aalia le popo’e o lona mafaufau ona o le le usita’ia o tulafono a le malo e taitai e toalua a le malo, ae o le la matafaioi lea o le mataituina o le fa’asologa leleia o le fa’aaogaina o tupe a le malo.

Sa ta’ua foi e Utu le fa’aaogaina foi o tupe na patino mo fa’alavelave fa’afuasei, i ni galuega e le o ni faalavelave faafuasei, ma o le I’uga o lea tulaga, e le toe fa’aolaina mai (reimburse) e le malo feterale ia tupe.

Na fesiligia e Magalei ia le $1.5 miliona lea na fa’aaoga e toe faaola ai tupe a le malo feterale, lea na fa’aaoga e le malo, e faatau ai le MV Pago Pago, ma leisi $1.5 miliona lea na totogi ai le kamupani a le ‘Howard’s Construction’, lea na ta’ua e le Teutupe, sa latou fausia ai le auala i Fogagogo.

E le gata i lea, na feisligia foi e Magalei le $1 miliona lea na totogia ai le Paramount Builders, lea sa ta’ua e le Teutupe a le Malo, sa totogi ai le faia o le alatele i Poloa.

Ae peitai, na fa’aleoina e Magalei lona le talitonuina o le saunoaga a Malemo.  Sa ta’ua e Magalei, e tusa ai ma le auiliiliina o le tala o le fa’aaogaina o lea tupe mai i le DOE, e $5 miliona na totogi ai le Paramount Builders mo se auala e tau atu i le afioaga o Poloa, ma leisi $5 miliona mo le fausia o se auala mai i Poloa e tau atu i Fagamalo.

Peitai na saunoa Malemo, e le o sana galuega le iloa o vaega uma o lenei mataupu, e na o le pau lona tiute, o le totogi o pili ua tu’uina atu ia te ia, ua mae’a ona pasia.

Ona fesili lea o Magalei, po o ai la e tatau ona aumai (subpoena) e sau e faamalamalama lenei mataupu, po o le Faatonusili o le Ofisa o Matagaluega Lautele ma le CPO.  Na ioe le Teutupe i le fesili lea a Magalei.

Sa faapea ona saunoa mai le afioga i le Peresetene o le Senate, ia Tuaolo Manaia Fruean, e tele nisi vaega o lea mataupu e manaomia ona iloiloina, ma e tatau ona faagasolo le iloiloga.

Na fa’ailoa atu e Tuaolo i le Teutupe a le malo, o lo o fa’alagolago le atunu’u ia te ia.   O ia o le to’oto’o faapea ma se tiakono sinia.  Ma o nei mea uma, e faalagolago i lona faamaoni.  Ona fesiligia lea e Tuaolo o Malemo, pe iai sana kamupani teu fanua.  Sa tali Malemo, o le kamupani lea a lana fanau.  Na toe fesiligia e Tuaolo ia Malemo, pe le iai se fete’ena’iga o lea tulaga ma lana galuega, o le Teutupe a le malo.  Na tali Malemo, o nisi a taimi.

Sa faapea foi ona fesiligia e Tuaolo ia se vaegatupe (protocol costs) o lo o sau i le igoa a Loa Tuimavave Tauapai Laupola, e pei ona ta’ua i totonu o le lipoti.

Sa faamanino e Malemo, o peimeni nei sa talosagaina e le kovana, e totogi i le igoa o lana COS (chief of staff).

Na toe fesiligia e Tuaolo ia molimau, pe ua la faitauina tulafono le tulafono ‘anti-deficiency’ ma po o le a foi le faasalaga o le solia o lea tulafono.

Na tali uma molimau, ioe…ae tali Malemo, o le faasalaga, o le ave i le falepuipui.

Sa fa’aalia e Tuaolo lona faanoanoa tele e tusa ai ma nisi o pili ua mae’a ona totogia, e pei o le pili lea ua totogi i le kamupani a le ‘Alapati Fano Security Service’, lea na fa’ailoa mai e le Teutupe, o le kamupani a le leoleo a le kovana.

Na faaleoina e Tuaolo e faapea, e lata i le $19,000 i le masina, lea o lo o totogi i lea kamupani pe a faatusatusa i le $4,000-$5,000 o lo o totogi ai le kamupani sikulaki a lona to’alua (Nana’s Security Service).

Sa fautuaina e le afioga i le Senatoa ia Togiola Tulafono, ia molimau, ina ia aumai le loia sili pe a toe auai mai i seisi iloiloga a le komiti.

Na fesiligia e Togiola, pe faapefea ona tatalaina le ‘system’ a le malo, e fa’atagaina ai le faia o peimeni, ae ua le toe iai se tupe o totoe.  Sa tali Saelua, o le tele lava o taimi, e taofia peimeni pe afai ua leai se tupe, ae e iai tulaga faapitoa, e saini pe faatagaina mai e le kovana, ona taumafai lea e lo latou ofisa e fa’afetaui le peimeni.

Na tulitatao atu Togiola, pe faia lea tulaga e ui lava o lo o soli ai le tulafono.  Sa le’i tali Saelua i le fesili a Togiola, ae na faamanino mai e faapea, o le tele lava o talosaga mai i ofisa a le malo e toe faafo’i, pe afai e leai se tupe, ae afai e o’o atu se pili ua saini ai le kovana, ona o latou taumafai lea e su’e se tupe mai isi teugatupe, e totogi ai le pili lea.

Sa le’i teuteuina le saunoaga a le afioga i le Senatoa ia Satele Lili’o, mo Malemo, i le faaleoina o lona faanoanoa tele e tusa ai ma lana molimau.  Na faailoa atu e Satele ia Malemo, ua ia pepelo i le Senate, ona i se latou iloiloga ua mae’a, na ta’ua e Satele lona fesiligia ai o Malemo po o iai sona sootaga ma ni pisinisi o lo o faia ni galuega mo le malo, ae na tali Malemo, e leai.  Ae o lea ua ia faamaonia mai, o lana fanau e ana le kamupani teu fanua lea o lo o konakalate e le malo.  Faapea ai foi ma seisi kamupani, o lo o tele feavea’i, e iai foi lona (Malemo) lona so’otaga.

I lana saunoaga faai’u, sa te’ena ai e Malemo ia le iai o sona so’otaga ma le kamupani a le ‘Howard Construction’.

Ina ua aofia potopoto afioga Senatoa i le latou tauaofiaga masani, ina ua mae’a lea iloiloga, sa fautuaina ai e le afioga Muagututi’a le tatau loa ona gaioi le Senate ma ave loa lenei mataupu, i le faamasinoga.  Sa saunoa Muagututi’a, o lea ua pepelo le Teutupe i luma o le Senate, ma a toe fa’aauauina nisi iloiloga, o le a faapea foi ona ia toe pepelo ai.

(E fia fa’ailoa atu e le Samoa News, o le lipoti lea e uiga i le ova o le tupe fa’aalu a le malo i le tausaga faaletupe o le 2023, sa fa’alauiloa mai e le Ofisa o Tupe, ae le o se faaiuga o se suegatusi a le malo.)