Pago Pago, AMERIKA SAMOA - 

E to’atolu ni ali’i na taofia faapagota e Leoleo i le vaiaso na te’a nei, ina ua taofi e Leoleo le latou ta’avale i le le usitaia o tulafono i luga o le alatele ae maua ai fualaau fa’asaina. E to’alua ali’i ua molia nei i le umia faasolitulafono o vaega o fualaau fa’asaina, ma le isi to’atasi na molia i lona le usitaia o tulafono tau ta’avale afi i luga o le alatele.

O i latou e to’atolu na taofia e aofia ai Tini Mauga, Alesana Taulamago ma Ologa Toilolo. 

E tasi le moliaga mamafa ua molia ai Taulamago, o lona umia faasolitulafono lea o vaega o le pauta faasaina o le aisa, o se solitulafono  mamafa e mafai ona faasala ai se tasii le Toese mo le umi e oo atu i le 10 tausaga, pe faasala foi i le salatupe e oo atu i le $20,000, pe faasala foi i faasalaga uma ia e lua.

E $5,000 le vaega tupe lea ua fa’atulaga e tatala ai i tua Taulamago.

E 2 moliaga ua faila faasaga ia Mauga, o lona umia faasolitulafono o vaega o le pauta faasaina o le aisa, atoa ai ma le moliaga o lona umia faasolitulafono o vaega o le fualaau faasaina o le aisa ma le faamoemoe e tulei ma fa’atau atu i isi tagata, o ni solitulafono mamafa e mafai ona faasala ai se tasi i le Toese mo le umi e mafai ona oo atu i le 20 tausaga, pe faasala i le salatupe e mafai ona oo atu i le $20,000, poo le faasala foi i faasalaga uma ia e lua.

E $20,000 le vaega tupe lea ua faatulaga e tatala ai Mauga i tua mai le Toese i Tafuna.

O le susuga a Toilolo, o ia fo’i lea na aveina le ta’avale, na molia i moliaga mama tau taavale afi, ma ua tatalaina nei o ia i tua e faatali ai le aso e toe fofogaina ai le isi ana iloiloga i luma o le Faamasinoga Faaitumalo.

TAGI A LE MALO

Na taua e le malo i le latou tagi e fa’apea, o le aso 1 o Oketopa 2020 na maitauina ai e ni Leoleo se tiute i luga o le alatele i se vaega o Malaeimi se ta’avale na aga’i atu i luga o le alatele ae ua mae’a le aoga o le laisene e faataga ai ona fealua’i. Na faafesootai e Leoleo le Ofisa autu o Ta’avale Afi mo ni faamaumauga o le laisene o le ta’avale numera 9980 ma faamaonia ai, ua leva ona tuana’i le aso na muta ai le aoga o le laisene o le ta’avale.

E le i toe faatali Leoleo ae na latou tuliloa loa le ta’avale ma taofi ai i luma o le Faleoloa o le LYC Store, faafesaga’i ma le ACED Hardware i Malaeimi. A o aga’i atu Leoleo e talanoa i le ave ta’avale, na iloa mamao atu e isi Leoleo le tagata o loo nofo i tua o le nofoa o le ave ta’avale, o loo minoi solo ona lima e foliga mai o lo o taumafai e nana se mea mai Leoleo.

Na aga’i atu Leoleo ma talanoa i le ave ta’avale, o le susuga lea ia Ologa Toilolo, ma faailoa i ai le mafua’aga ua taofi ai lana ta’avale i luga o le alatele, ae na faailoa e Toilolo i Leoleo, e to’atolu isi tagata o loo i totonu o lana ta’avale. 

Talu ai e leai se laisene ave ta’avale a Toilolo poo se pepa faamaonia na tuuina atu i Leoleo, na faia ai loa le faaiuga e taofia faapagota o ia faapea ai fo’i ma le taofia atu ai ma lana ta’avale. Na vaaia e Leoleo ni pepa sala (ticket) i totonu o le ta’avale a Toilolo e faamaonia ai, o se taimi o le taeao lava na taofi ai fo’i lana ta’avale e Leoleo i le fealua’i i luga o le alatele ae ua mae’a le aoga o le laisene o le ta’avale. Na faatonu e Leoleo ia Toilolo e alu i fafo ma le ta’avale.

Ina ua oso Toilolo i fafo ma le ta’avale, na iloa atu e le isi Leoleo se sikaleti ua uma ona taai o loo taatia i luga o le foloa o le ta’avale. Na tago le Leoleo ma aumai le sikaleti ma faamaonia ai, o le sikeleti mariuana ua uma ona taavale. A o le i tuuina atu Toilolo i totonu o le ta’avale a Leoleo, na saili e Leoleo lona tino atoa pe maua i ai ni aupega maai. E leai se mea na maua ai.

Na vaaia e Leoleo pasese e to’atolu i totonu o le ta’avale. O ali’i e to’alua o Tini Mauga, Alesana Taulamago, ma se tama’ita’i. Na faatonu e Leoleo i latou uma nei e to’atolu e o mai i fafo ma le ta’avale. Na saili e Leoleo i latou uma nei e to’atolu mo ni aupega poo nisi mea e ono lamatia ai le saogalemu o Leoleo.

Ina ua saili le tino o Taulamago, na maua ai e Leoleo se mea malo i le taga o lona ofu. Na fesili Leoleo ia Taulamago poo le a lea mea malo o loo patupatu i le taga o lona ofuvae o loo fai, ae na tali le ua molia, “o le laau”.

O le Laau, o le isi lea igoa e faaigoa ai le paipa tioata lea e fa’aaoga e le to’atele e ula ai le fualaau faasaina o le aisa. I totonu o le paipa tioata na maua ia Taulamago o loo i ai vaega o le pauta paepae. O Taulamago na nofo i le nofoaga o le pasese. Na faia se suega i le pauta paepae lea ma faamaonia ai, o vaega ia o le pauta faasaina o le aisa.

Na saili e Leoleo le tino o Mauga ma le pasese tamaitai, e leai ni fualaau faasaina poo ni aupega na maua ai.

O le ali’i o Mauga sa nofo i tua tonu lava o le nofoa o le ave ta’avale, ae o le pasese tamaitai na nofo i tua tonu lava o le nofoa o le pasese.

Ina ua faasolo le sailiga a Leoleo i totonu o le ta’avale, na maua ai e Leoleo se totini laititi o loo taatia i luga o le foloa i le nofoa pito i luma a le pasese. I totonu o le totini laititi lenei sa maua i ai straws e 3 ua uma ona ta tipi tulimanu, o lo o i ai i totonu vaega o le pauta paepae.

Na faaauau le sailiga o le ta’avale ma maua ai e Leoleo i le pito i tua o le nofoa o le ave ta’avale, poo le itu lea na nofo ai Mauga, ni straws ua maea ona tatipi tulimanu se 5, o loo i ai i totonu vaega o le pauta pa’epa’e.

Na musu le ave ta’avale ia Toilolo e fai sana faamatalaga i Leoleo e tusa ai o mea na maua i totonu o lana ta’avale. 

Ae ina ua fesiligia Taulamago i le paipa tioata lea na maua i lana taga sa i ai vaega o le pauta faasaina o le aisa, na ia ta’utino ai e faapea, o le paipa na tuu atu e Toilolo ia te ia e ula ma ia, pau le mea sese na ia faia e pei ona taua e Taulamago, ua nofo ma tuu le paipa i totonu o le taga o lona ofu ina ua mae’a ona ia ulaina.

Na teena e Mauga tu’uaiga o fualaau faasaina uma sa maua i totonu o le ta’avale e patino uma lea ia te ia.

Ae ina ua fesiligia e Leoleo le pasese tamaitai sa i totonu o le ta’avale, sa ia faamaonia ai i Leoleo, o Mauga e ana fualaau faasaina uma lava sa maua i totonu o le ta’avale. Na taua atili e le pasese tamaitai i Leoleo e faapea, o le taimi lava na taofi ai e Leoleo le latou ta’avale, na gaioi ai loa Mauga e aveese uma fualaau faasaina sa ia te ia ina ia faigata ai i Leoleo ona masalomia o ia.

Ae na taua e Taulamago i Leoleo e faapea, o ia sa savali i luga o le alatele ae faafuase’i loa ona tu atu le taavale a Toilolo ma piki o ia latou te ti’eti’e e faasavili. O le taimi lava na nofo ai i totonu o le ta’avale, na tuu atu ai e Toilolo le paipa tioata ma fai atu ia te ia e fai ai sana miti.

Na faia suega i fualaau faasaina uma lava na maua i totonu o le ta’avale ma le taga a le susuga a Taulamago ma faamaonia ai, o vaega ia o le pauta faasaina o le aisa.