Ads by Google Ads by Google

Taofi le ta’avale i le soona alu saoasaoa ae maua ai fualaau faasaina


[ata: SN]
ausage@samoanews.com

Pago Pago, AMERIKA SAMOA

E to’alua ni ali’i ua molia nei e le malo ina ua maua e Leoleo ni fualaau faasaina ia te i laua i le taimi na taofia ai le la ta’avale i le fealua’i ae lei laiseneina le ta’avale.

O i laua e toalua e aofia ai Johnny Vou, lea o loo nofovaavaaia mo le 2 tausaga ina ua ta’usala o ia i le solitulafono o le umia o se aupega mata’utia, faapea ai ma Mose Tui. 

O le vaiaso na te’a nei na tutula’i ai Vou ma Tui i luma o le Faamasinoga Faaitumalo.

Ua molia e le malo ia Vou i le moliaga o le umia faasolitulafono vaega o le pauta faasaina o le aisa ma le faamoemoe e faatau atu i isi tagata, atoa ai ma le moliaga e tasi o le umia faasolitulafono o vaega o le laau faasaina o le aisa, o ni solitulafono mamafa e mafai ona faasala ai se tasi i le Toese mai le 5 e oo atu i le 15 tausaga, pe faasala foi i le salatupe e le silia i le $20,000.

O Tui o loo molia i le moliaga e tasi o le umia faasolitulafono o vaega o le pauta o le aisa, faapea ai ma le umia faasolitulafono o le pauta o le aisa ma le faamoemoe e faatau atu i isi tagata.

E ta’I $15,000 lea ua faatulaga e le Faamasinoga Faaitumalo e totogi ona faatoa mafai lea ona tatala i laua nei i tua mai le Toese i Tafuna. Afai ae tatala i laua i tua, e le mafai ona la toe umia vaega o fualaau faasaina, e le mafai fo’i ona la toe solia se tulafono, a ia avea i laua ma tagata e tausisi i tulafono a le malo i soo se taimi. 

Ua poloaina foi i laua e fesootai vava lalata ma le loia ua fautuaina i laua, e le mafai ona la taumafai e tuua le atunuu, ma ia auai i soo se taimi e valaau ai a laua mataupu i luma o le Fa’amasinoga.

TAGI A LE MALO

E pei ona taua e le malo i le latou tagi e faapea, o le itula e 11:20 I le po o le aso 1 o Me, 2021, na logo ai e le Ofisa Autu o Leoleo i Fagatogo le Vaega o Leoleo Suesue o lo o gafa ma le suesueina o mataupu tau fualaau faasaina, se mataupu na tula’i mai i Tafuna, ina ua taofia e Leoleo mai le Ofisa o Leoleo i Leone se pikiapu na maua o fealua’i i luga o le alatele ae ua le aoga le laisene ae maua ai fualaau faasaina. 

Na talosagaina Leoleo Suesue o le vaega e Iloiloina Mataupu tau i fualaau faasaina ina ia aga’i atu mo le suesueina o lea mataupu. Ma na taua ai e faapea, o se taavale pikiapu lanumoana na taofia e Leoleo i le va o le Stadium ma le nofoaga o le kamupani fau auala a le McConnell Dowell i Tafuna, ina ua molimauina e Leoleo ua mae’a le aoga o le laisene o le ta’avale ae o loo fealua’i pea lava i luga o le alatele. 

Na fesiligia e leoleo ia tagata sa i totonu o le ta’avale o le alii ave ta’avale o Mose Tui, ma Johnny Vou

Na faailoa e Leoleo ia Tui le mafua’aga ua taofia ai lana ta’avale.

A o talanoa Leoleo ia Tui na maitauina e le isi Leoleo o loo tu i le itu o le pasese le minoi solo o Vou, e foliga mai o loo taumafai lona vae e eu se mea i lalo o le nofoa o loo nofo ai. Na vaaia fo’i e le Leoleo foliga popole ma le fefe o Vou.

O le taimi lea na faailoa ai loa e Leoleo i le ali’i ave taavale ia Tui, o le a taofia lana ta’avale i lalo o le vaaiga a Leoleo ona ua mae’a le aoga o le laisene ae o loo fealua’i lava. Na faatonu ai fo’i ma Tui e oso i fafo ma le ta’avale. Na usita’i Tui ma oso i fafo ma le ta’avale ma maua ai loa le avanoa o Leoleo e saili ai lona tino mo ni aupega poo ni fualaau faasaina. E leai ni aupega na maua ia Tui.

Na faatonu fo’i e Leoleo ia Vou e oso i fafo ma le ta’avale, lea fo’i na usita’i i ai Vou. Na saili e Leoleo le tino o Vou ma maua ai se tamai ato i le taga o lona ofu va faia. Na aumai e le Leoleo le tamai ato i fafo mai le taga o le ofu a Vou ma iloa ai, o loo i ai ni mea i totonu o le ta’avale.  Na malie Vou e su’e e Leoleo totonu o le tamai ato poo a mea o loo i ai.

I totonu o le tamai ato, na vaaia ai e Leoleo le tele o tamai pepa iila e masani ona fa’aaoga e utu ai fualaau faasaina o le aisa ma le mariuana i totonu o le ato. Sa maua ai fo’i straw e 3 ua uma ona ta tipi tulimanu o loo tutumu i vaega o le pauta faasaina o le aisa, ma se tinoitupe e $296 sa maua ai. Sa maua fo’i e Leoleo se pepa iila laititi o loo i ai lau mamago o le mariuana.

O le mae’a ai ona sailia o tino o Vou ma Tui, na auina atu ai loa lea o i laua, faatasi ai ma le ta’avale i le Ofisa o Leoleo i Tafuna mo nisi suesuega fa’aauau.

Na saili e Leoleo totonu o le ta’avale ina ua taunuu i le Ofisa i Tafuna, ma maua ai pepa iila laiti o loo i ai vaega o le pauta o le aisa i le vaega ogatotonu o le ta’avale. Na maua ai fo’i se ato i le nofoa pito i tua o le ta’avale. I totonu o le ato o loo i ai le ato tupe a Tui, atoa ai ma le anoanoa’i o pepa iila laiti ma le feololo o loo totoe ai vaega papa’e o le pauta faasaina o le aisa.

Na muamua fesiligia e Leoleo ia Tui e tusa ai o lenei mataupu. Na faailoa e Tui i Leoleo lona malamalama i ona aia tatau faaletulafono ma ua ia sauni fo’i e tuuina atu sana faamatalaga e tusa ai o le faalavelave e pei ona taofia ai le la ta’avale e Leoleo.

Na taua e Tui e faapea, na ia maua se telefoni mai ia Vou, pe mafai ona piki mai o ia mai Vaitogi.  Na alu i Vaitogi ma piki mai ai Vou ma se sipika o loo uu i lona lima. Na talosaga Vou ia te ia la te o i Nuuuli e pikimai ai ana mea o loo i ai. Na ioe Tui ma aga’i atu loa i Nuuuli ma piki mai ai Vou.

A o aga’i mai le la ta’avale i luma o le Cost-U-Less, sa ia vaaia se taavale a Leoleo o loo mulimuli mai i tua o le la ta’avale seia oo ina faatonu le la taavale e Leoleo o loo aga’i mai i le ta’avale a Leoleo e afe i tua le la ta’avale ma le auala. Na taua e Tui lona vaaia o Vou ua minoi solo i totonu o le ta’avale ina ua faalogoina le leo o le sailini a le ta’avale a Leoleo. Sa ia vaaia Vou ua tago i lana ato ma aumai i fafo ni pepa iila ma nana solo i totonu o vaega o lana ta’avale. Na taua e Tui e faapea, na te lei iloaina o loo i ai ni fualaau faasaina ia Vou i le taimi na la tietie atu ai i lana ta’avale.

Na fesili Leoleo Suesue ia Tui poo ai e ana le ato lea sa maua i le nofoa pito i tua o le ta’avale o loo i ai lana ato tupe ma lona ID i totonu, na tali Tui, o le ato a ia.

Ina ua fesiligia e Leoleo le susuga a Vou e tusa ai o lenei mataupu, na musu le ua molia e talanoa i Leoleo e tusa ai o fualaau faasaina na maua ia te ia.

O le mae’a ai ona fesiligia o Vou ma Tui e Leoleo, na auina atu ai loa i laua i le Toese i Tafuna ma taofia ai e faatali ai le taimi e tutula’i ai i luma o le Fa’amasinoga. Na faia se suega a Leoleo i fualaau faasaina na maua ia Vou ma Tui faapea ai totonu o le ta’avale ma faamaonia ai, o vaega ia o le pauta faasaina o le aisa ma le laau faasaina o le mariuana. 

SOLITULAFONO MUAMUA

E 2 tausaga o loo nofovaavaaia ai Vou, ina ua faamaonia e le Faamasinoga Maualuga le solitulafono o le umia o se aupega i se auala faasolitulafono. E 90 aso na tuli e Vou i le toese i Tafna, o se tasi lea o tuutuuga o lana faasalaga faanofovaavaaia e 24 masina.

O le mataupu e pei ona ta’usala ai Vou, na alia’e mai i le aso 30 o Mati, 2019 na ua talosagaina e se isi o lona aiga le fesoasoani a Leoleo ma le EMS ina ua manu’a Vou i se faalavelave. Na taua e le aiga, o Vou na manu’a i Iliili ae o lona tuafafine laitiiti na momolia o ia i lo latou aiga i Ottoville. 

Ina ua aga’i atu Leoleo e fesoaosani i le valaau, na latou maua ai pulufana, o fualaau faasaina o le aisa ma le mariuana i totonu o le potu a Vou. E tele se vaega o fualaau faasaina na maua i le fale o Vou i le taimi na tali atu ai Leoleo i le fa’alavelave. Na molia e le malo ia Vou i le umia faasolitulafono o fualaau faasaina, ae i le maliliega na sainia i le va o le malo ma Vou, na manatu ai le malo e faaleaoga moliaga o le umia o fualaau faasaina faasaga i lenei ali’i, se’i vagana ai le moliaga o le umia o se aupega ma pulufana na tali ioe i ai le ua mola.