Ads by Google Ads by Google

Taofia e Leoleo i le ‘ona ma le faatupu vevesi ae maua ai fualaau faasaina


[ata: SN]
ausage@samoanews.com

Pago Pago, AMERIKA SAMOA

 

Mai le to’atolu o ali’i na pu’e fa’apagota e Leoleo i le masina na te’a nei ma molia i lo latou faia o ni gaioiga e save’u ai le nonofo filemu o tagata lautele, o le to’alua o i latou nei ua molia nei e le malo i le umia fa’asolitulafono o vaega o fualaau fa’asaina.

 

O le masina na te’a nei na tutula’i uma ai i latou nei i luma o le Fa’amasinoga Faaitumalo mo a latou ulua’i iloiloga.

 

O i latou e to’atolu e aofia ai Tinifu Lafai; Ioasa Tupa’i ma Viliamu Sekone.

 

O lo o tu’uaia uma i latou nei e to’atolu i moliaga mama ta’i lua e aofia ai le faaoolima i le tulaga tolu, atoa ai ma le fa’atupu vevesi i nofoaga lautele.

 

I le taimi o le latou ulua’i iloiloga i luma o le Faamasinoga Faaitumalo i le masina na te’a nei, na faia ai loa le faaiuga e tatala Sekone i tua e aunoa ma se tupe e totogi, e faatali ai le isi ana iloiloga lea ua fa’atulaga mo le faaiuga o le masina fou o Iulai, ae o Lafai ma Tupa’i, na fa’atonu e le ali’i Fa’amasino ina ia toe oo atu i luma o le Faamasinoga i le taeao e sosoo ai mo le isi a laua iloiloga faapitoa, ina ua talosaga le malo mo se avanoa e fa’aauau atili ai su’esu’e a Leoleo i lenei mataupu.

 

O le taeao na sosoo ai na toe tutula’i ai loa Lafai ma Tupa’i i luma o le Fa’amasinoga mo le la iloiloga faapitoa. O le taimi fo’i lea na tauaao atu ai loa e le malo kopi o le latou tagi fa’asaga ia te i laua, i lo la umia fa’asolitulafono o fualaau fa’asaina.

 

Ua molia nei Lafai i le moliaga mamafa e tasi o lona umia fa’asolitulafono o vaega o le pauta fa’asaina o le aisa; ae o Tupa’i ua molia i lona umia fa’asolitulafono o le pauta fa’asaina o le aisa, faapea ai ma le moliaga o lona umia fa’asolitulafono o vaega o le laau fa’asaina o le mariuana.

 

O moliaga mamafa e pei ona molia ai i laua nei e le malo, e mafai ona fa’asala ai se tasi i le toese mo le umi e le sili atu i le 20 tausaga, pe fa’asala i le salatupe e le sili atu i le $20,000, poo le fa’asala fo’i i fa’asalaga uma ia e lua.

 

E ta’i $5,000 lea ua fa’atulaga e le Fa’amasinoga e tatala ai i laua i tua. 

 

Afai ae mafai ona totogi lea vaega tupe, ua poloainai laua ina ia fesoota’i vava lalata ma le la loia fautua, tausisi i tulafono a le malo i taimi uma, ma avea i laua o ni tagatanu’u e usita’i i tulafono a le malo e aofia ai ma tulafono a le Ofisa o Femalagaaiga.

 

E le mafai ona la taumafai e tuua le atunu’u i soo se taimi, ma ua poloaina fo’i i laua ina ia tuuina atu a laua tusi folau e taofi e le loiaa le malo, se’i vagana ua mae’a taualumaga o le la mataupu ona faatoa mafai lea ona toe fa’amatuu atu.

 

E le mafai ona la taumafai e fa’afesoota’i molimau a le malo, e aofia ai i laua na a’afia i lenei mataupu.

 

O le aso Faraile o le vaiaso nei lea ua fa’atulaga e faia ai le ulua’i iloiloga o lenei mataupu i luma o le Faamasinoga, lea fo’i laa maua ai le avanoa o le malo e folasia ai a latou mau e lagolago ai tagi ua faia faasaga ia i laua e to’alua ua tu’uaia i lo la soli o tulafono tau i fualaau faasaina.

 

O lo o taua a le malo i le latou tagi e fa’apea, pe tusa o le itula e 8:45 i le po o le aso 6 o le masina o Me na te’a nei, na talosagaina ai e se Tina mai Tafuna se fesoasoani a Leoleo, e tusa ai o le mataupu i lona son-in-law ma lana uo na fasi e ni ali’i se to’atolu sa faia sa latou inugapia i luma o le fale o se tasi o aiga o le nu’u.

 

O i latou e to’atolu e pei ona taua e le Tina lea i Leoleo, o i latou ia na pu’e fa’apagota ma ua molia e le malo i lenei mataupu.

 

Na taua e le Tina i Leoleo e fa’apea, ina ua taunu’u atu lona son-in-law e 26 tausaga le matua fa’atasi ai ma lana uo, o se ali’i e 24 tausaga le matua, sa ia vaaia ai ni manu’a i o la foliga. Ina ua ia fesiligia le mafuaaga, sa la faamatala atu ia te ia, na fasi laua e ni ali’i o lo o faia sa latou inugaupa i luma o le fale o se tasi o aiga o le nu’u.

 

Na taua e se tasi o ali’i na a’afia i Leoleo ina ua fesiligia i laua, o le fa’alavelave na tula’i mai i le taimi na la aga’i atu ai i le Faleoloa e fa’atau ni a laua meaai. 

 

A o la aga’i atu i luga o le alatele, sa la vaaia se ta’avale pikiapu lanu efuefu o lo o paka i tafatafa o le auala i luma o le fale o se tasi o aiga o le nu’u, ma ni ali’i se to’atolu o lo o faia ai sa latou inugapia.

 

Na valaau mai se tasi o i latou e to’atolu i le au ali’i e to’alua na a’afia pe la te manana’o i se mea ula e $10 le tau, ae na tali atu i ai le ali’i e 26 tausaga le matua, la te le mana’omia se mea ula, la te le tagofia fualaau fa’asaina.

 

O le taimi lea na valaau mai ai loa ma le ali’i o Lafai, “e sili pe a lua o ese manu e le i fasia oulua”.

 

Na taua e le malo i le latou tagi e fa’apea, o le tala la lea na mafua ai loa le vevesi, ina ua savali mai Lafai ma una’i le tua’au o le ali’i e 26 tausaga le matua, sosoo ai loa ma lona tu’iina o ia, o le taimi fo’i lea na tuli oso mai ai loa ma Tupai ma Asuni ma fesoasoani ia Lafai i le fasiga o le ali’i e 26 tausaga le matua.

 

Na oso le uo a le ali’i e 26 tausaga le matua ma taumafai e fa’asao lana uo, peita’i na fasi fa’atasi atu ai ma ia e i latou ua molia nei.

 

E silia i le itula o taumafai Leoleo e saili i latou nei i le po lea ae ua le maua, peita’i a o fa’agasolo pea sailiga a Leoleo, na molimauina ai loa e Leoleo le pikiapu lanu efuefu o lo o masalomia sa fa’aaoga i le taimi o le inugapia, o lo o paka i luma o se tasi o Faleoloa i Iliili.

 

Ina ua aga’i atu Leoleo e siaki le pikiapu lea, na latou faamaonia ai, o foliga tonu lava ia ma laei o i latou sa faamatala e molimau na fa’atinoina le solitulafono.

 

Na vave gaioiga a Leoleo ma taofia ai loa i latou nei i lalo o le latou vaavaaiga, e sauni atu mo le auina atu i le Ofisa o Leoleo mo suesuega.

 

A o le i auina atu i latou nei, na muamua siaki e Leoleo o latou tino ina ia mautinoa e leai ni a’upega poo nisi mea e ono aafia ai le saogalemu o Leoleo.

 

Ina ua saili e Leoleo le tino o Lafai, sa maua i ai ni taga pepe iila se 2 o loo i ai vaega o le pauta paepae o le aisa. Ae ina ua saili le tino o le alii o Tupa’i, sa maua i ai ni sikaleti mariuana se 2 ua uma ona taai, ma se paipa tioata o lo o i ai vaega o le pauta faasaina o le aisa.

 

Ina ua fesiligia e Leoleo ia Lafai poo fea na ia aumaia ai pepa iila o lo o i ai vaega o le aisa, na taua ai e le ua molia, sa ia fa’atauina mai i sana uo i le nofoaga e taua o le Filifili.

 

Ae na taua e Tupa’i i Leoleo e fa’apea, o fualaau fa’asaina sa maua ia te ia, na fa’atau mai i ana uo ave taxi mai Tafuna.

 

Na faia e Leoleo se suega i vaega o fualaau faasaina sa maua ia i laua nei, ma faamaonia ai, o vaega ia o le pauta oona o le aisa faapea ai ma le laau fa’asaina o le mariuana.

 

E pei ona taua i fa’amaumauga a le Fa’amasinoga, sa i ai solitulafono na ta’usala ai Lafai ma Tupa’i i tausaga ua mavae.

 

I le 2011, na faasala ai Lafai i le toese i Tafuna mo le 28 masina, o se tasi lea o tuutuuga o lana nofovaavaaia e 7 tausaga, ina ua faamaonia le moliaga o le gaoi sa tu’uaia ai o iae le malo, e mafua mai i le fa’alavelave lea na ia osofaia ai sa fale o se aiga i Leone ae ave faagaoi le tele o mea aoga e silia i le $1,400 le tau aofa’i.

 

Ae o le susuga a Tupa’i, o le tausaga e 2013 na faasala ai o ia i le toese mo le umi e 20 masina, o se tasi lea o tuutuuga o lana nofovaavaaia, ina ua faamaonia moliaga o le umia faasolitulafono o vaega o le laau fa’asaina o le aisa.