Ads by Google Ads by Google

Taofia se taulealea i le faia o ni uiga mataga i se teine aoga 15 tausaga le matua


[ata: SN]

Pago Pago - AMERIKA SAMOA

E $15,000 le tupe lea ua fa’atulaga e le fa’amasinoga e tatala ai i tua se ali’i mai Samoa ona o moliaga tau feusuaiga o lo’o aafia ai se teine aoga 15 tausaga le matua.

O lo o tu’uaia Tala Laloata i le moliaga o le faia o uiga faasotoma, faia o uiga mataga fa’afeusuaiga i le tulaga muamua, atoa ai ma moliaga e tolu o le faia o ni gaioiga e ono lamatia ai le soifua manuia o se tamaititi.

O le Aso Tofi ua te’a na tula’i ai le ua molia i luma o le Fa’amasinoga Fa’aitumalo.

E tusa ai ma le tagi a le malo i le Faamasinoga, o le masina o Mati o le tausaga na te’a nei na tuuina atu ai lenei mataupu i le Vaega o Suesuega o Soligatulafono a le Matagaluega o le Puipuiga o le Saogalemu Lautele e faatatau i le aafia ai o Laloata ma se tamaitai e 15 tausaga le matua.

Na taua e le tina o le tama’ita’i na a’afia, i leoleo e fa’apea, i se tasi o Aso Sa e le’i alu ai lana tama teine i le lotu, ma ua masalomia ai loa e pei ona ta’ua e tagata, sa va’aia lana tama teine ma lea ali’i i le Fagatogo Pavilion, i le taimi sa tatau ona alu ai i le lotu.

Na taua e le teineititi i Leoleo e fa’apea, sa iloa lelei e le ua molia e 15 ona tausaga ma o lo o aoga i aoga maualuluga, ma sa la feiloa’i muamua lava i se pati sa faia i lona fale i le vaitau o aso fiafia. 

Ae na ia talosagaina o ia e fai ma ana uo teine ma na ia ioeina. 

E le gata i lea sa ia taua ai i le aso 2 Fepuari sa la feiloai ai ma o loo tagofia e le ua molia le ‘ava malosi, lea na ia sogi atu ai ia te ia ma fai atu ia te ia e faamisi le aoga. 

O lo o taua foi e faapea, i le aso 5 o Mati, na alu atu ai le na aafia i le faleoloa ma feiloai ai ma le ua molia.   Ma o le aso lea, e pei ona ta’ua i faamaumauga, na faia ai e le ua molia ni uiga mataga i lenei tamaitai talavou.

Ae peitai, o le faamatalaga a Laloata i leoleo, o le tulaga na tupu ia Ianuari, sa alu atu lenei tamaitai ma sogi atu ia te ia, ma sa faateia ai oia.

I le la feiloaiga lona lua, na alu atu ai le teineititi ia te ia ma toe sogi atu ia te ia ona taʻu atu lea ia te ia ua 15 ona tausaga.

Ae i le aso 5 o Mati, na ta’ua e Lalolata sa tau mulimuli atu le tamaitai ia te ia.  Ona o le toatele o tagata o lo o feoai solo, na la agai ai i tua o se tasi o containers lata ane, ae e le’i umi, ae taunuu atu se tasi o le aiga o le alii na aafia ma talosagaina o ia e alu i le ofisa o leoleo i le taulaga.