Pago Pago - AMERIKA SAMOA

Ina ua pasia e afioga i Faipule ia le toe tolopoina o le faitauga faalua o le pili a le faigamalo mo le fa’asoasoaina o le $36 miliona lea na totoe mai i le tausaga tupe o le 2023, i le Aso Lulu, na faapea loa ona auai atu le Tausitupe a le Malo faapea le Faatonusili o le Ofisa o Tupe, i luma o le Komiti o Tupe a le Maota o Sui.

Na uluai tapa e afioga Faipule ia se ripoti auiliili o le fa’aaogaina o tupe totoe, mai le susuga Malemo Tausaga ma le faletua ia Cathy Saelua, le Faatonusili o le Ofisa o Tupe, e faamanino ai le mea na fa’aaoga iai le $36 miliona lea na totoe mai i le tausaga tupe o le 2023, faapea le $22 miliona lea na totoe mai i le tausaga tupe o le 2022.

Sa saunoa Malemo, ua mae’a ona fa’aaoga le $36 miliona lea na totoe mai ma ia faatoese i le komiti, ma ia fa’aalia lona ‘au i saunoaga a le sui Fofoga Fetalai, le afioga Fetu Fetui, Jr. faapea le afioga i le Faipule ia Larry Sanitoa, e faapea, o le fa’aaogaina o nei tupe e aunoa ma le pasiaina mai e le Fono, ua solia ai le tulafono.

Na ta’ua e Malemo, e ui i lo latou malamalama i le tulafono, ae peitai, na le faaulu muamua mai e pasiaina e le Fono ona ua manaomia vave se fesoasoani.  Na faatatau le saunoaga a Malemo i galuega mo le toe faaleleia o auala i Manu’a ma Tutuila faapea foi le tupe mo le Ofisa a le Medicaid. 

Sa toe fa’ailoa atu e afioga Faipule i taitai o le malo, o so’o se tupe totoe mai i tausaga tupe taitasi, e tatau lava ona faaoo muamua mai i le Fono mo le fa’asoasoaina, ma e ui i le agaga faafetai a le Maota o Sui i le tele o galuega lelei ua faia mo le toe fa’aleleia o le atunu’u, ae peitai, e tatau lava ona mulimulita’i i le tulafono.

Sa saunoa Fetui, o le $36 miliona, o se tupe tele ma e ofo lona loto i le fa’aaogaina e le faigamalo e aunoa ma le fa’ailoa mai i le Fono.  Ma ia fesiligia Malemo ma Saelua pe aisea na o la le fa’ailoa mai ai i le Fono le fa’aaogaina o tupe, ae ua loa ona o la tautua i totonu o le malo.

I le faaiuga o lana saunoaga, na faapea atu ai le afioga i le Faipule, o tupe o le a’a o mea leaga uma, ma e le taliaina e le Maota o Sui lenei soligatulafono ua faia i tulafono tau tupe.

O lea, na talosagaina ai e le afioga Savali Talavou Ale, le Fofoga Fetalai o le Maota o Sui, ia taitai o le malo, ina ia faaulu atu uma lisi o galuega na fa’aalu ai tupe totoe mai tausaga ua tuanai.

Sa saunoa le afioga i le Faipule ia Larry Sanitoa, ua iai nei le Fono i se tulaga faigata ona o le faigamalo ma le fa’aaogaina o nei mau tupe e aunoa ma le pasiaina mai e le Fono, o se solitulafono.

Na fa’aalia e le afioga i le Faipule ia Ape Mike Asifoa, o ia ua tau le maua sana moe, ona o lona popole tele i le teritori ma lenei mea ua tulai mai, i le faaaogaina o tupe e aunoa ma se faatanaga mai i le Fono.

Sa faakalenaina le faitauga lona lua o le $36 miliona, i le aso Lulu, ae peitai, na toatele Faipule na palota e tolopoina lea palota, ae se’i toe Iloilo atili lenei pili.

Ae na pasia e Faipule, i le faitauga lona lua, le pili mo le fa’asoasoaina o le $22 miliona lea na totoe mai i le tausaga tupe o le 2022, faapea le siitaga o alauni mo sui faitulafono, faapea ni isi mataupu tau tupe e valu (8).

Na pasia foi e le Maota o Sui suiga a le Senate i se pili a le faigamalo, ua le si’itia ai totogi o le fono faitulafono, ae ua siitia alauni mo ofisa a sui faitulafono.

Ae e fia fa’ailoa atu e le Samoa News, afai e pasia e le fono ia le siitaga o alauni mo latou, o le a tulai mai ai loa se faafitauli.  Ona i le faaupuga o lenei pili, o le faatupeina o lenei siitaga, o le a sau mai i le $22 miliona lea na totoe mai i le 2022, ae peitai, o lea ua mae’a ona fa’aaoga le $22 miliona lea.