APIA, Samoa - I se pepa o fa’amatalaga mai le Ofisa o le Pelamia a le malo o Samoa, ua fa’alauiloa ai e le afioga i le Palemia, Fiame Naomi Mataafa le tapunia atoa o le atunu’u ona o le Koviti-19

Fa’ailoa e Fiamae, o lea faatoa maea ona feiloai le Kapeneta ina ua maua mai le faaaliga mai le Matagaluega o le Soifua Maloloina, i le faamaonia ai  o le aafia o se tasi i tua mai o nofoaga faanofoesea i le siama o le Koviti 19. 

“O lenei tagata sa faatino ana suega o le Koviti e tapena ai mo le tuua o le atunuu, peitai sa maua ai ua pisia i le siama,” o se vaega lea o le saunoaga a le Palemia.

Ma o loo faatino nei e le Matagaluega o le Soifua Maloloina tulaga uma e saili ai le mafuaaga o le pisia o lenei tagata, atoa ai ma le sailia o i latou uma sa fesootai i ai ma latalata i ai. 

“O se galuega tele lenei galuega, peitai e ao ona faatino ina ia vave ona maua i latou uma ua masalomia ua aafia, ma fai a latou suega, ma faatino galuega faasoifua maloloina e moomia mo latou.”

E tusa ma le faatulagaina o laasaga mo le puipuiga o Samoa mai le faamai, “ua ou faasilasila aloaia atu ai,” e afua atu i le ta o le 12 i le vaeluaga o le po (Mati 18 i Samoa) o le a se’e atu ai le atunuu atoa i le Laasaga 2 (Lanu moli) o le tatou puipuiga mai le Koviti 19. 

I lalo o le Laasaga Lua, o le a: toe faamalosia ai le faaali o pepa tui i soo se nofoaga e agai iai; faia o talifofoga i taimi uma; tapunia uma o aoga i le atunuu; tapunia o falekalapu, faleava, fale koleni ma taaloga uma.

E faaauau ona tatala faleoloa ma isi auaunaga e pei o maketi, faletalavai ma pamu penisini i taimi faatulagaina.

E afua atu i le vaeluaga o le po taeao, Aso Toonai, 19 Mati 2022 i Samoa, “o le a see atu ai le atunuu atoa i le laasaga 3 (Lanu mumu) seia aulia le vaeluaga o le po o le Aso Lua, 22 Mati 2022,” o le fa’amalamalamaga lea a Fiame. 

I lalo o le laasaga tolu o le a tapunia atoa le atunuu, ma e faapena foi ma aoga, galuega, femalagaiga a vaa ma vaalele i le totonu o le atunuu ma malaga faavaomalo. Sei vagana ai auaunaga ua faatulaga mo le tuuina atu o auaunaga moomia mo le atunuu atoa. 

A o iai le atunuu i le suiga o laasaga, o le a galulue le Komiti o Faalavelave Faafuasei e taimua ai le Matgaluega o le Soifua Maloloina e faatino vaega uma moomia mo le sailia o i latou sa iai ni fesootaiga pe latalata i le ua aafia, ma faagasolo galuega faasoifua maloloina mo le puipuiga o le atunuu.

“Samoa e, ia tatou lototetele pea ma faamoemoe i le Atua aua o Ia lava e tu taumua i aso faigata faapenei. O le tatalo ia mau pea le toovae, ma lava papale pea si o tatou atunuu a o taumafai lenei galuega mo lo tatou puipuiga. 

Faafetai tele i lo outou faitatalo ma le tapuaiga mau i si o tatou atunuu,” o le saunoaga lea a le Palemia.