Ads by Google Ads by Google

Tapunia tauaofiaga faapitoa a le Fono Faitulafono


[ata: SN]

Pago Pago - AMERIKA SAMOA

- Saunia le faamanatuina o le Iupeli Siliva a le Fono i le aso Tofi, Novema 1, 2023

O le aso Lua o le vaiaso ua tuanai na tapunia aloaia ai tauaofiaga faapitoa a le Fono Faitulafono, i totonu o le Maota o le Senate faapea le Maota o Faipule.

I lona toe aso, sa tatalaina ai tauaofiaga a le Maota o Sui e pei ona masani, i se talosaga ma le tauvala’auga.  E to’asefulu ma le ono (16) Faipule na mafai ona auai i lea aso mulimuli, ae toalima, na aofia ai ma le Sui Fofoga Fetalai, le afioga Fetui Fetu Jr., le i mafai ona auai.

I totonu o le Maota o Sui, na pasia ai e Faipule ia le pili o tupe faaopoopo e $3.1, ae toe ta’oto le pili mo tupe faaopoopo e $36 miliona, ma se manatu e ono toe asia pe a toe tauaofia le fono faitulafono i le tausaga fou.  Sa faapea foi ona pasia e Faipule ia le faaopoopoga fou i le pili mo le lisi a le Asosi Soka a Amerika Samoa (FFAS), lea ua tu’uina atu i le umi e 55 tausaga.

Na fa’afaigata i afioga i Faipule ona pasia le pili mo le tupe faaopoopo e $36 miliona, ina ua maua tala – a’o feagai ai le Maota o Faipule ma le latou iloiloga – ua le pasia e le Maota Maualuga ia lea pili ma ua faapea foi ona tapunia tauaofiaga faapitoa a le Senate.  Ae o so’o se pili lava, e tatau ona pasia e maota uma e lua, ona fa’ao’o atu loa lea ii le kovana e pasiaina mai.

O pili nei e lua, mo tupe faaopoopo, aemaise lava le $36 miliona, o le mafuaaga tonu lava lea na taloina ai e le afioga i le kovana, ia Lemanu P.S. Mauga ia lenei tauaofiaga faapitoa a le Maota Fono.

Ae peitai, na te’ena e le Senate ia le pili mo tupe faaopoopo e $36 miliona ona ua mae’a ona fa’aaogaina, na te’ena ai foi ma le $3.1 miliona, e ui ina aofia ai ma le $1 miliona mo le Iupeli Siliva a le Fono, lea o lo o fa’aalia ai le le fiafia o le toatele o Senatoa ona ua o latou manatu o se taumafaiga fa’alata.

Na pasia foi e le Senate ia le pili mo le lisi a le FFAS.

Sa taumafai le Samoa News e saili se manatu o le kovana e tusa ai ma lenei mataupu, ae peitai, e le i maua mai se faamatalaga mai i le ofisa ale kovana.

I le tapunia o tauaofiaga a le Maota o Faipule, na fa’aalia ai e le afioga i le Fofoga Fetalai ia Savali Talavou Ale, lona agaga fa’afetai i afioga Faipule sa mafai ona aofia potopoto e fa’ataunuuina lenei tauaoafiaga faapitoa.  Ma sa ia saunoa foi i le iai pea o nisi galuega e manaomia ona faataunuuina.

Sa ia faamanatuina atu i afioga Faipule le faamanatuina o le Iupeli Siliva i le aso Tofi a sau nei, ia Novema 30, 2023.  E tasi le aso o le a faataunuuina ai lenei fiafia, mot agata o Tutuila ma Manu’a.

Na fa’alauiloa mai e se sui mai i le Senate, le aofia ai o se Sauniga Lotu i lenei aso fiafia, o ni fa’afiafiaga mai i le aoga maualuga a Leone – lea na manumalo i le tauvaga Pese ma Siva a le Mosooi 2023 – ia ma se fa’afiafiaga mai seisi Autalavou e le i mafai ona faamaonia mai i le taimi nei.

O nei fiafia o lo o faamoemoe e faataunuu’ina i le Fale Laumei i Utulei.