Ads by Google Ads by Google

Tasi tagata malaga mai Hawai’i fa’amonia fa’ama’i Koviti-19 (COVID-19)


Afioga i le Lutena Kovana, Talauega Eleasalo V. Ale, i le taimi o lana saunoaga i le feiloaiga ma le au tusitala ma le vaega fa’asalalau i le aso Faraile ua te’a, e fa’ailoa ai le fa’amonia o le Koviti-19 i le teritori. [ata: FS]

Pago Pago, AMERIKA SAMOA

 

I se feiloaiga ma le vaega tusitala ma le au fa’asalalau i le aso Faraile ua te’a, sa fa’amonia ai e le afioga i le Lutena Kovana ia Talauega Eleasalo Ale, e to’atasi le tagata malaga ua maua i le Koviti-19 mo ia lea sa malaga mai i le aso 13 o Setema i le toe tatalaina o faigamalaga a le Hawaiian Airlines i le va o Honolulu ma Pago Pago. 

 

“Ua i ai le tatou tagata malaga ua maua i le fa’ama’i, sa fa’amonia i le suega na faia. Ua mautinoa ai ua tasi le tagata ua maua i le fa’ama’i,” o se vaega lea o le saunoga a Talauega ma ia toe fa’ailoa ai o le suega o lea tagata fa’atasi ai ma i latou uma sa malaga mai i le Hawaiian Airlines sa faia i le aso Tofi ua te’a.

 

“E fa’ailoa atu i le atunu’u ua lava tapena le tatou faigamalo i tulaga nei. O lea ua uma ona faia auala uma sa tapena i ai, aua le puipuia o le tatou tagata malaga ae maise fo’i le puipuiga o le tatou atunu’u,” o a Talauega lea. 

 

Ma o lea tagata malaga, ua fa’amonia ai le mataupu (case) muamua lenei o le Koviti-19, ua maua ai se tasi ua aumaia le fa’ama’i, e pei ona fa’amaonia i suega sa faia.  “O le tatou tagata malaga lea, ua uma ona tui e lua o le Koviti-19, ae maua o ia i le fa’ama’i i le taimi na malaga mai ai,” o se isi vaega lea o le saunoaga a Talauega, lea fo’i sa fa’asalalauina i lea lava aso i luga o le Facebook ma isi fesootaiga o upega tafa’ilagi.

 

O lea tagata malaga o se tagata nu’u o Amerika Samoa sa malaga i Amerika ma sa lesitala o ia i le TalofaPass, e toe fo’i mai ai i le atunu’u, ma na pasia uma lava ana suega o le Koviti-19 sa faia ae le’i malaga mai i Amerika Samoa. “Peita’i, o auga ia o le fa’ama’i lea ua tatou iloa, e tusa lava pe faia tui puipuia, e ono afaina lava ona o auga o le fa’ama’i Koviti-19,” o se fa’amalamalamaga lea a Talauega. 

 

“Ae o le tala fiafia, ua uma ona tapenapena le faigamalo i tulaga fa’apea. Ua uma ona aveese mai le tagata malaga ua tuu i le nofoaga e puipuia ai o ia, e nofo toatasi ai ma nofo va’avaaia,” o se isi lea vaega o le saunoaga a Talauega. “E leai ai ni auga o le fa’ama’i e iloga i le tagata malaga, o lo’o malosi lava o ia. Pau lava o le suega o lea ua maua mai ua fa’amonia le Koviti-19.”

 

Fa’ailoa e le lutena kovana e fa’apea, “Ou te manatu Amerika Samoa, e leai se mea o le a fa’apopoleina ai le atunu’u lautele. E pei ona ou talanoa atu, ua ma’ea ona taapena le Komiti o le Koviti-19 i tulaga fa’apea. Ua uma ona puipuia, le tagata malaga, ua uma ona puipuia i latou uma lava na faimalaga mai. Ma o lo’o solosolo manuia pea le tatou atunu’u, e leai se popolega o foma’i, e pesia atu le fa’ama’i” i le atunu’u.

 

O le tagata malaga e pei fa’amonia i le Koviti-19 o lo’o nofo vaaia nei i se tasi o fale nofovaavaia a le malo, i lalo o le vaavaaiga a le Matagaluega o le Soifua Maloloina. O ia lea e atoa i ai le to’a 43 o le aumalaga o lo’o nofo va’avaaia i le Sadies by the Sea ae o le isi 200 o le au malaga o lo’o nofo va’avaaia i le Tradewinds Hotel. 

 

Ua augani atu le afioga i le lutena kovana, le kovana ma foma’i, i le atunu’u mo i latou uma e le’i faia tui puipuia o le koviti-19, ina ia faia nei o latou tui. 

 

Sa fesiligia e le au tusitala le lutena kovana, pe i ai ni fa’asa fou ua fuafua i ai le malo, ona o lea ua maua le fa’ama’i Koviti-19 i le atunu’u. Ae tali mai Talauega, e leai e fa’auau lava i le tulaga o lo’o i ai nei. 

 

Sa ia fa’ailoa foi, e fa’aauau pea fuafuaga ua ma’ea ona fa’atulagaina mo malaga a le Hawaiian Airlines i le va o Honolulu ma Amerika Samoa e o’o atu i le masina o Tesema.