Ads by Google Ads by Google

Tatala fa’amanuiaga tau tupe mo tagata faigaluega a le malo

ausage@samoanews.com

Ua faalauiloa aloaia e le afioga i le ali’i Kovana ia Lolo Matalasi Moliga i sana tusi i Fa’atonusili ma Fa’auluuluga o Matagaluega ma Ofisa Tumaoti a le malo, le toe tatalaina lea o le fa’amatu’u atu o fa’amanuiaga tau tupe faale tausaga (annual increments) mo tagata faigaluega a le malo.

 

O le a amata mai i le aso 1 o Oketopa, 2018 atoa ai ma le aga’i atu i luma, o le vaega taimi lea na taua e le ali’i Kovana i lana tusi o le a toe amata fa’agaioi ai faiga uma mo le toe fa’amatu’uina atu o nei fa’amanuiaga tau tupe fa’aletausaga mo tagata faigaluega.

 

E pei ona taua e Lolo i lana tusi i le aso 15 o Oketopa e fa’apea, ina ua fa’atoa tula’i mai le la nofoaiga i le aso 3 Ianuari, 2013, na la matua fa’ailoa ai le ave le fa’amuamua e fa’atonutonu ai tulaga o tupe fa’aalu i soo se auala, ina ia mautinoa e tulaga lelei ma le malosi o le itu tau tupe a le malo.

 

O le taimi nei, o le lagolago malosi a le Fono Faitulafono ua maitauina ai tulaga manuia i tupe maua a le malo fa’alotoifale.

 

E ui la o lea ua fa’alauiloa le fuafuaga ina ia aveesea ai le vavao mai le fa’amatu’u atu o fa’amanuiaga tau tupe mo tagata faigaluega, e le o taofia ai lava le naunau o le malo ina ia pulea ma le lelei auala e fa’asoasoa ma maua mai ai tupe lotoifale.

 

Mo le silafia, o loo fa’aauau pea le tumau o taumafaiga e taofiofi ai tulaga o le soona fa’aalu o tupe a le malo talu ona fa’amamafa mai i le aso 4 o Ianuari, 2013, peita’i, o ofisa uma o lo o mana’omia le fa’aaogaina o a latou tupe lotoifale e fa’atupe ai manaoga pito sili ona taua, o le a mafai ona iloilo ta’itasi talosaga e tuuina mai.

 

Ae mo le mataupu i fa’amanuiaga tau tupe e tatau ona fa’amatu’u atu ta’i tausaga, ua aloaia nei le fa’aiuga e aveese ai le vavao sa i ai, ae ua aloaia le fa’amatu’u atu. O le Matagaluega o le Paketi a le malo, atoa ai ma le Matagaluega e Pulea Tagata Faigaluega, o le a galulue fa’atasi mo le iloiloina o totogi ma faamanuiaga mo tagata faigaluega taitasi, aemaise ai lava i latou e agava’a i nei fa’amanuiaga tau tupe.

 

O le aso 1 o Oketopa o le tausaga nei lea ua fuafuaina, o le aso lea e amata faia ai iloiloga mo le fa’amatu’u atu o nei fa’amanuiaga.

 

Ae avea ai fo’i lenei avanoa matou te fa’afetaia ai tagata faigaluega a le malo, ona o le avanoa sa mafai ai ona outou fa’ataulaga ofo le taofia o le fa’amatu’u atu o nei fa’amanuiaga tau tupe.

 

Na taua e le ali’i Kovana le malamalama lelei o le malo i le tulaga maualuga ua i ai le tau o le soifuaga, peita’i o le agaga maualuga o le malo, ia mautinoa e leai se tagata faigaluega e fa’amalolo mai lana galuega ona o lu’itau i le taumafai lea e fa’amalosia le itu tau tupe a le malo.

 

Na tuuina atu fo’i e le Fa’atonusili o le Matagaluega o Tagata Faigaluega a le malo ia Eseneiaso J. Liu sana tusi i Fa’atonusili ma Faauluuluga o Matagaluega ma Ofisa Tumaoti a le malo, mo le tauaaoina atu lea o fa’amaumauga uma e mana’omia mo tagata faigaluega e agava’a i nei fa’amanuiaga tau tupe.