Pago Pago, AMERIKA SAMOA

O le taeao o le aso Lua, Tesema 29, na tatala aloa’ia ai le Fale Ta’alo fou o le Matagaluega o Talavou ma Tina  i Tafuna, i le nofoaga sa i ai le ofisa o Fitafita Tuai.

Ua tula’i le faleta’alo fou, ua iloga lona tu mai, o se galuega ua mae’a fausia lelei, e tusa o le ata na mafaufauina, ia mautu se faleta’alo mo ta’aloga Volley Ball ma Basketball, atoa ma Faipelega i le atunuu, o ta’aloga e ao ina faia i totonu o se faleta’alo ma maimoaina e le to’atele o tagata o tapua’ia faiva o talavou o fa’atauva i fa’agatama.

Ina ua to’ai taunuu le afioga Kovana Lolo Moliga ma le Faletua, Cynthia Moliga mo le fa’amoemoe, ona amatalia loa lea o le sauniga i fafo o le Faleta’alo fou. O le susuga le Faife’au Aso Fitu o le Toe Afio Mai, Taitai fo’i o lea Ekalesia i Amerika Samoa nei, Pr Uili Solofa sa avea ma ta’ita’i o le sauniga mamalu.

O le faletua o Cynthia sa ia ootia le lipine, ina ia tatalaina faitoto’a o le Faletaalo ae sausauina ma fa’apa’ia, e lana susuga Patele Asalemo Asalemo o le Ekalesia Katoliko Roma. 

Mai le to’atele sa aofia, sa va’aia le aotelega o ta’ita’I o Ekalesia eseese, fa’apea sui o matagaluega a le malo. O lenei le toe galuega o le a tatalaina e le faigamalo a Lolo ma Lemanu.

E moni upu a le atunuu, ua fa’atoetoe ae o se ala ua oo, ua iloga toe galuega ma le lima lelei o le agaiotupu ma le falefa o le aiga Sa le Malama. E moni lava, o foliga o le fau mea, e iloga i ana galuega na fai. O se tasi lea o fuaitau, na saunoa i ai le kovana sili, i lana toe lauga ma fa’ailoa ai le agava’a o le tamaitai Fa’atonu Sili o Galuega, Faleosina Faiai Voigt.

Saunoa Voigt i le tala o le galuega. “O le ata na tusia ma pasia mai e le A &E a le matagaluega o Galuega Lautele a le Malo ina ia fausia aga’i i ai le fale lenei, ma pasia ai fo’i e ali’i pasi fale o le matagaluega o galuega lautele lava a le tatou Malo. Mai le amataga e fa kamupani faufale sa tauofo, ma ua pasia ai le ofo na taua’aoina e Nana’s Construction ma ua latou fa’atautaia ai lenei galuega i le vave ua tatou fa’aulufaleina ai nei. O le tau o le galuega na malo ai i latou e $2.69 miliona, peita’i e le’i aofia i lea tau le pakaga ua mae’a fa’asimaina nei, le vasegao auvai i le lotoa atoa ma Pa ua mae’a si’omia ai nei. Peita’i ina ua toe fa’ae’e atu ia i latou nei vaega e tolu o le galuega, ua toe suia ai le tau ua mae’a ai nei le galuega i le $3.95 miliona.”

O le maualuga o le fale ua tula’i mai ai nei e 36futu ma ua tatau ona talafeagai ma le fausaga o se maota fogafaletolu, peita’i ua na’o le faleta’alo fogafalelua, fa’amaualuga lona taualuga, ia gafatia ona ausia maualuga o faleta’alo mo ta’aloga fa’atauva fa’avaomalo.

I le foloa muamua o le maota lea ua mae’a fa’atutuina faleta’ele ma faleuia e le fanau a’o ta’a’alo fa’atauva, o isi potu mo galuega fa’atino e sapaia ai le to’atele e gasolo mai e maimoaina ta’aloga, faapea ma potu mo ofisa.

Ua saunia nisi potu i lea lava foloa e fa’atautaia ai maimoaga a nisi e to’atele e gasolo ane i le faleta’alo. Ua i ai foi potu fono ma nisi o mea uma ua mae’a fa’avasega i ai le fogafalelua o lea lava faleta’alo matagofie. 

I le sauniga i totonu o le Maota sa fa’asolo ai lauga patino o le aso. Sa faafetaia le tina o le pule sili o le galuega ua mataina, Fiapa’ipa’i Tuaolo Fruean, aua ana le mata’alia le Agaiotupu, e le tino se galuega a le Aufaigaluega ua avea ma aufaipese fa’apitoa o vi’iga o le Atua mo lenei sauniga tele.

Na fa’afetaia lea o le Matagaluega o le Initeria fa’alotoifale ma lana pulega, Lydia Faleafine Nomura mo le sao matagofie o le seleni ua mae’a lelei ai lenei galuega ua tutula’i nei. Ua faafetaia fo’i le matagaluega o Galuega Lautele.

O lana fa’afetai fo’i sa ia fa’afetaia lana Kapineta ma le aufaigaluega uma a le malo, “Mo lenei valu tausaga sa avea ai i la’ua ma Lemanu Peleti Mauga ma tautai o le Sa o le atunuu. Sa tatou alofoe fa’atasi, sa outou talia le tetele atu i nisi taimi, o sasa lava o le folauga, sa outou inu i ai ona o le onosa’ia o faiva fita I taimi e lutaluta ai le tai o le folauga. Sa tatou fiafia fa’atasi pe a o’o ina taula lelei ma faitau ‘ai o fua lelei o galuega, e pei fo’i o le Aso.”

“Le tupulaga talavou, sa va’aia lava lo outou tuufesili pe a mai se sao o lenei faigamalo mo outou, o le lumana’I o Amerika Samoa. Ua mae’a lenei fale, tau ina ia outou iloa, sa ma’ua mafaufauina mea lelei, ia outou gafatia lu’iga o le soifuaga i le lumana’i, ia manuia outou faiva, ia tele fo’i se manuia e maua ai e le Malo, pe a outou atamamai ma agava’a i fa’agatama, e maua ai se tamaoaiga tausi o outou ma outou aiga, a’o se ala fo’i e fa’atupe ai lo outou soifua saili i a’oa’oga i Kolisi ma Iunivesite i fafo.”

O lana toe fa’afetaia o le tapuaiga ma a le au failotu, i so’o se fata faitaulaga ua mae’a fa’atumauina i le atunuu, aua o lea ua tino nisi o galuega sa tapua’ia, fa’afetai fo’i mo le taimi umi sa nofo tatalo ai ma o la’ua nofoaiga lea ua toe o se aso ona mae’a lea.

“Fa’afetai foi mo le tula’I mai o le afioga Lemanu ma le faigamalo fou, aua o le a se sao ua le mae’a lelei, po’o se faiva e le’I fa’ataunuuina, ia sagai a’e ai o le tai, na te fa’amae’aina na faiva.”

O le sao o le tausi ia Pa’i Tuaolo Fruean sa ia tula’i ma fa’afetaia le avanoa sa maua e le Nana’s Construction latou te fa’atinoa ai lenei galuega. O se tasi lenei o galuega ua sili ona tele ua latou fausia, ma ua i ai kamupani sa fesoasoani ane mo masini ma isi mea faigaluega e fa’aaoga ona o le mana’omia ua vave ona fia fa’amae’a lelei le galuega. Sa i ai meaalofa o ata o le faleta’alo fou, ua mae’a fa’ava’a leleia na taua’aoina lea mo le afioga le Kovan, le afioga le Fofog Fetalai o le maota o Sui a le fono faitulafono Savali Talavou Ale, Faleafine Nomura, ma le ata mulimuli ua taua’aoina lea ia Voigt.

O le taimi na atofaina mo le matagaluega o Talavou ma Tina o Amerika Samoa sa tula’i le susuga le fa’atonu, Pa’u Roy Ausage, ma ia tali fuaitau e fa’afetaia le Kovana ma le faigamalo atoa, le vasega o ta’ita’i ekalesia i le atunuu ma e uma ua aofia mo le fa’amoemoe matagofie ua feiloa’i ai.

“E fa ni upu taua o la tatou aganuu e fa’atauaina i le fa’afetai fa’alelava o le aso. Muamua o le suafa o le alo tamatai o le TuiAtua o Talaleomalie. Lona lua “O le masina ua atoa” o le igoa ipu a le Vaimagalo, ma le lona tolu, “Aumaia Atua ua tasi” o le igoa ipu a le TuiAtua ma le fa, “Malomua” le igoa ipu o Nafanua.”

“Ua malie le Papaigalagala, ua malie le papa o le fa’atolotologatama, ua malie le faga i Pa’au ma le faga i Lalau. Lau Afioga le Kovana sili Lolo Moliga, o lau tautua ua oloa lu’ulu’u le atunuu ma o matou tagata, fa’aetai pule fa’afetai fa’asoa fa’afetai, faafetai tele lava. E le o se ta ma se lavea, E le o se faiva foi e leai ma se maumau. Ni sese o le matagaluega nei ma o matou tagata augavale, lafo ia i le auau o peau mo fogava’a tele ma natia ai i fatualavai ni o matou leaga, ua e poto lava le tautai, ae oo lava ina pisi le moana i le itu i ama.”

“Le faigamalo fou, e moni ai upu a le tama Faleata, sau ia ina alu, lo’u atali’I e, Ia malamalama ou mata ma ia tafetoto ou ala. A sunu’i le to’oto’o ae soata ma tuiefu le vanimonimo, o le a matou tu’itu’i pea le mulipapaga ma oliolitau a matou ti’a, e fesoasoani mai.”

Ona molita’i lea o meaalofa na tapena i ai le matagaluega mo le afioga Kovana Lolo Moliga ma le Faletua, o le Siapo tele, o le Ie o le Malo,  ma le lavalava ae a le faletua, ma ua taua’aoina fo’i ata ua mae’a fa’ava’aina lelei, ma le fa’amau fa’ailoga ua tapena e taualoa ai le tautua matavela ua mae’a lelei a le tofa le To’oto’o Lolo Matalasi Moliga ma le Tausiali’i Cynthia Malala Moliga.

Na toe tataloa fa’amae’a le sauniga e Pr Uili Solofa, ma alo faiva ai i fa’aloaloga ma le aiga fiafia o lea fa’amoemoe le to’atele o le atunu sa aofia potopoto i lea aso.