Ads by Google Ads by Google

Tatala i tua mai le Toese le ali’i na ia gaoia le ta’avale a le isi aiga


[ata: foa'i]
ausage@samoanews.com

Pago Pago, AMERIKA SAMOA - O le ali’i talavou lea na ta’usala i lona ave faagaoi o le ta’avale a se aiga i Ottoville, ua tatala nei i tua mai le Toese i Tafuna ina ua manatu le Fa’amasinoga Maualuga, ua lava aso e 199 lea na taofia ai o ia i le Toese e fai ma ana faasalaga i lenei mataupu, ae o le a nofovaavaaia o ia mo le 5 tausaga i lalo o tuutuuga e ao ona usita’i i ai.

 

O le vaiaso nei lea na tula’i ai le susuga a Mealeaga Ale i luma o le afioga i le ali’i Fa’amasino Sili lagolago ia Fiti Sunia mo le tuuina atu o lana fa’asalaga. O le susuga i le ali’i Loia Fautua lagolago ia Rob McNeill na tula’i mo Ale, ae o le Tamaitai Loia Sili lagolago ia Laura Garvey na fai ma sui o le malo.

 

Na ulua’i tu’uaia e le malo ia Ale i le moliaga mamafa o le talepe fale i le tulaga lua ma le gaoi, o le vaega C lea o solitulafono mamafa, lea e mafai ona faasala ai se tasi i le Toese mo le umi e le sili atu i le 7 tausaga, pe faasala foi i le salatupe e le silia i le $5,000, poo le faasala foi i faasalaga uma ia e 2.

 

Ae i lalo o se maliliega na sainia e Ale ma le malo, lea fo’i na talia e le Fa’amasinoga Maualuga i le masina o Mati o le tausaga nei, na malie ai Ale e tali ioe i le moliaga mamafa o le gaoi. I lana tali ioe i lea moliaga e pei ona ta’usala ai o ia e le Fa’amasinoga, na ta’utino ai Ale e fa’apea, i le vaveao o le aso 19 o Oketopa 2019, na ia ulufale faamalosi ai i totonu o le Fale Taavale a le aiga na aafiai Ottoville ma le faamoemoe e faataunuu ai le solitulafono o le gaoi.

 

A o i ai i totonu o le Fale Taavale, sa ia alu ai loa ma aumai faagaoi le ta’avale sa paka ai i totonu ma ti’eti’e ai loa e momoli lana uo.

 

Ina maua le avanoa o Ale mai le Fa’amasinoga, sa ia faatoese ai loa e tusa ai o lana solitulafono, ma ia talosagaina ai se isi avanoa se’i toe fo’i atu ai i tua i lona aiga e tausi si ona Tina ma lagolago i le atina’eina o lona aiga.

 

Na talosaga McNeill i le Faamasinoga mo se avanoa e faasala ai Ale i se faasalaga faanofovaavaaia, ina ia maua ai le avanoa e alu ai i tua e fai sona aoga i lona aiga. Na taua e McNeill e fa’apea, o Ale, o se ali’i talavou ua sese auala na ui ai, ma mafua ai loa ona aafia o ia i lenei solitulafono.

 

Na taua atili fo’i e McNeill e fa’apea, talu ai o lea faatoa nofosala lava lea o Ale i se solitulafono mamafa, atoa ai ma le leai o se isi na aafia pe manu’a i le taimi na faatino ai lana solitulafono, ua ia manatu ai, e agavaa o ia mo se faasalaga faanofovaavaaia, e aunoa ma le toe tuuina atu i ai o se isi taimi na te tuliina i le Toese i Tafuna.

 

Na lagolagoina e Garvey le talosaga a le itu tete’e, ma ia talosaga ai loa i le Faamasinoga ina ia talia le fautuaga a le Ofisa Faanofovaavaaia, ma faasala Ale i se faasalaga nofovaavaaia.

 

I le mae’a ai ona iloilo e le Fa’amasinoga o faamatalaga uma lava e uiga i lenei mataupu, e aofia ai faafinauga a Loia, o le faatoesega a Ale, atoa ai ma le ripoti a le Ofisa Nofovaavaaia, ua manatu ai le Faamasinoga e agava’a le ua molia mo se faasalaga nofovaavaaia.

 

Saunoa le afioga a Sunia e fa’apea, e tusa ai ma le fautuaga a le ripoti sa saunia e le Ofisa Nofovaavaaia, o lo o taua ai tulaga nei, o le ali’i ua molia, o se tagata sa lelei le a’oa’oina o ia mai lava i lona laititi seia avea ma tagata matua, i’u lana aoga i le Aoga Maualuga ma maua lana galuega e faigaluega ai.

 

O ia fo’i o se talavou sa lelei ma malosi fautuaga a ona matua sa aoaoina ai o ia, ina ia iloa amio pulea ma filifili i le mea sa’o ae le o le mea leaga. Ae ui o lea, e matua matuia lava le solitulafono e pei ona ta’usala ai o ia e le Fa’amasinoga, ona o lona ave faagaoi o se taavale ma faafoe i luga o le alatele a o ‘ona.

 

Soo se tagata lava na te tagofia le ‘ava malosi ma ‘ona ai ao ia faafoeina se ta’avale i luga o le alatele, e faatusa lena tagata o se a’upega mata’utia e oti ai se tagata. Saunoa Sunia e fa’apea, pe ave taavale le tagata ao ‘ona pe savali fo’i i luga o le alatele ao ‘ona, e tutusa lava taunuuga e tutupu mai ai. E manatu le Faamasinoga, o le ituaiga tagata tonu lava lea na i ai Ale i le vaveao na ia faafoeina ai le ta’avale ao ‘ona.

 

Na fia malamalama le Faamasinoga i le mafua’aga ua le molia ai e Ale le ua molia i le solitulafono o le ave ta’avale ‘ona. Na fia iloa foi e le Faamasinoga le mafua’aga e lei aofia ai i totonu o faamaumauga o lenei mataupu se faaupuga faapea, “sa tagofia e le molia le ‘ava malosi i le taimi na ia faafoeina ai le ta’avale”.

 

E talitonu le Faamasinoga, e i ai le taimi e tuu avanoa ai tagata e faamalosia le Tulafono i tagata ua aafia i le soliga o le Tulafono, ma avea ai loa ma auala ua ese ai le itu ua aga’i i ai le faamalosia o le tulafono.

 

Saunoa Sunia e faapea, mai faamatalaga uma lava e uiga i lenei mataupu, e leai ma se faamatalaga se tasi o loo i ai e atagia mai ai se faamatalaga e faatatau i le tagofia e Ale o le ‘ava malosi i le taimi o le solitulafono, poo lona faasu’ava fo’i i le taimi na ia faafoe ai le ta’avale.

 

Na tali Garvey ma saunoa e fa’apea, o lo o manino i le parakalafa lona 8 o le tagi tusitusia a le malo, se faamatalaga ta’utino a Ale i Leoleo e faatatau i lo latou onana lea ma aua uo i le po na tula’i mai ai le faalavelave.

 

E 7 tausaga na manatu le Faamasinoga e faasala ai Ale i le Toese i Tafuna. Ua faamalumalu le tuliina e le ua molia o lea faasalaga faa falepuipui, ae ua manatu le Faamasinoga e nofovaavaaia Ale mo le 5 tausaga i lalo o poloaiga e ao ona ia usita’i i ai.

 

O le a tuli e le ua molia masina e 20 i le Toese, ae ua manatu le Faamasinoga, ua lava aso e 199 lea na taofia ai Ale i le Toese ao faatalitali ai se faaiuga o lana mataupu e fai ma ana faasalaga i lenei mataupu. O le paleni o loo totoe ai, o le a faamalumalu lona tuliina sei vagana ua tuu atu se isi poloaiga a le Faamasinoga, ae o le a tatala Ale i tua i lalo o tuutuuga e ao ona usita’i i ai.

 

Na faailoa e Sunia ia Ale e faapea, o le taimi lava e pu’e faapagota ai o ia ma molia i le tulafono, e tutusa lava o ia ma isi foi pagota i le silasila a le Fa’amasinoga. E le popole le Faamasinoga poo ai o ia ao ai fo’i le aiga e tupuga mai ai. Afai foi na te solia se tuutuuga o lana nofovaavaaia, e faasala foi o ia e le Faamasinoga faapei ona faasala o isi tagata nofosala, e le tuua lava e avanoa ia te ia.

 

Na fautuaina malosi e Sunia ia Ale ina ia tausisi i poloaiga uma ua tuuina atu e le Faamasinoga ia te ia, e aofia ai le faasa lea ona ia toe soli se tulafono, faasa ona ia tagofia le ‘ava malosi poo fualaau faasaina, e mafai foi ona suesueina lona tino ina ia mautinoa na te le o toe tagofia le ‘ava malosi poo fualaau faasaina.

 

O afioga i Faamasino Lagolago ia Mamea Sala Jr ma Tunupopo Alalafaga Tunupopo na lagolago ia Sunia i lenei mataupu.