Ads by Google Ads by Google

Tatala i tua mai le Toese i Tafuna le susuga a Steve Tuatoo


[ata: foa'i]
ausage@samoanews.com

Pago Pago, AMERIKA SAMOA - 

 

O le vaiaso nei lea na tatala ai i tua mai le Toese i Tafuna le ali’i sa avea ma Leoleo o le malo o Amerika Samoa ia Steve Tuatoo, ina ua manatu le Faamasinoga Maualuga, ua lava masina e 25 lea na taofia ai o ia i le Toese e fai ma ana fa’asalaga i le mataupu e pei ona ta’usala ai o ia.

 

O Tuatoo, o ia lea e toatolu i ai ali’i na pu’e faapagota e Leoleo i na ua faia se osofaiga i le masina o Novema o le tausaga e 2017, i le tau sailia lea o i latou o lo o aafia i le umia atoa ai ma le faatauina atu o fualaau fa’asaina i le atunu’u. 

 

O i latou e to’atolu na pu’e faapagota ina ua faataunuu e Leoleo poloaiga a le Fa’amasinoga e sailia ai ni nofoaga se 2 i le aso 9 o Novema o le 2017 e aofia ai Tuatoo, o le susuga a Cody Woods ma Lemalie Taisia.

 

O le vaiaso nei lea na tula’i ai le susuga a Tuatoo i luma o le afioga i le Faamasino Sili ia Michael Kruse mo le lauina o lana fa’asalaga. O le ali’i Loia Fautua ia Ryan Anderson na tula’i mo ia, ae o le tama’ia’i Loia Sili lagolago ia 

 

Na ulua’i tu’uaia Tuatoo i le moliaga o le umia faasolitulafono o vaega o le laau faasaina o le mariuana, tasi le moliaga o le umia faasolitulafono o se a’upega e faasaina i le teritori, tasi le moliaga o le umia faasolitulafono o se aupega e le i lesitalaina, faapea ai ma le moliaga e tasi o le sola ese lea mai le atunuu ina ia le mafai ai ona molia o ia i le tulafono, o soltulafono mamafa uma ia e pei ona tu’uaia ai le ua molia.

 

I lalo o le maliliega na sainia e le ua molia ma le malo, lea fo’i na talia e le Fa’amasinoga Maualuga i le masina na te’a nei, na malie ai Tuatoo e tali ioe i le moliaga o le umia faasolitulafono o vaega o le laau faasaina o le mariuana, o le vaega D lea o solitulafono mamafa, faapea ai ma le moliaga o le umia o se aupega e le i lesitalaina, o le vaega A lea o solitulafono mama.

 

I le tali ioe ai o Tuatoo i moliaga e lua e pei ona ta’usala ai o ia e le Fa’amasinoga, sa ia ta’utino a e faapea, i se taimi o le aso 9 o Novema o le tausaga e 2017, sa ia umia ai fualaau faasaina ma se aupega e le i lesitalaina ina ua osofa’i e Leoleo lona fale i Alofau. Sa ia taua atili e faapea, o lana gaioiga i lea aso, sa le tusa lea ma ala o le tulafono.

 

Talu mai le aso na pu’e faapagota ai Tuatoo ina ua toe taliu mai i le atunuu i le tausaga e 2018, i le tuana’i ai o nai masina na sola ese ai ma Amerika Samoa, na taofia pea lava  o ia i le Toese i Tafuna e aunoa ma le tatalaina o ia i tua, ina ua le mafai ona ia totogi le tupe e $100,000 na faatulaga e le Faamasinoga e tatala ai o ia.

 

Ina ua maua lona avanoa mai le Fa’amasinoga, na faatoese ai le ua molia e tusa ai o lana solitulafono sa faia, ma ia talosagaina ai se isi avanoa mo ia se’i toe 

 

Na taua e le ua molia le sese o le gaioiga sa ia faia, ma ia lagona ai lona salamo moni. I tausaga e tele sa tautua ai i le malo o Amerika Samoa o se ali’i Leoleo, sa ia tautua ai ma le faamaoni, peita’i ina ua latalata i le faaiuga o lana auaunaga i le malo, na faafuase’i ai ona aafia o ia i suiga faafuase’i o le olaga, ma i’u ina aafia atu ai lava ma ia i tulaga tau fualaau faasaina. 

 

Sa ia ta’utino i le Fa’amasinoga, e le o ia o se tagata leaga pe tulei fualaau faasaina, ae o ia o se tagata sa tautua malosi mo le tausiga o lona to’alua ma lana fanau.

 

Na talosaga le ali’i loia fautua ia Anderson i le faamasinoga mose faasalaga faanofovaavaaia mo Tuatoo, ma ia lava le 25 masina lea na taofia ai o ia i le Toese a o faatalitali ai loa faamasinoga e fai ma ana faasalaga i lenei mataupu. Sa ia taua fo’i le malie o Tuatoo na te toe totogi le tupe a le malo na fa’aalu e toe faafo’i mai ai o ia i le atunuu ina ia mafai ona ia tali i ona moliaga.

 

Na lagolagoina e le loia a le malo ia Garvey le talosaga a le itu tete’e mo se faasalaga faanofovaavaaia mo Tuatoo, atoa ai ma se poloaiga na te toe totogi ai le tupe a le malo na fa’aalu e toe aumai ai o ia i le teritori.

 

Na taua e le Fa’amasinoga ina ua mase’a se malologa, ua mae’a ona tuu mai e le Fono le malosi i le Fa’amasinoga na te faia ai le faaiuga mo soo se tagata e ta’usala i le soli o tulafono tau i le umia o fualaau faasaina i le teritori, ma ia fuafua fo’i lea faasalaga i le siosiomaga ma le gaioiga sa faia e le tagata ua nofosala.

 

E ui i le talosaga a Tuatoo fai mai e le o ia o se tagata leaga pe tulei fualaau faasaina, ae o ia o le tagata lelei toe tausi aiga, na taua e le Fa’amasinoga e faapea, e le o gatasi le ta’utinoga a le ua molia ma ripoti ua maua e le Faamasinoga e faatatau i le gaioiga sa faia e le ua molia.

 

O le suesuega a Leoleo e faatatau i le mataupu e pei ona ta’usala ai le ua molia na amata mai i le masina o Ianuari o le tausaga e 2017, i le taimi a o avea pea Tuatoo ma Leoleo o le malo.

 

Na taua atili e le Fa’amasinoga, o mau faamaonia na maua e Leoleo i le fale a Tuatoo i Alofau na faamaonia ai lona aafia i fefaatauaiga o fualaau fa’asaina. Ae sili ai i lo lena, o le gaioiga na ia faia e sola ese ai ma le atunuu ina ua tatala o ia mai le Toese i Tafuna.

 

E ui i nei faamaumauga uma, ua manatu le Fa’amasinoga, e agavaa Tuatoo mo se faasalaga faanofovaavavaia.

 

Mo le moliaga o le umia faasolitulafono o fualaau faasaina, e 5 tausaga e faasala ai Tuatoo i le Toese mo le salatupe e $5,000.

 

Mo le moliaga o le umia faasolitulafono o se aupega e le i lesitalaina, e 1 le tausaga i le Toese ma le salatupe e $1,000.

 

O ia faasalaga e tuli eseese, peita’i, o le a faamalumalu le tuuina atu o Tuatoo i le Toese mo le 6 tausaga, ae o le a nofovaavaaia o ia mo le 5 tausaga i lalo o tuutuuga a le Faamasinoga e ao ona usita’i i ai.

 

O le a ia tulia masina e 20 i le Toese i Tafuna, e aofia ai ma masina e 25 lea ua mae’a ona ia tuliina. Lona uiga, ua agavaa ona tatala o ia i tua ina ua ova atu masina ua uma ona ia tulia nai lo masina ua poloaina e le Fa’amasinoga.

 

E $10,250.28 le tupe e tatau ona toe totogi e Tuatoo i le malo, atoa ai ma lana salatupe e $5,000.

 

Ua poloaina o ia e saili sana galuega e totogi ai ana sala ma ia avea o ia ma tagatanu’u lelei e tausisi i tulafono a le malo. E le tatau ona ia toe tagofia le ‘ava malosi poo fualaau fa’asaina, o le a faia fo’i se suega i lona tino e faamaonia ai lona usitaia o nei tuutuuga.

 

O le faasalaga nofovaavaaia a Tuatoo o le a tuliina uma lea i le teritori, sei vagana ua vave mae’a ona totogi ana salatupe ona faatoa mafai lea ona toe iloilo e le Faamasinoga se talosaga mai le itu tete’e e tusa ai o le talosaga ina ia aga’i atu Tuatoo e mafuta ma lona to’alua ma lana fanau i le malo tele o Amerika.

 

O afioga i ali’i Fa’amasino ia Faamausili Pomele ma Muasau T. Tofili na lagolago ia Kruse i le iloiloina o se faaiuga mo Tuatoo.

 

FAAMAUMAUGA A LE FAAMASINOGA

 

Na muamua pu’e faapagota e Leoleo ia Woods ma Taisia, faatoa pu’e faapagota ai Tuatoo i le afiafi o le aso 9 lava lea o Novema 2017 mai lona fale i Alofau.

 

O Woods na pu’e faapagota mai e Leoleo mai lona fale i Taputimu, ina ua maua e Leoleo fualaau faasaina faapea ai ma se vaega tupe tele lava e silia i le $50,000. Ua maea le mataupu a Woods ina ua tali ioe o ia i le moliaga o le umia faasolitulafono, ma o loo nofo vaavaaia o ia mo le 5 tausaga i lalo o tuutuuga e aofia ai lona tuua o le atunuu ae aga’i atu i le malo tele o Amerika e saili ai se polokalame e fesoasoani ai i le faafitauli o lona tagofia o fualaau faasaina.

 

O le susuga a Taisia ua toe faafo’i i Samoa ina ua mae’a ona tuli lana faasalaga faa falepuipui e 20 masina, o se tasi lea o tuutuuga o lana nofovaavaaia.

 

Ua poloaina e le Faamasino Sili ia Kruse le malo ina ia faatamaia uma mau faamaonia na maua mai i le osofaiga lenei a Leoleo, ma ia molimauina e le Masela o le Faamasinoga lea gaioiga.