Pago Pago - AMERIKA SAMOA

I le silia ai i le 3 tausaga o taofia pea le susuga a Sio Godinet Jr i le Toese i Tafuna e faatali ai taualumaga o le mataupu e pei ona tu’uaia ai o ia e le malo i lona le usitaia o tulafono tau i Fualaau Faasaina, o le vaiaso na te’a nei i le mae’a ai o le aso lona 3 talu ona faagasolo lona faamasinoga autu, na faia ai loa e le Faamasinoga Maualuga le faaiuga e faaleaoga ai le tagi a le malo faasaga ia te ia, e mafua mai i le sese o moliaga sa tu’uaia ai o ia.

Na umi se taimi na faailoa ai e le afioga i le Fa’amasino Sili ia Michael Kruse le mafua’aga o le faaiuga a le fa’amasinoga e tatala ai i tua Godinet Jr, ma le faamoemoe o se taimi o i luma o le a tuu aloaia mai ai se faaiuga tusitusia a le Fa’amasinoga.

O le mae’a ai ona folasia e le malo o a latou molimau e 5 i le aso lona 3 o le Fa’amasinoga autu a Godinet Jr, na folasia ai loa e le itu tete’e sa latou talosaga i le Fa’amasinoga e faaleaoga ai le tagi a le malo faasaga i le susuga a Godinet Jr, ona e talitonu i latou e le lava mau na folasia e le malo e lagolago ai le latou tagi.

O le ali’i Loia Fautua lagolago ia Ryan Anderson na tula’i mo Godinet Jr ae o le tamaitai Loia ia Kristine Soule’ na tula’i mo le malo.

I le talosaga a le itu tete’e na taua ai e Anderson e faapea, e leai ma se mau faamaonia na folasia e le malo e fesoota’i ai Godinet Jr i le solitulafono e pei ona tu’uaia ai o ia e le malo, ina ua faataunuu e Leoleo Suesue le poloaiga a le Fa’amasinoga e saili ai lona fale ma ana ta’avale i le afiafi o le aso 15 o Me, 2018.

I lea osofaiga, e to’atolu i latou na taofia faapagota e Leoleo. O i latou nei e aofia ai Godinet Jr, o le tamaitai o Meriko Lomu ma le alii o Lyon Grey. 

Na molia Lomu ma Grey i le umia faasolitulafono o fualaau faasaina o le aisa ma le mariuana, atoa ai ma le umia faasolitulafono o fualaau faasaina ma le faamoemoe e tulei ma faatau atu i isi tagata. E tele fuaalau faasaina na maua e Leoleo i le tamaitai o le isi fale tuufua a Godinet Jr na maua i ai Lomu ma Grey i totonu.

O Godinet Jr na maua i totonu o lona fale nofo, e aunoa ma ni fualaau faasaina na maua ia te ia, se’i vagana ai le tinoitupe e silia ma le $80 na maua ia te ia, e pei ona taua e le malo i le latou tagi tusitusia.

E 4 moliaga mamafa na tu’uaia ai e le malo le susuga a Godinet Jr, o ia moliaga e aofia ai moliaga o le umia faasolitulafono o le aisa ma le mariuana, faapea ai ma le umia faasolitulafono o aisa ma le mariuana ma le faamoemoe e tulei ma faatau atu i isi tagata.

Na matua tete’e malosi le itu tete’e i le tagi a le malo, ona o le latou talitonuga, e leai ni mau faamaonia e lagolago ai le tagi a le malo faasaga ia Godinet Jr. Na taua e Anderson e faapea, e leai ma se molimau na folasia e le malo na taua ai le maua o ni fualaau faasaina ia Godinet Jr.

E oo lava fo’i i le finauga a le malo e faapea na fesoasoani Godinet Jr ia Lomu i le tuleiina ma le faatauina atu o fualaau faasaina. Na finau le itu tete’e e faapea, e leai se molimau a le malo na faailoa mai ai, sa fesoasoani Godinet Jr ia Lomu i le faatauina atu o fualaau faasaina. Pau le molimau a le malo na manino i le faafofoga i le au iloilo iuga, sa i ai faatasi Lomu ma Godinet Jr i totonu o le ta’avale i le taimi na faatau atu ai e Lomu le pepa iila o loo i ai mariuana i se molimau faalilolilo a le malo ao matamata i ai Godinet.

Na finau Anderson e faapea, e le o manino i le molimau a le malo se tulaga faapea, sa fesoasoani Godinet Jr ia Lomu i le faatauina atu o fualaau faasaina.

Na matua tete’e malo le itu a le malo i le faafinauga a le itu tete’e. Na taua e le tamaitai loia sili lagolago ia Soule’ e faapea, na matua manino lava i le molimau a le tamaitai o Lomu, o le ta’avale a Godinet Jr lea sa fa’aaoga e kiliva ai ana fualaau faasaina.

Na finau le malo e faapea, na matua manino i le molimau a Lomu, o le ta’avale lava a Godinet Jr sa faalagolago i ai lana pisinisi o le tuleiina atu o fualaau faasaina. O le tele o taimi la te tietie ai i vaega eseese o le atunu’u ma Godinet Jr i lana ta’avale mo le pikiina mai o fualaau faasaina, atoa ai ma le tuleiina atu o fualaau faasaina i isi tagata.

E oo lava foi i le fale o Godinet Jr lea na osofa’i e Leoleo, e talitonu le malo, na silafia lelei e Godinet Jr gaioiga faasolitulafono i le faatauina atu o fualaau faasaina sa faagasolo i lona fale tuufau, ae leai lava ma sana tala na fai i ai. E i ai fo’i taimi e aga’i atu ai tagata e ula ma faatau fualaau faasaina i le fale tuufua a Godinet Jr, ona latou ave lea o tupe ia Godinet Jr, mulimuli ane tuu atu e Godinet Jr tupe ia Lomu e teu ma faaputu.

I le faaiuga o le faafinauga a le malo, na taua ai e Soule’, ua lava ma totoe mau faamaonia ua folasia e lagolago ai le latou tagi faasaga ia Godinet Jr.

I le mae’a ai ona iloilo e ali’i Fa’amasino o faafinauga a itu e lua, na folasia ai loa e le Faamasinoga la latou faaiuga.

Na teena e le Fa’amasinoga Maualuga le faafinauga a le itu tete’e e faapea, e le i lava molimau a le malo e lagolago ai le latou tagi faasaga ia Godinet Jr. Saunoa le Fa’amasinoga, ua matua lava ma totoe mau na folasia e le malo e lagolago ai le tagi faasaga ia Godinet Jr, na tuu atu ai le mataupu i aao o le Vaega Iloilo Iuga mo sa latou faaiuga. 

E ui e lei maua ni fualaau faasaina i le tino o Godinet Jr i le taimi na osofa’i ai e Leoleo lona fale, ae o le molimau a Lomu e faatatau i le fa’aaoga lea e Godinet Jr i lana ta’avale e fesoasoani ai i le faatauina atu o fualaau faasaina, ua manino mai ai i le silasila a le Fa’amasinoga, sa fesoasoani le ua molia ia Lomu ma isi tagata i le umia ma le faatauina atu o fualaau faasaina, 

Peita’i, e i ai vaega o le tagi tusitusia a le malo o loo tula’i mai ai se faaletonu e pei ona taua e le Fa’amasinoga, e pei o moliga ua faila faasaga ia Godinet Jr.

Na taua e le faamasinoga e faapea, o moliga ua mae’a ona faila e le malo faasaga ia Godinet Jr, o loo tu’uaia ai o ia i lona umia faasolitulafono o fualaau faasaina o le aisa ma le mariuana, faapea ai ma moliga e 2 o le umia faasolitulafono o fualaau faasaina o le aisa ma le mariuana ma le faamoemoe e tulei ma faatau atu i isi tagata.

I le silasila a le Fa’amasinoga, e le o sa’o moliga o lo o tu’uaia ai le ua molia, ona sa tatau ona aofia i le pepa o le tagi a le malo moliga o le umia faasolitulafono o fualaau faasaina e ala i lona lagolago ma fesoasoani ia Lomu ma isi tagata e umia faasolitulafono fualaau faasaina, faapea ai ma le umia ma le faamoemoe e faatau atu i isi tagata.

I le silasila a le Fa’amasinoga, e leai ni elemeni o aofia i le tagi lea na faaulu e le malo faasaga ia Godinet Jr, se’i vagana ai moliga o le umia faasolitulafono o fualaau faasaina, ae o lea e manino i mau na folasia e le malo, e leai ni fualaau faasaina ma maua ia Godinet Jr, se’i vagana ai lona fesoasoani ia Lomu ma isi tagata i le faatau atu o fualaau faasaina atoa ai ma le umia faasolitulafono o fualaau faasaina.

Talu ai tulaga faaletonu i moliga ua faila faasaga ia Godinet Jr, ma le le o gatasi o moliga ma le mea na tula’i mai, ua manatu ai le Fa’amasinoga, e faaleaoga le tagi ua faia faasaga ia Godinet Jr, ma faia ai loa le poloaiga e faasaoloto loa le ua molia mai le Toese i Tafuna.

MOLIMAU FAAI’U A LE MALO

E molimau faai’u e 2 a le malo e atoa i ai a latou molimau e to’a 5 e aofia ai le Leoleo Suesue Faapitoa ia Justin Thompsen ma le Leoleo Kapeteni ia Jackie Lagai, o ia lea o loo Vaavaaia le potu o lo o teu ai mau faamaonia a le malo.

Na faamaonia e Thompsen i lana molimau lona molimauina o le taimi na tuu atu ai e Lomu le pepa iila o loo i ai mariuana i le molimau faalilolilo a Leoleo, ao la i ai faatasi ma Godinet Jr i totonu o le ta’avale a Godinet Jr. Na taua e Thompsen le manino lelei o le vaai a Godinet Jr i le taimi na tuu atu ai e le molimau a Leoleo le tupe ia Lomu, ae tuu atu e Lomu le pepa iila o loo i ai lau mariuana i le molimau a Leoleo.

Na taua e le tamaitai Leoleo Kapeteni ia Lagai e faapea, o mau faamaonia ia na maua mai i le osofaiga a Leoleo i le fale o Godinet Jr i le afiafi o lea so 15 o Me, 2018, na avatu ma teu faalelei i totonu o le potu e teu ai mea molimau a Leoleo. O isi vaega o mau faamaonia na lago i fafo mo suega ma faamaonia ai, o mariuana ma aisa ia na maua i le fale o Godinet Jr i le taimi o le osofaiga.