Pago Pago - AMERIKA SAMOA

E pei ona fa’alauiloa i se poloaiga fa’alauaitele a le Kovana Sili, Lemanu Peleti Mauga i nai masina ua te’a, sa ia valaauina ai le Fono o le Fa’avae o Amerika Samoa mo lana tauaofiaga e amata atu i le aso 29 o Aukuso e o’o atu ia Setema 2, 2022. 

Ua ma’ea foi ona fa’ailoa i se tasi o poloaiga a le kovana e fa’apea, e 129 sui usufono o le Fono o le Fa’avae mai itumalo eseese i Amerika Samoa: 48 sui mai le Ma’upu (Tualauta), 21 mai Ma’oputasi, 18 o Ituau, 8 i le Taulatai; 7 sui mai Fofo; 6 mo Sua, 4 mai Vaifanua, Lealatua ma Leasina; 3 mai Saole; ae o isi uma itumalo e ta’itasi sui usufono e aofia ai ma Swains Island. 

Ma ua ma’ea ona tuuina atu i le Ofisa o le Kovana le lisi o suafa o sui usufono mo itumalo eseese ma ua fa’atulagaina o le taeao o le aso Gafua o le vaiaso fou, Aukuso 29 e tatala aloaia ai le Fono o le Fa’avae  i le Fale Laumei i Utulei. 

E valu mataupu - pe o suiga taufaaofi - na fa’amaonia i le masina o Me i le tausaga lenei e le Komiti Iloilo mo le Iloiloga o le Fono o le Fa’avae (Constitutional Review Committee). 

(O le fa’aliliuina i le gagana Samoa o suiga mo le Fa’avae e pei ona lipotia i lenei tala, sa saunia ia Iulai 22, 2022 e le Ofisa o le Fa’avae a le malo o Amerika Samoa, ma tuuina mai i le Samoa News ina ia manino lenei lipoti.)

Ua fa’ailoa e le KVZK-TV le fa’amoemoe e fa’asalalauina le Fono o le Fa’avae i le Ala-ata 2, ae maise i luga lana itulau i le Facebook. 

SUIGA MUAMUA

O le suiga muamua taufaaofi o le suiga e puipuia ai Tagata Tupuaga mai i Tua’ā Amerika Samoa. O lea mataupu e fa’aupuina fa’apea: O le a avea ma faiga tausisia a le Malo o Amerika Samoa le puipiuia o tagata tupuga mai i tua’ā Amerika Samoa le ‘ave’esea o o latou fanua atoa ma le lepetia o lo latou soifuaga fa’aSamoa, fa’apea ma la latou gagana, pe a lē talafeagai ma o latou manuia atoatoa. 

SUIGA LUA

O lea suiga e toe fa’atulaga ai nofoa o le Maota o Sui o le Fono Faitulafono, lea e 20 faipule. Ma o lo’o fa’ailoa i lea suiga le fa’aopopoina o faipule o le Itumalo Faafaipule Numera 12 Ituau ma le Itumalo Faafaipule Numera 15, Ma’upū (Tualauta).

O le a tuuina atu i le Fono o le Fa’avae le filifiliga mo sui fa’aopoopo o itumalo nei e lua. Ma i le taimi nei e ta’ilua faipule mai nei itumalo fa’afaipule ma e 20 nofoa o faipule i le Maota o Sui i le taimi nei 

SUIGA TOLU

O le mataupu lona tolu, o le Suiga o le Faate’aga - po’o o le Impeachment i le gagana peretania. 

O lea suiga taufa’aofi e fa’atulaga ai i le Fa’avae, Vaega 2, maga 26 le ulutala “O le Faateaga”, ma le fa’aupuga faapea:

(a) O le Kovana, Lutena Kovana, Faamasino Sili, Faamasino Lagolago, Faamasino Fesoasoani, Faamasino o le Faamasinoga Itumalo, e aofia uma i le Tulafono o le faate’aega, ma pe afai e faamaonia se solitulafono, o le a aveeseina mai lona tofiga.

(e) E faailoa mai e le Fono Faitulafono le auala, mafuaaga, ma le faatinoga o le faateaeseina e aofia ai faamaoniga o solitulafono mamafa, ma amioga ua atagia ai se pule ua sili ona le amiotonu, e pei ona faamatalaina e le Tulafono. 

(i) O le Maota o Faipule e i ai le malosiaga e faaulu ai le mataupu o le Faateaeseina pe a ausia le palotaga e 2/3 o faipule uma o le Maota. E na’o le Maota o le Senate o loo i ai le malosiaga e faamasino ai le faate’aga, ma le auai o le Faamasino Sili, ma o le a le mafai ona faasalaina vagana ua fulisia le lua o vaetolu o le Maota atoa. O totino ua aofia ona se iloiloga faapenei e tatau ona faatautoina pe ta’utinoina lo latou auai. 

(o) O le faamaoniga o le solitulafono e aofia ai aveese mai le tofiga, ma faaleaogaina le avanoa e umia ma le fiafia se ofisa o loo i ai se faatuatuaga, mamalu, poo se taui i totonu o le Territori. O le tagata ua aafia pe faamaonia le solitulafono pe leai, e mafai fo’i ona molia i isi tulafono a le malo. 

SUIGA 4 & 5

O le suiga taufa’aofi numera 4 ma le 5, e maoti mo le Vaega o Fa’amasinoga, e aofia ai le tofia e le Kovana Sili o le Fa’amasino Sili ma Faamasino Sili Lagolago ae le toe tofia e le Failautusi o le Matagaluega o le Initeria pei ona i ai i le taimi lenei.  Ma o nei tofiga a le kovana e fa’amaonia e le Fono Faitulafono. 

O le isi suiga maoti mo le Vaega o Fa’amasinoga, o lo’o fa’aupuina fa’apea: E lẽ tatau i le Failautusi o le Matagaluega o le Initeria ona ia toe iloiloina, faaleaogaina pe na te fa’auilavea i se talosaga apili/tagiusu i se Fa’ai’uga a le Fa’amasinoga Maualuga o Amerika Samoa. 

SUIGA ONO

O lea mataupu e fa’atatautau mo le Suiga i le Faaleaogaina o le Vito (po’o le Veto Override). O lea suiga e tuuina atu ai i le Fono Faitulafono le malosiaga e fa’aleaogaina le “vito” a le kovana, i se pili sa pasia e le Fono Faitulafono, ae vito e le kovana. 

SUIGA FITU & VALU

E pei ona fa’ailoa i pepa fa’amaumau a le malo:

• suiga 7 - O le Suiga o Taualumaga e Faamaonia ai Suiga o le Faavae 

• suiga 8 - Suiga o Mata’itusi faaPeretania o le Suafa o le Malo o Amerika Samoa