Washington State - USA

O le afiafi ole aso Toona’i sa fa’ataunuuina ai le Tausala Saili Tupe a le Dynasty Car Club a aloali’i Samoa i le Setete o Uosigitone. O le fa’amoemoe maualuga o le seleni na maua mai lea taumafaiga, ina ia fa’atautaia ni a latou galuega alofa mo le mamalu lautele o uso, tuafafine, tuagane ma le toatele o tagata e le o maua ni fale e nonofo lelei ai i lea fo’i setete.

O le latou taumafaiga sa fa’asolosolo mai sui o lo’o auai o totino o lea Kalapu Ta’avale Teuteuina ma taito’atolu, ta’ito’alua i latou i le avanoa e tasi mo le latou siva e tuufa’atasia ai le seleni mo le fa’amoemoe.

Na faia fo’I ni fa’afiafiaga eseese na tapena i ai nisi o sui ma aiga o le Kalapu a le Dynasty, ma e matagofie foi le polokalama faasolo sa fofogaina lea e le susuga J-Smooth po’o Jake Iosua.

O le afiafi na fa’atasia lea i le Buffet o le Harvest ina ia pule lava le tagata ia i lana tausami e fia taumafa ai, ma ua leai fo’i se nofoa na totoe i le itu atoa na taofia mo le fa’atasiga i lea afiafi.

O le mamalu sa auai e matua to’atele lava, sa i ai fo’i ma sui o alo mai le Manu’atele fa’apea ma nisi o loo tupuga mai le usoga ia Tumua ma Pule, ae to’atele ai lava totino mai le Motu o Fiafiaga.

Ole aofai o sui fai ta’avale o lo’o aofia i le Dynasty e to’a 24 i latou o totino fa’amauina. E faia pe fa’atino e i laotu nisi o galuega lelei mo le mamalu lautele ma e masani ona latou fagaina i latou o e maumausolo ma e o lava nei fesoasoani i nofoaga ua matauina o lo’o fa’amautu ai le to’atele.

O nisi o taimi e faia ai a latou galuega fa’amama i nofoaga nei ua mautinoa e nofoia e nei lava sui e le o maua  ni falenofo, faapea fo’i ma le fesoasoani atu i nisi taimi i le Lend a Hand mo le fa’atautaiga o latou tufatufaga o pusa mea taumafa siiatoa.

Na tomua lava le fa’amoemoe i le po i le siva faitaulia a le susuga Charlie ma Jr Talialo mai Aua ma le fanau o se tasi fo’i sa tulai mai le foe o le Dynasty i le tausaga ua te’a. Fa’aulu le siva ale fanau i le $400. ma le $104. na maua i luga o le fola, ua maua ai le aotelega e $504.

Na soso’o lea ma le tova i le siva na tapena mai i ai le vasega o fanau uma lava a sui totino o le Dynasty Car Club, lea sa a’oina le latou siva a’o tuufa’atasia fo’i le taumafaiga a latou tina uma lava mo le fa’amoemoe.

O le tausala na soso’o ai o le alo e fa’asino ia Utu fa’apea ma Faith Leaso Sio. Maea lena avanoa tova fo’i i siva matagofie na tapena i ai le Week End Crew. ma sa matagofie lava fo’i lea taumafaiga i le maimoaga a le toatele o aiga na vala’aulia e sui taito’atasi o le Daynasty ina ia latou foa’i ma le loto i le latou faamoemoe.

O le siva na soso’o ai o le avanoa lea mo le aiga o le tofa Nofo Moliga ma le aiga, fa’apea ma Mark Ausage ma tatala lea sausaunoaga i le $500.

O le siva lona fa n tuufa’atasia ai le aiga Sa Pu’a, Aia Sa Ili ma le Aiga Sa Iosua, lea e aofia ai ma le fofoga fetalai o le polokalama fa’asolo o lea afiafi a tamali’i.

O le siva lea sa fa’atoa fofogaina mai mulimuli lava le aofelega o foa’i na fa’ao’o atu i le laulau ae maise fo’i o le aofai na aoina i le fola ma maua ai le aotelega e $3000.+ mo se fa’aopoopoga fa’atopetope mai le fola ma siialofa.

I le toe siva o le po sa taoto lea i le ali’i Peresetene o le Dynasty Car Club le tofa Tautalamaaitu Leo Aiono ma le faletua Savanda Taupau ma lena fo’i itu tele o le aiga i Seattle, Kent ma Tacoma nei.

Na tatalaina le siva a le tamaitai Falenaoti Ariahanna Honey Girl Taupau ma Fuatino Aiyanna Leuasina fa’apea le tofa Selemaea Taupa’u mai le itumalo o le Va’a o Fonoti i le $1,330. Maua le vasega o si’ialofa i le laulau ma le fola e $3,400. maua le aotelega o le taualuga atoa e $4,730. i se fa’aopoopoga fa’avave i lea afiafi.

Peta’i ina ua aotelega mea uma, mai le taumafaiga atoa i le a’ao foa’i o i latou o aiga ma e pele i le Kalapu a le Dynasty, ua maua le $10,000.+ na foa’ia i lea lava po. 

O le fa’afetai mai le agaga fiafia tele sa fa’aleoina lea e le tama matua ai lava i lenei Kalapu Taavale a Alo mai Samoa na lua, le susuga Tigilau mai le afio’aga o Tula, Amerika Samoa. E pei lava ona fa’alauiloa, o lenei Tausala o le fa’alua ai lenei ona fa’ataunuu i tausaga ta’itasi, ina ia sailia ai le alagatupe mo a latou galuega fesoasoani i le mamalu lautele o le Setete, ma e faia ina ia asia o nai uso pele ua le mautu i ni falenofo i latou ae ua maumausolo.

O le fa’afetai fo’i mai le susuga le Peresetene o le Dynasty ma lana laulauatofi, ona o le galulue fa’atasi o totino uma mo lea fa’amoemoe, ua latou vala’auina nai o latou aiga ma uo mamae ina ia latou foa’i ma le loto i le taumafaiga ia mautu ni auaunaga a le Dynasty Car Club i e uma o lo’o i ai le mana’omia i o latou olaga i le setete lava o Uosigitone.

O le a fa’alauiloa atu fo’i le taimi o le a fa’atautaia ai nei galuega alofa  ma fa’asolosolo atu i le vaitau o le taumafanafana, e iloga patino ai nofoaga e fa’aautu i ai latou auaunaga nei.

“Pe ana le tatou tutufa’atasi i le agaga e tasi ma fa’atino fa’atasi lenei fa’amoemoe, e le malo lava le tatou tapenaga sa taumafai i ai. Ua tasi lo tatou manatu, ua pale fo’i i tatou i le manumalo, ua fa’afetai fo’i mo le seleni mamala lea ua taua’aoina mo le tatou fa’amoemoe. O le fa’afetai i le Atua aua ua fai ua mafai, o le fa’afetai i o tatou aiga ma uo mamae sa mafai ona o mai e tausoa le tatou fa’amoemoe lea ua ausia ai lenei aotelega o le seleni, Fa’afetai tele ua malie o le papa i galagala ua to’ia fo’i le tumua’i o i matou uma i la outou foa’i ma le loto alofa. Fa’aftai tele! O le sauoga mulimuli lea a le tofa Tautalamaaitu Leo.