Apia - SAMOA

Ua ripotia mai i Faamasinoga Apili a Samoa, lo latou te’ena o se apili a se pagota o lo’o tuli sona faasalaga i moliaga o lona taupulepule e fa’ao’o le oti i se tasi o taitai o le malo.

E tusa ai ma se ripoti a le Samoa Observer, ua ta’ua ai le lauina o le faai’uga a le Fa’amasinoga Apili i le amataga o lenei vaiaso e faasaga i le apili a Lemai Faioso Sione po o Lemai Simanu.

E to’afa i latou na molia i lenei fa’alavelave, lea na aofia ai ma Lemai, o lo latou taupulepule e fa’ao’o le maliu i le Minisita a le itumalo o Lepa, le afioga Tuilaepa Sailele Malielegaoi, i le tausaga e 2019.

O le afioga i le Faamasino Sili ia Satiu Simativa Perese faatasi ai ma faamasino ia Asher ma Young, sa pule faamalumalu i lenei mataupu.

O le tamaitai loia ia Unasa Iuni Sapolu sa tula’i mo Lemai i totonu o tauaofiaga o lona faamasinoga apili ma e fa tausaga ma le ono masina, na fa’asala ai Lemai i le faaiuga o lona fa’amasinoga ia Mati 2023.

O isi na molia faatasi ma Lemai, na aofia ai Taualai Leiloa, Malele Paulo po o King Faipopo ma Talalelei Pauga, lea o lo’o faatalitali nei lona faamasinoga.  O nisi o faavae o le apili a Lemai, e aofia ai se finauga i ni molimau fou ua tulai mai ina ua mae’a lona faamasinoga, lea ua talitonu ai le itu tete’e, e manaomia ona toe faia se faamasinoga fou.

Ma na apili e le itu tete’e ia le faaiuga o le faamasinoga faatasi ai ma lona faasalaga.

I le lauina o le faaiuga a le Faamasinoga Apili, lea sa fa’aleaogaina pe te’ena ai le apili a le ua faasalaina, o lo’o fa’atonuina ai foi le taofiofia o ni isi faamatalaga i tua atu ma le faaiuga a le faamasinoga, mai i le fa’asalalauga atu i le lautele.

Na ta’ua e le faamasinoga, o le mafuaaga o le faasaina ona tatalaina mai i tua o tulaga uma o lenei faamasinoga, ina ia puipuia ai aia tatau o Talalelei Pauga mo se faamasinoga tonu i luma o le Faamasinoga Sili.

O Lemai sa faia faatasi a la’ua faamasinoga ma Paulo lea na fa’amaonia ai a la’ua moliaga.

E fa tausaga na fa’asalaina ai Paulo i le falepuipui, ae e lima tausaga na fa’asala ai Taualai.

O Pauga sa ia totogia le vaegatupe na faatulagaina e le faamasinoga e mafai ona tatalaina ai o ia i tua e faatalitali ai lona faamasinoga, talu ona aumai fa’amalosi o ia mai i Ausetalia.