Pago Pago - AMERIKA SAMOA

E tusa ai ma se Faatonuga a le Faamasinoga Maualuga a Amerika Samoa, e faaleaogaina ai se tagi a le alii loia o David Wiesner, ua fa’ailoa mai ai le le faamalosia i totonu o Amerika Samoa, le Faaopoopoga e Lua o le Faavae a le malo tele, lea e faataga ai ona umia e tagata ia a’upega malolosi.

O le tagi a Wiesner, sa faaulu e faasaga i le alii Loia Sili, le susuga ia Fainuulelei Falefatu Alailima-Utu, ina ua ia le pasiaina se talosaga a Wiesner, mo se laisene, e mafai ai ona auina mai i totonu o Amerika Samoa ia ni vaega o se la’au malosi, mai i Amerika, ina ia mafai ai ona gaosia se la’au malosi (.22 caliber semi automatic rifle).

Ina ua tapaina e le Samoa News se finagalo a Wiesner, sa ia fa’ailoa mai e faapea, o le autu o le Faaopoopoga e Lua i totonu o le Faavae a le malo tele, ina ia mafai e tagata uma o le Iunaite Setete ona iai se auala e puipuia ai o latou tagata ma aiga.

Ma sa fa’aalia e Wiesner e faapea, ina ua tu’uina mai le faaiuga a le Faamasinoga Maualuga ia Oketopa 16, 2024, ua avea ai lea ma ulua’i taimi ua faailoa mai e le Faamasinoga Maualuga, le le puipuia o lenei aia tatau i totonu o Amerika Samoa, ae o loo’o puipuia i totonu o setete ma teritori uma.

Sa ta’ua e Wiesner le pito sili ona maualuga o le fuainumera o fitafita i totonu o vaega’au a le malo, mai Amerika Samoa ma ua agava’a i latou e umia ma tausia ia la’au malolosi, e pei lava ona pulea ma umia e tagata uma o Amerika.

Ua talitonu Wiesner, e le ‘au le manatu a Amerika Samoa i le talitonuga ma tulafono a Amerika. Lea ua mafua ai ona faatapulaaina i latou e mafai ona umia ia la’au malolosi, e pei ona faia i isi atunu’u ese.  Ma o se tulaga ua ia talitonu, e faamaualuga ma puipui gata.

O lo’o ta’ua i totonu o le faaiuga tusia a le Faamasinoga Maualuga, le tau sailia pe faatauina mai, e Wiesner, o ni totoga po o vaega o la’au malolosi, talu mai Novema 22, mai i le setete o West Virginia.  Ma ua iai sona faamoemoega e aumaia nei oloa i totonu o le teritori, e mafai ona gaosia faamae’a ai se la’au malosi (AR-15 style rifle).

O le aso 14 o Tesema, 2021 na fa’aulu ai e Wiesner se talosaga i le Ofisa a le Loia Sili mo se faatagana e aumaia ai nei oloa.  Ae o le aso 5 o Mati, 2022 sa fa’ailoa atu ai e le Loia Sili sa iai i lena tausaga, le susuga ia Roy J.D. Hall, ia Wiesner le le o gatasi o lana talosaga ma tulafono lotoifale.

O le aso 8 Mati, 2022 sa toe faaulu ai e Wiesner seisi talosaga fou, ae na toe te’ena mai e le Loia Sili lea talosaga, ia Iulai 8, 2022.

O lea na faila ai e Wiesner sana apili i le ofisa a le Loia Sili, ae peitai ane, o le aso 8 o Iuni, 2023, na te’ena ai lana apili.  Ona ua taofi le malo, o le a’upega o lo’o taumafai le alii loia e gaosi, e le o faataganaina i lalo o tulafono lotoifale.

O le aso 18 o Tesema o le tausaga ua tuanai, sa faapea loa ona fa’auluina e Wiesner sana tagi e faasaga i le Loia Sii, ona ua ia taofi, ua solia e le Loia Sili ia ona aia tatau e umia ai a’upega, e pei ona ta’ua i totonu o le Faavae a le malo tele.

Sa tula’i lava Wiesner, e finauina lana itu, i luma o le faamasinoga.

O Ianuari 10, 2024, sa faapea ona faaulufaleina ai e le sui Loia Sili ia Hall Jr., ia se talosaga, ina ia faaleaogaina le tagi a Wiesner.

O le aso 16 o Oketopa, o le tausaga nei, sa taliaina ai e le Faamasinoga Maualuga ia le talosaga a le ofisa a le Loia Sili.

I le soalaupuleina o lenei mataupu, ua taofi le Faamasinoga Maualuga, o lo’o finagalo ia le itu tagi, ina ia tu’uesea e le faamasinoga ia tulafono e mataituina pe pulea ai la’au malolosi i totonu o le teritori.

Ma atonu o le tulafono ua tula’i mai ai, pe apalai ia le faaopoopoga lona lua (2nd Amendment), o le Faavae a le malo tele, i totonu o le Teritori.  Ua tali mai le faamasinoga, e leai.

E le gata i lea, ua ta’ua foi e le faamasinoga le aofia ai ma le Faaopoopoga lona 4 ma le lona 14, lea o lo’o aofia i le finauga a le itu tagi, ua lu’itauina ai tulafono e mataituina ai la’au malolosi i totonu o Amerika Samoa.

Ma e le gata i lea, sa ta’ua foi e le faamasinoga, le aloaia e le Konekeresi, o le Faavae a le teritori, e le o aofia ai se aia tatau e mafai ai ona umia la’au malolosi.

Ae e ui i lea, ua faatagaina e le Fono ia nisi o a’upega i totonu o le teritori, i lalo o ni tulafono ma’oti, e aofia ai ma le faia o se suesuega i tala’aga o tagata o lo’o finagalo e umia ia nei a’upega.

Ua taofi foi le faamasinoga, e le’i ioe tagata o Amerika Samoa, i se talosaga e mafai ai ona o latou umia la’au malolosi, e pei ona faamaonia mai i totonu o le Faavae lotoifale.

Ma o le mafuaaga lea ua ‘au ai le manatu a le faamasinoga, ina ia le taliaina le talosaga a le itu tagi.

O le faaiuga a le faamasinoga, ua faapea ona sainia e le sui Faamasino Lagolago ia Gwen Tauiliili-Langkilde ma Faamasino Lagolago ia Faamausili Poumele ma Muasau Tofili.

O le aso 16 o Oketopa, 2024, na sainia ai lea faaiuga.