Pago Pago - AMERIKA SAMOA

Ua taoto atu nei i luma o le Fa’amasinoga Faaleitumalo, se talosaga mo le fa’asolofua o moliaga sa faia faasaga ia Epifania Suafoa-Tauai, lea sa avea ma Faatonusili o le Ofisa Faasao o Tala Faasolopito a Amerika Samoa (ASHPO), ina ua te’ena e le Faamasinoga Maualuga ia se talosaga mo se loia tuto’atasi, e na te iloiloina ia moliaga o le fa’ao’olima o lo’o molia ai Suafoa-Tauai.

Sa avefaapagotaina Suafoa-Tauai ma molia i le fa’atupu vevesi ma le fa’ao’olima i lona tulaga e tolu, i le aso 26 o Fepuari, 2025.  O ona moliaga o ni vaega ‘A’ i solitulafonoo mama.  Na mafua nei moliaga, ona o se fa’alavelave na tula’i mai i le aso 16 o Fepuari, lea o lo’o masalomia ai o ia i le fa’ao’olima i se teine fa’atauoloa, i le faleoloa a Kruse, i Leone.

O le aso 27 o Fepuari, sa tula’i ai Suafoa-Tauai i luma o le Faamasinoga Fa’aleitumalo ma tete’e i ona moliaga, ma o le aso 28 o Iulai, 2025 ua fa’atulagaina e fa’ataunu’uina ai le iloiloga o lana mataupu.

Ae i se talosaga sa fa’aulu e le ofisa a le Loia Sili, ua faapea ona talosagaina ai se loia tuto’atasi e na te iloiloina lenei mataupu, lea sa failaina ia Aperila 2025.

O le talosaga mai i le Ofisa a le Loia Sili, sa faapea ona iloiloina e le Faamasino Sili, ia Michael Kruse ma le sui Faamasino Sili, le susuga ia Tunupopo Alalafaga Tunupopo, i le aso 14 o Me ma faia ai le la fa’ai’uga i le aso na soso’o ai, e pei ona sa fa’alauiloa mai e le faamasinoga.  

Ma ua ta’ua i le fa’ai’uga a alii faamasinoga, le leai o se fa’amaoniga, i le mana’omia o se loia tutoatasi, e tusa ai ma molimau sa fa’auluina.  Na ta’ua foi e le faamasinoga, le leai o ni fa’amaoniga e fa’atatau i ni ulua’i suesuega sa faia e le ofisa a le Loia Sili, sa  fa’alauiloa atu, ae e le’i failaina ia le talosaga.

E le gata i lea, sa fa’amanino mai e le faamasinoga e faapea, o le solitulafono mama, vaega ‘B’, e le manaomia ai le filifiliga o se loia tutoatasi. 

Ma e ui ina sa agava’a ia le ua molia, i le maga 4.0801(e)(2), o le tulafono, lea o lo’o faatatau i so’o se tasi e faigaluega i le malo, ae peitai, ua mae’a ona faamaloloina mai o ia mai lona tofiga i totonu o le ASHPO, ona o ona moliaga.  Ma ua avea  lea ma tulaga, ua le toe agava’a ai o ia i lea vaega o le tulafono, ma ua taoto ai loa le iloiloina o moliaga, i lalo o le ofisa o le Loia Sili, e pei ona masani ai.