VAEGA 1

E toe fa'atalofa atu i a tatou pa'aga i so'o se tulimanu o le kelope o lo'o maua mai ai lenei auaunaga, aemaise i nai o tatou tama ma tina matutua i Amerika Samoa.  E fa'atalofa atu i le faaopoopoga fou o le tatou Fagogo i lenei tausaga fou 2025.  E tatou te tau fai si'i faatasi le viiga ma le mua i lo tatou Tapa'au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa'i ma le manuia i lenei taeao fou, i lenei tausaga fou, i luga o lenei nusipepa.

Ia ae se'ese'e mai loa i ou se'etaga malu, ae o le a taumafai atu le tatou Fagogo fou - O TEINE E TO’ATOLU MA LE TAMA NA LEILOA.

***********************************************************

I aso a la ua leva, na iai se tamaloa mau’oa ma sona to’alua, ma se la pepe tama.  Ae e le’i fanau mai lenei tamaititi, sa fai se miti a le tamaloa mau’oa.

Na ia miti e faapea, e na’o le pau lava le auala e mafai ai ona tuputupu a’e ma matua lona atalii, pe afai e le papa’i vae o lona atalii, i luga o le palapala, se’ia atoa le 12 o ona tausaga.

O le taeao na soso’o ai sa faapea ona amata tapenapena e le tamaloa mau’oa ia mea uma, ina ia mafai ona le tino mai lana miti.  Ma sa na’o tausi tama faatuatuaina sa fa’afaigaluegaina e le ulugalii, mo le tausiga o le la pepe.

Ua alu aso, sau aso, sa faapea ona malu puipuia le tausiga o le tamaititi.  O so’o se mea lava e alu ai le tamaititi, e si’i lava o ia e ana tausi tama, o isi taimi, e si’i fa’atasi lava le tamaititi ma lona nofoa.  E le taitai ona papa’i ona vae i lalo.

Ua lata ina o’o i le atoaga o le 12 tausaga o le tamaititi.

Ma ua amata ona fa’ata’atia e le ulugalii mau’oa ia fuafuaga mo le pati tele e fa’amanatuina ai le 12 tausaga a le la tama, ma mafai ai ona toe tu’usa’oloto o ia mai i lenei saisaitia o feagai ma ia, i le le mafai ona papa’i o ona vae i lalo i le palapala.

O se tasi aso a’o pisi le ulugalii mau’oa ma le latou aiga faapea tagata uma i tapenapenaga o le aso fanau a le atalii, sa tete’i tagata uma, i le pa mai leotele mai o se faititili, na lulu uma vaega o le lau’ele’ele ma le maota o le ulugali’i mau’oa.

Ae o le taimi lea, o lo’o si’i mai ai e se tasi o tausi tama ia le atalii a le ulugalii mau’oa.  Ae ina ua pa leotele le faititili, na matua’i fa’ate’ia ai lava le tausi tama, ma ia fa’apa’u ai i lalo le atalii a le ulugalii mau’oa, ae ua sola i le lafi.

Ma na mou fa’afuase’i atu le gogolo leotele mai o le faititili ma ua le toe gase se vaega o le foga’ele’ele.  

Ua toe oso mai le tausi tama mai le nofoaga na lafi ai, e toe si’i atu le tamaititi ae paga lea, ua fiu le tausi tama e saili le tamaititi, ua leai seisi.

[E FAIA PEA]