Vaega e 2

Taeao Manuia. Taeao Totoa, i le mamalu o le tatou aufaitau nusipepa i lenei taeao fou.

Tatou te tau fai sii le Viiga ma le Faamanu i le Silisili Ese, i Lana tausiga alofa ma Lana

tausiga mamana, ia i tatou uma, ua mafai ai ona o tatou toe fesilafai i luma o nuu, ae le

o tua o nuu, i lenei taeao fou. E faafeiloai atu foi i tina ma tama matutua ua mafai ona

aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa, o le a toe sosoo atu le tatou Fagogo, “O TEINE E TO’ATOLU MA LE TAMA NA LEILOA” i lona vaega e 2.

*******************************************

Fai mai ua leai ni upu e mafai ona faamatalaina ai le nutimomoia o le loto a le ulugalii mau’oa, ina u animo fa’afuase’i le la tamaititi, a’o lea ua toeititi mae’a tapenapenaga mo le fa’amanatuina o lona 12 tausaga, ma fa’asaoina mai ai o ia mai i le fa’asalaga pe a papa’i ona vae i lalo o le palapala.

Ua fetulina’i solo e le tamaloa mau’oa ia ana auauna ma ana fitafita e saili mai lona atalii ma sa leai se mea na gata mai ai lona fa’aaogaina o tupe pe totogi tupe, mo le tau sailiga o lona atalii ina ia maua mai.

O a ana meatotino ma ana auro ma ario, o lona malosi, sa ofoina atu i so’o se tasi e mafai ona toe fa’afo’i mai lona atalii.

Ae peitai, ua fiu tagata o le malo, faapea malo tuaoi, e saili le atalii a le alii mau’oa ae ua le maua lava.  Ua nimo atu lava o ia, e pei lava e le’i fanau mai.

I ni nai tausaga mulimuli ane, sa maua tala ai le alii mau’oa, e uiga i se tasi o potu o lona maota, e pito lava i tua, e lagona ai le fealua’i ai o se tagata i le tulua o po ma ao, faapea ai ma le tagi lotulotu o se tagata, i le faanoanoa.

Ua oso a’e le manatu i le alii mau’oa, atonu o iai se so’otaga i lea potu ma le to’esea o lona atalii.  O lea na ia ofoina atu ai se vaegatupe tele lava i so’o se tasi, e mafai ona nofonofo i totonu o le potu lea i le po atoa, e va’ava’ai pe maua mai ai se tala e uiga i lona atalii.

E to’atele na o mai e fia maua le vaegatupe tele lea ua ofoina e le alii mau’oa, ae peitai, e le’i taitai le po ae toe o ‘ese nei tagata, ona o le matafefefe i le pa u o le potu.  Aua e o’o loa i le tulua o po ma ao, ona o latou fa’alogoina loa lea o le leo o se tagata e pei o lo’o tigaina faapea ai ma le savali mai o se tagata, ae e le iloa atu se tagata.

Talofa i si ulugalii mau’oa, po o le a le maualuga i fea o le tupe ua o la ofoina atu ae peitai, e leai se tagata lototele na mafai ona nofo i le po atoa i totonu o lea potu.

[E FAIA PEA]